ХАДА-ПІРГЕ ТОҒЫНАР СУРЫҒЛАР ӰЗӰРІЛГЕН
13.10.2017
Хабарлар
Хакасияның пазы Виктор Зимин, Москвада командировкада полып, «Сибирьдегі хара тас энергетика компаниязының (СУЭК) ӧӧн директоры Владимир Рашевскийнең чоохтазығлар апарған. Тоғазығда олар республиканың паза «СУЭК» компанияның аразындағы хада-пірге тоғыстарны тилідер сурығларны ӱзӱргеннер.
- «СУЭК»-тың Хакасиядағы предприятиелерінде республиканың ікі муң азыра чуртағҷызы тоғынча. Компанияның чахсы тоғызынаң оларның сӧбірелерінің чуртазы ла нимес, прай регионның чуртазы палғалыстығ. Анда кӧп программалар толдырыларға кирек. Піс республикаа налог базазын хозар сурығларны ӱзӱргебіс. Ідӧк компания Хакасиядағы хара тас предприятиелерін тилідеріне ікі миллиард салковай инвестиция кирче. «СУЭК»-тың предприятиелері чахсы тилиріне ізенчем, - теен Виктор Зимин.
Тоғазығда Хакасияның пазы, хакас чон родтарының Улуғлар чӧбінің чахиинҷа, «СУЭК» компания республиканың ізестіг партнеры полчатханын таныхтап, Владимир Рашевскийге «Чахсы киректер ӱчӱн» халых орденін читірген.
Устағҷылар ідӧк тиксі Россиядағы шахтерлар олимпиадазын Хакасияда иртірерін паза «БелАЗ» сервис кінін Хакасияда пӱдіріп пастирын ӱзӱргеннер. Анда «СУЭК» компанияның карьер техниказы тыхталар.
Ідӧк Хакасияның пазы Москвада «Русский уголь» АО-ның, «Компания БЕНТОНИТ» ООО-ның устағҷыларынаң тоғасхан.
Саяногорск хоза 220 миллион салковай алар. Андағ чарадығдаңар Хакасияның пазы Виктор Зимин «РУСАЛ» ОК-тың ӧӧн директоры Владислав Соловьевнаң тоғазығда искірген. Ол ахча республика бюджедінең пазағы чылда позыдылар. Ідӧк чағынғы ӱс чылда Саяногорсктағы Ай-Дай орында суғ пирҷең сетьтер пӱдірии апарылар.
2016 чылда «Сибер Ил» чоннар аразындағы форумда Хакасия правительствозының паза РУСАЛ піріктірілген компанияның аразында 2016 - 2019 чылларға чуртас-экономика сферазында хада-пірге тоғынардаңар чӧптезіг иділген. Ол чӧптезіг хоостыра 2017 чылда РУСАЛ регионның чуртас-экономика программазын чуртасха киреріне 190 миллион салковай ызар. Республика, тізең, олох чӧптезіг хоостыра Саяногорскка республика бюджедінең хоза 220 миллион салковай 2018 чылда позыдар.
- Республиканың правительствозы «РУСАЛ» компаниянаң хада-пірге тоғысты пӧзік паалапча, мыннаң мындар андағ тоғыс узарадыларына ізенче, -таныхтаан Виктор Зимин. Ол чӧптезіг хоостыра «РУСАЛ» компания Хакасияа 85 миллион азыра салковай ызыбысхан.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы