РОССИЯ БЮДЖЕДІНЕ РЕГИОННАРДАҢ ЧӦПТЕР ЧЫЫЛЧА
11.10.2017
Хабарлар
Пу кӱннерде Россияның Хазна Думазынзар Хакасиядаң табылған депутат Надежда Максимова республиканың ӱлгӱ органнарынаң паза «Единая Россия» партияның кізілерінең, аның сарин алчатхан кізілердең чыған чӧптерні Хазна Думазының бюджетче паза налогча комитетке читірерге кирек.
Чоохтирға кирек, Хазна Думазының «Единая Россия» партия фракциязының пастаанаң пастағызын на регионнардаң федеральнай бюджетті тӧстиріне чӧптерні чыыпчалар.
Ол пӧгіннең ирткен неделяда Хакасиязар тоғыс чорығынаң читкен Надежда Максимова. Пістің республикадаң, Хазна Думазынзар «Единая Россия» партиядаң табылып, ол ідӧк бюджетче паза налогча комитет кнезінің орынҷызы полча.
Федеральнай бюджет тӧстиріне чӧптер чыырынҷа чыылығда Хакасияның Ӧӧркі Чӧп кнезі Владимир Штыгашев, пастағы орынҷызы Юрий Шпигальских, орынҷылары Сергей Комаров паза Светлана Могилина, финанстар министрі Ирина Войнова, экономика тилізі министрінің орынҷызы Людмила Халтанова паза пасхазы араласханнар.
ЭКОНОМИКАНЫ ПАЗА ЧОН ЧУРТАЗЫН ЧАХСЫЛАНДЫРАРЫ
Надежда Максимованың искіриинең, пу чағында Хазна Думазы 2018 - 2020 чылларға федеральнай бюджеттің ӱзӱриин пастир. «Единая Россия» партияның фракциязы, тізең, аны тӧстирінҷе тоғысты халых пірігістерінең паза орындағы ӱлгӱлернең майдох ӧткін пастаан.
- Тиксі алза, федеральнай бюджеттің ӧӧн пӧгіннері алыспаан. Ол экономиканың ӧзізін хайраллиры паза чуртағҷыларның сын парыстарын ӧскірері, - чарыдып пастаан депутат. - Чоохтирға кирек, пӱӱл экономика кӧзідіглері уғаа чахсы, промышленность таа, аал хонии даа ниме-ноо сығарызын тӱзімніг ӧскірче. 2018 чылға федеральнай бюджет парызы 15 триллион 182 миллиард салковайға тиңнелер, хорадығлар - 16 триллион 515 миллиард салковайға. Андағ оңдайнаң, дефицит 1 триллион 332 миллиард салковай полар.
Че пу чылның кӧзідіглерінең тиңнестірзе, парыстар сала пӧзік алылғаннар, хорадығлар сала асхынах, салтарында дефицит тее кӧмес пол парған. Іди федеральнай ӱлгӱ органнары чылдаң чылға бюджет дефицидін хызырарға пӧгінчелер. Дефицитті чабар ӱчӱн, федеральнай бюджет ікі фонднаң тузаланча, килчеткен чылда олар Национальнай ис-пай фондына піріктірілерлер.
2018 чылның ӧӧн кӧстеглерінеңер чоохтап, Надежда Сергеевна теен, инфляция тӱсчеткенде, Россияның Ӧӧн банкы ідӧк кредиттернің процент ставказын тӱзірче. Пӱӱнгі кӱнде ол 8,5% тиңнелче. Ідӧк налогтарҷа хазна политиказы тың алыспас. Хазна аймах хабазығлар пирерін узарадар, ол санда аал хониина, чурт пӱдіриине. Россияда промышленность тилізінің фонды тӧстелген. 2018 чылда ағаа хоза 16 миллиард салковай пирілер. Кічіг паза ортын бизнесті тилідеріне хабасчаң программа тимнелген, аның ікінҷі ады - «6,5». Ол син процент ставкалығ кредитті банктар идінҷектерге пос киреен тилідер сағыстарын чуртасха кирерге пирчелер.
Социальнай хабазығны кӧрзе, федеральнай ӱлгӱлернің ӧӧн пӧгіні иң кічіг чал ахчазын чуртап парыбызар иң тӧбін синнең тиңнирі полча. 2018 чылда ідӧк пенсияны ікі хати ӧскірері кӧріл парған. Іҷе капиталы олох синде халар - 453 муң салковай. Ідӧк ӧӧн хайығ салылча мындағ проекттерге: «Город оңдайлары», «Театрлар пӱдірері паза тыхтиры», «Арам учурапчатхан ағырығнаң ағырчатханнарға им читірері» паза пасхазы. Федеральнай бюджетте ідӧк регионнар бюджедін иптиріне ахча кӧрілче. Оларны чуртасха киреріне федеральнай бюджеттең хабазығ ӧскірілер.
- Пу ӧӧн кӧзідіглер, бюджеттің пастағы хығыриинда олар тӱзеділер, соондағы хығырығда улуғ алызығлар кирілбинче, - тіпче Надежда Максимова. -Пӱӱн чыылар чӧптерні Хазна Думазына хайди даа читірербін, оларны чуртасха кирерге кӱстенербіс.
РЕСПУБЛИКА БЮДЖЕДӀНӀҢ ХАТЫҒ ОҢДАЙЛАРЫ
Республика бюджеді, федеральнай бюджет чіли, ідӧк экономика тилізіне паза чон чуртазын чахсыландырарына кӧстелген. Че сағыстарны чуртасха кирерге харығ полча кредиттер.
- Прайзы пілче республика бюджедінің сидік оңдайларынаңар паза алылған кредиттердеңер, - искіриин пастаан республиканың финанстар министрі Ирина Войнова. - 2018 чылда піс 27 миллиард салковай парыс кірерін кӧрчебіс, хорадығлар, тізең, 35 миллиардты асча. Хазна ӧдізі - 23 миллиард салковай! Хайди республика бюджедін, паза ӧдіске кірбин, кӧрілген кӧзідіглерҷе толдырарға?
Россия президенті Владимир Путин регионнарның бюджет кредиттерін айландырар оңдайларны нииктирге финанстар министерствозына чахаан. Аны хоостыра республика ӱлгӱлері коммерческай банктар кредиттерін хызырарға кӱстенчелер. Ӧдістің 6,5 миллиард салковайы ла федеральнай бюджеттең алылған кредит нооза, іди ӧӧн чардығы банктарға килісче. Аннаңар, киректі хайди-да тӱзедер ӱчӱн, федеральнай ӱлгӱнің кирексіністерін толдырарға паза банк кредиттерінің процент ставкаларын тудығ чох чабарға кирек.
Хакасияның финанстар министерствозы федеральнай бюджетке мындағ чӧптер пирче. Парыс хоостыра: налогтарға пирілген льготалар ӱчӱн регионнарға компенсация тӧлирге (685 миллион салковай); 2018 чылда транспортха налог льготаларын регионнарға пирбеске (17 миллион салковай); бензинге акцизтерні тударға; 9% ачығ суғларға акцизтің 50% орнына 100% регионнарға пирерге (44 миллион салковай); МФЦ пастыра пирілген полызығларға хазна пошлиназының 50% орнына 70% айландырарға (24 миллион салковай) паза даа пасхазы.
Хорадығлар хоостыра: чал ахчазын ӧскірерінҷе регионнарға компенсациялар кӧр саларға (президенттің чахиин толдырып, регионнарда ӱгретчілернің паза культура тоғынҷыларының чал ахчазы 100% ӧскірілерге кирек, имҷілерге - 200 %, ідӧк 2018 чылда пасха бюджет тоғынҷыларына чал ахчазына 4,5 % индексация иртірерге кирек - 467 миллион салковай); школа пӱдіреріне ікі чыл пирерге (1000 орыннығ школаны пір чылға пӱдірерге маңнанминчалар); ӧкіс олғаннарға чуртха правозын толдырарына ассигнованиелерні ӧскірерге (Хакасияда чурт правозын толдырарға чит парған 2000 пала саналча); льгота имнерін пиреріне хабазарға; регионнар бюджедін тӱзедеріне хоза ахча кӧр саларға; бюджет кредиттеріне ахча кӧр саларға паза даа пасхазы.
Людмила Халтанова федеральнай бюджеттің регионға чахсы паза хомай сариларын таныхтаан. Кӧзідімге, промышленность тилізінің фонды тоғынчатханы - маңат, кічіг паза ортын бизнеске хабазарынҷа программа - хомай. Аның кӧрізінең, идінҷектерге кредитке иң ас-хынах син улуғ городтар синінең алылған, Хакасияа олар киліспинчелер, аннаңар чӧп - кредит синін тӱзірері.
ФЕДЕРАЛЬНАЙ КІННЕҢ ТОҒЫСТЫ УЗАРАДАРҒА
Хакасияның Ӧӧркі Чӧбінің аграрнай сурығларҷа, ас-тамахча паза чирнең тузаланарынҷа комитет кнезі Пётр Ворониннің таниинаң, аал хонииндағыларға кредит проценттерін чабарға субсидия хайди даа кирек. Бюджетче паза налог политиказынҷа комитет кнезі Сергей Комаровтың кӧрізінең, регион бюджедінің парызы ікі чардыхтаң пӱтче: налогтардаң паза дотациялардаң. Аннаңар хайдағ-да хайхастығ кирек пол парарын сағирға кирек чоғыл. Кирек налогтарны чыырынаң тоғынарға паза федеральнай программаларнаң толдыразынаң тузаланарға. Кӧзідімге, Хакасияның ам даа сигіс кӧстегҷе федеральнай программаларға кірҷең оңдайы пар. Ол санда спорт командаларын тимнеҷең кіннерге субсидиялар (Тӧӧ пазы), ис-пайны санға аларын пірге иртірері, чол хонии, сӧп-сапты чох идері, ӱгредіг синін кӧдірері, туризм. Кӧзідімге, «Доступная среда» программа социальнай хабазығ саринаң чуртасха кирілче, ӱгредігде пістің республика чоғыл. 60 регион позының хомай салтарлар кӧзітчеткен школаларына хоза хабазығ киректепче, Хакасияда андағ школалар чоғыл ба?
Мына мындағ сағыстарнаң сыхханнар Хакасияның ӱлгӱ органнары федеральнай бюджетті тӧстиріне. Оларның піреезіне дее хайығ салылза, чахсы полар. Республикадағылар улуғ ізеніснең Надежда Максимовазар кӧрчелер. Алындағы сурыныстарнаң нинҷе тоғынғаннар, хаҷан даа чахсы салтарға килҷеңнерін республика парламентінің депутаттары даа, министрлер дее таныхтапчалар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы