БЕЛАЗ ТЕХНИКАЗЫН ТЫХТАҶАҢ КІН ПӰДІРІЛЕР
06.10.2017
Хабарлар
ХАКАСИЯДА ЧИР АЛТЫНДАҒЫ ИС-ПАЙНЫ АНЫҶАҢ ПРЕДПРИЯТИЕЛЕР САНЫ ХОЗЫЛЫП ОДЫРЧА, УЛАМОХ ХАРА ТАС ПРОМЫШЛЕННОЗЫНДА. АНЫ САНҒА АЛЫП, ХАКАСИЯНЫҢ ӰЛГӰЛЕРІ БЕЛАРУСЬ РЕСПУБЛИКА ӰЛГӰЛЕРІНЗЕР БЕЛАЗ ТЕХНИКАЗЫН ТЫХТАҶАҢ СЕРВИС КІНІН АЗАРЫН ПӦГЕРГЕ АЙЛАНҒАН. ПУ ЧАҒЫНДА, ТІЗЕҢ, АЙЛАНЫС ХООСТЫРА ЧАРАДЫҒ АЛЫЛҒАН ПАЗА СУРЫҒ ОРНЫНАҢ ТИБІРЕП ПАСТААН. АҒБАН ТАСТЫНДА, ТАЗОБА ПОСЁЛОК ХЫРИНДА, БЕЛАЗ ТЕХНИКАЗЫН ТЫХТИРЫНҶА ПАЗА СЫНЫХТИРЫНҶА СЕРВИС КІНІНІҢ ПАСТАҒЫ ТАЗЫ САЛЫЛҒАН.
ПІСТІҢ РЕСПУБЛИКАА ТАНЫҒЛЫҒ КИРЕК АЛНЫНДА ХАКАСИЯ ПАЗЫ ВИКТОР ЗИМИН, БЕЛАРУСЬ РЕСПУБЛИКАНЫҢ РОССИЯДАҒЫ ПОСОЛЬСТВО ПӦЛИИНІҢ УСТАҒҶЫЗЫ ВИКТОР ЩЕТЬКО, «БЕЛАЗ» ОАО-ның ӦӦН ДИРЕКТОРЫ ПЁТР ПАРХОМЧИК ПАЗА «ХЫЗЫЛЧАР-БЕЛАЗСЕРВИС» ООО-ның ӦӦН ДИРЕКТОРЫ ВАСИЛИЙ ТРИГУБЕНКО ПРАВИТЕЛЬСТВОДА КАРЬЕР ТЕХНИКАЗЫН ТЫХТАҶАҢ СЕРВИСТІ ТИЛІДЕРІНҶЕ ЧЫЫЛЫҒ ИРТІРГЕННЕР. АНДА ПРАВИТЕЛЬСТВО КІЗІЛЕРІ, РЕГИОНДАҒЫ ПРОМЫШЛЕННОСТЬ ПРЕДПРИЯТИЕЛЕРІНІҢ УСТАҒҶЫЛАРЫ, ААЛҶЫЛАР АРАЛАСХАННАР.
Хакасия пазы Виктор Зимин, улуғ аалҷыларны удурлап, сервис кінін пӱдірері Хакасиянаң Беларусь республикаларның хада-пірге тоғынардаңар чӧптезии хоостыра чуртасха кирілчеткенін таныхтаан. Пу пастағларны чуртасха киреріне хабасчатхан ӱчӱн, республика пазы Россия президенті Владимир Путинге паза Беларусь президенті Александр Лукашенкоға алғызын читірген.
Аалҷылар даа кӧп чылығ сӧстер чоохтанғаннар. Россиянаң Беларусь кӧп ниме-ноонаң алысчалар. Россия харындас чон хазназына газ, нефть паза пасха ниме-ноо сатчатса, Беларусь пістің хазнаа аал хонии ас-тамаан, карьер, аал хонии паза пасха даа техниканы читірче. Хакасия садығ палғалыстарында позының орнын тапханох. Республикадаң Беларусьсар алюминий, хара тас парча. Аннаңар Беларусь Республиканың Россиядағы посольство пӧлиинің устағҷызы Виктор Щетьконың кӧрізінең, пик палғалысты ӱзерге чарабас, уламох тыыдарға кирек. Аннаңар піс пу айланыс хоостыра табырах тоғыныбысхабыс теен ол. Проектті чуртасха киріп, компания 100 миллион салковай инвестиция кирче.
Чыылығда промышленность предприятие устағҷыларына «БелАЗ» компания устағҷызы Пётр Пархомчикке сурығлар пирҷең оңдай пирілген. Алтын аныпчатхан компания устағҷызы Константин Цитлидзе хоза чардыхтарны пір чылға алҷаң оңдай чоғылына хомзынған. Пётр Пархомчиктің нандыриинаң, оларның техникаа хоза чардыхтарны кем не сатпинча, че компания сайтында чахсы, хомай тоғынчатхан садығҷылар пічии пар. Киртінізі чохтарны «хара» пічікке кир салғаннар. Пір чылға хоза чардыхтарны аларға сағынчатханнар оларзар кӧнізінең сыхсалар, компания оларға паан даа тӱзірерҷік теен Пархомчик.
«БелАЗ» сервис кінін Хакасияда пӱдірчеткені промышленность предприятиелеріне пу техниканы аларға кӧңнін кӧдірер. Пӱӱнгі кӱнде тиксі республикада БелАЗ-тың 270 аймах техниказы саналча, аннаңар техниканы тыхтирынҷа, сыныхтирынҷа сурығны пӧгерге кирек ле полған. Сервис кіні ідӧк хоза чардыхтарны кӧнізінең читір турар.
Чоохтирға кирек, пӱдіріг кічіг нимес. Сервис туразының улии - 1500 квадрат метр. Хыринда хоза чардыхтарны хайраллирына склад пӱдірілер, аның улии 1000 квадрат метр полар. Тиксі наа пӱдірігде пӧзік технологияларнаң тоғынчатхан 60 кізее тоғыс орны тӧстелер. Сервис кініне тоғынҷыларны тимнирінҷе компания Хакасиядағы ӱгредіг учреждениелерінең паза чонға тоғыс тапчаң кіннең чӧптезер.
Чоохтирға кирек, «БелАЗ» компания ідӧк кӧп социальнай проекттерні чуртасха кирерінде араласча. Хакасиянаң хада ідӧк тоғынарға тимде. Аннаңар чыылығда пастыхтар, Виктор Зимин паза Василий Тригубенко, ідӧк хада-пірге тоғынардаңар чӧптезігде хол салғаннар.
Сервис пӱдірілер орында пастағы тас салылған. Пайрамнығ мероприятиее «Хызылчар-БелазСервис» ООО-ның тоғынҷылары килген, ол санда механик Андрей Баранов. Ирен пу компанияда пизінҷі чылы істен парир, алында ол сигіс чыл БелАЗ самосвалынаң тоғынған. Сервис кінінзер ӧӧнінде крайдағы предприятиелер айланчаттыр. Олар ниме сайбал парғаннаңар азынада чоохтапчалар, анаң специалист, кирек оборудование - тиріглер, хоза чардыхтар алып, техника турчатхан орынзар парча. Андрей Баранов мотордаң пасха прай чардыхтарны тыхтапча: коробкаларны, редукторларны паза пасха чардыхтарны.
Сервис кінін пӱдіреріне пір чыл кӧріл парған. Проект хоостыра наа пӱдіріг 2018 чылның декабрьына тимде поларға кирек.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы