ЧАЛ АХЧАЗЫН ТУЗЫНДА ТӦЛИРІ - ӦӦН ПӦГІН
06.10.2017
Хабарлар
Киҷее Хакасияның пазы Виктор Зимин правительство чыылиин иртірген. Чыылығның ӧӧн сурығлары чылығ пирҷең тус пасталғаны паза тоңастығлар хар алтына кіргені полған. Ідӧк чал ахчазын тузында тӧлирінеңер чоох парған.
Чыылығ республика ӱгретчілерін ӱлӱкӱннең алғыстирынаң пасталған. Виктор Зимин ӱгредіг тоғынҷылары аарластығ тоғысты толдырчатханын паза республиканың тилізіне улуғ хозым итчеткенін таныхтаан.
- Улуғ алғыс прайзына, кем чуртазын ӱгредіг киреене чарыт салған, - теен регион устағҷызы.
Анаң министрлер кабинеді республикада чылығ пирҷең тус хайди пасталғанын ӱзӱріп пастаан. Хакасияның пазы, ол тоғысха паалағ пиріп, сидіксіністер пар полғанын таныхтаан.
- Республика, тиксі алза, чылығ пирҷең тусты хомай нимес пастаан. Че сидіксіністер пар полған: Боград аймаанда, Харатастың 9-ҷы поселогында паза Кӧк хайада. Оларны чапчаң пӧгерге киректелген. Салтарында сурығларның кӧбізі пӧгілген, - теен ол. - Че пістің пӧгінібіс - кізілернің чуртазын истіг идері. Табығлар пасталчатса, кӧп ниме молҷап салчалар, анаң, тізең, «нымахтар» пасталыбысча...
Республика пазының кӧрізінең, ол сидіксіністер орындағы ӱлгӱлер уйан тоғынчатхан сылтаанда сығысчалар. Аннаңар Виктор Зимин орынҷыларына оларның тоғызына хазна паалиин пирерге чахаан.
- Пар кізілер, хайзылары аның ӱчӱн нандырығлығ полчалар. Че піреезі нандырығ тударын пасхазына артыбызарға кӱстенче. Киліспес, сыданминчазар - тоғыстаң парыбызыңар, - хатығ чоохтанған Хакасияның пазы.
Пӱӱнгі кӱнде республикада чылығ пирері хайди парчатханынаңар сан пиріс иткен пӱдіріг паза ЖКХ министрінің тоғызын толдырчатхан Валерий Келин. Аның искіриинең, чурт фондының паза коммунальнай инфраструктураларның 5 октябрьға тимненізі 99% полча. Котельнайларда тимнелген хара тас сині 58,8 муң тонна, анзы чылдағы планнаң 292 процентке кӧп. Ахчанаң сидіксінчеткен аймахтарға хара тас аларына 10 миллион салковай пирілері кӧрілче. Хайди таныхтаан министр, прай ағырсымнығ сурығлар правительство тоғынған сылтаанда пӧгілген, муниципальнай ӱлгӱлер, тізең, хайыныстарын кӧзітпееннер.
Алынҷа чоох парған Харатаста пол парған киҷеегі саайдаңар, анда суғ алҷаң оборудование сайбал парған. Валерий Келиннің чооғынаң, тыхтағ тоғыстарын хараазынох тоос салғаннар, амды суғ прайзының пар, 9-ҷы поселоксар ла суғ обед соонаң чидер.
Хакасия пазының орынҷызы Валерий Марков саай полған ЖКХ объекттерінде тыхтағ тоғыстарын чапчаң апарарына ӧнетін мобильнай служба тӧстелгенінеңер искірген. Виктор Зимин саай тузына тимненіс оңдайынаң кӧзір чӧрҷең, кӱзі 1,2 МВт модульнай котельнайларны, чылығ пирҷең системанаң піріктіріп, тоғындырарынҷа хоза ӱгредіглер иртірерге чахаан.
- Хакасияның уламох кӱстіг кӧзір чӧрҷең котельнайы пар - 3,5 МВт. Аны ідӧк сыныхтирға кирек, - таныхтаан Зимин.
Аның соонаң чоох аал хонииндағыларның чідіріглерінеңер парған. Ирткен неделяда, хар тың чаап, соох турыбысхан, салтарында тоңастығлар читіре алылбаан. Иң улуғ ӱреге Боград, Шира паза Орджоникидзе аймахтары кірген. Ол кирек хоостыра Хакасия пазы чахиинаң регионда сағыбаан саай режимі чарлалған. Республиканың аал хонии министрі Александр Башков, чоох тудып, амғы туста орыннарда штабтар тоғынчалар тіп таныхтаан. Ӱреге кіргеннердең искіріглер прай аймахтардаң чыылча, ӱрегні айландырар сурыныснаң 49 фермер айланған. Хакасия, ӱрегні айландырарына 288 миллион салковай сурап, Россия правительствозынзар пічік ызыбыстыр.
Мал азығын тимнирінҷе, тізең, кирек хомай нимес полтыр. Пӱӱл 120 муң тонна от пилетелтір. Ағаа хоза, фермерлернің ирткен чылда пилетеен от халған тіп таныхтаан министр. Андағ оңдайнаң мал азығынаң сидіксіністер полбас тіп сахталча. Виктор Зимин аал хонииндағыларға хайди даа хабазығ пирерге кирек полчатханын таныхтаан. Аны хоостыра, финанстар министрі Ирина Войновазар айланып, аал хониина хабазығны пір дее хызырбасха чахаан.
Халғанҷы сурии чал ахчазын тузында тӧлиріне чарыдылған.
- Чал ахчазын тузында тӧлирі - ол ӧӧн пӧгін. Ахчанаң кирек оой нимес, че республика ол обязательстволарны толдырарынҷа прай кӱзін салча. Ол санда муниципальнай пӱдістерге ахча пирерінҷе, - теен Виктор Зимин.
Олох туста Хакасияның пазы муниципальнай пӱдістер пос парыстарын ӧскірерінҷе тоғынминчатханын таныхтаан.
- Инвесторларны табарға кирек, ол оңдайнаң пос парыстарын ӧскірерге, - хатығ чоохтанған ол. - Прайзы сағынча: республика пирер! Іди полбасха кирек, пос парыстарын хайди ӧскірердеңер сағынарға кирегӧк! Республика халғанҷы чылларға пос парыстарын 2,5 хати ӧскіріп алған нооза.
Финанстар министрі Ирина Войнова республикаа пастағы бюджет кредиді, 1 миллиард 295 миллион салковай, пирілгенінеңер искірген. Ол ахча иң пурун социальнай кирексіністіг пӧгіннерні толдырарына парған: социальнай тӧлеглерге, льготалығ имнерні аларына паза чал ахчазын тӧлиріне. Іди бюджетниктерге август ӱчӱн чал ахчазы толдыразынаң тӧлелтір. Москвадаң теестегі бюджет кредидін сағыпчалар - 4,7 миллиард салковай. Че ол ахча, министрнің чооғынаң, коммерческай банк кредиттерінің алымнарын хызырарына парар. Анзынаң республиканың хазна алымнарынҷа хорадығлары хызырылар тіп кӧрілче: пӱӱл - 150 миллион салковайға, пазағы чылда - 550 миллион салковайға.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы