АЙЛАНЫСТАРНЫҢ КӦБІЗІ ӰГРЕДІГ СУРЫҒЛАРЫНА ТЕЕЛЧЕ
04.10.2017
Хабарлар
Владимир Штыгашев Ирина Аульға ӧткін тоғызы ӱчӱн алғызын читірген, 2011 чылда тӧстелген уполномоченнай институдына киртініс сині ӧсчеткенін таныхтаан. Анзын айланыстар кӧптең кӧп кірчеткені киречілепче, ағаа хоза, айланыстар саны иң тың уполномоченнайға Ирина Ауль турғызылған тустаң сығара хозыл сыххан - пӱӱлгі чылның апрельінең оларның саны 180 пол парған, чыл пасталғанынаң - 200.
Айланыстарның кӧбізі республиканың ӧӧн городынаң кірген. Чуртағҷыларны ӧӧнінде ӱгредіг сферазындағы сурығлар сағыссыратчалар. Ағырсымнығ сурығ полып халча алынҷа категориялығ чуртағҷыларға чурт пирері. Республика чуртағҷыларының хоптары ідӧк социальнай сурығларнаң палғалыстығ полған.
«Пасталғаны чахсы. Иң ӧӧні - сірер ол сферазар палаларның кирексіністерін арачылап полар кізілерні кӧптең кӧп тартчазар, - уполномоченнайның тоғызына чахсы паалағ пирген Владимир Штыгашев. - Хаҷан кізілер уполномоченнай институды тоғынчатханын кӧрчелер, оларның сидіксіністі пӧгер ӱчӱн айланары килче паза ол сурығ пӧгіл парарына ізеніс тӧріпче».
Владимир Штыгашев позының хайиин арачылалбаан категориялығ палаларға салған. Республика ӧкіс палаларның чурт алҷаң теезін хызырыбысхан, таныхтаан республика парламентінің устағҷызы, че ам даа ікі муңҷа кізее чурт пирерге кирек, хайзыларының чурт алар праволары чит килген, че толдырылбаан.
Ирина Ауль позының саринаң опекаа алылған палаларға социальнай хабазығ читкіҷе пирілбинчеткенін паза опека органнары специалисттерінің сидіксіністерін таныхтаан. Чал ахчазы тӧбін синде полғаны паза опека органнарына турыстығ хайығ салылбинчатханы оларның тоғызының аарлазын тӱзірче, салтарында тоғыс тӱзімніг толдырылары тӱзібӧкче.
Тоғазығның салтары пала праволарын арачылирынҷа законодательствоны чахсыландырардаңар чӧптезіглер полған.
«Чӧптеріңні октябрь ай тоозылғанҷа киріңер. Піс оларны ӱзӱрербіс, анаң закон сығарҷаң пастағ чіли закон проектін тимнирбіс, кирек полза, республика бюджедінзер тӱзедіглер кирербіс», - хосхан Владимир Штыгашев.
Автор :
Хакасияның Ӧӧркі Чӧбінің хабарлар пӧлии
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы