ПӰӰЛГІ БЮДЖЕТСЕР АЛЫЗЫҒЛАР КИРІЛЕР
13.10.2017
Хабарлар
Хакасияның Ӧӧркі Чӧп президиумы 11 октябрьда, теестегі чыылиин иртіріп, он артиинаң сурығ кӧрібіскен.
Ӧӧн сурығларның пірсі республиканың пӱӱлгі бюджедінзер алызығлар кирері полған. Чыылығны Хакасияның Ӧӧркі Чӧп кнезінің пастағыі орынҷызыі Юрий Шпигальских апарған.
«Хакас Республиканың 2017 чылға паза 2018-2019 чыллардағы планнығ тусха республика бюджедінеңер законынзар алызығлар кирердеңер» закон проектінең Хакасияның финанстар министрі Ирина Войнова таныстырған. Министрнің искіриинең, пӱӱлгі бюджетсер алызығлар кирері аның парыстары ӧскірілчеткенінең палғалыстығ.
- Тиксі республика бюджедінің парыстары 30 миллион 325 муң салковайға ӧсче, - таныхтаан Ирина Войнова. - Бюджеттің парыстығ чардығының ӧзізі федеральнай кіннең бюджеттер аразындағы трансферттер оңдайынаң кірчеткен ахча сині ӧскірілгенінең палғалыстығ.
Ол ахчаның иң кӧп чардығы, 10 миллион артиинаң салковай, республиканың агропромышленнай комплексін тилітчең программаларын чуртасха киреріне пирілчеткен субсидия. Ідӧк 5 миллионҷа салковайға социальнай полызығлар ӧскірілче, ол ахча алынҷа категорияа кірчеткен кізілерге имнер паза кинек палаларға киректелчеткен имнег ас-тамаан аларына позыдылча.
Ағаа хоза, «РУСАЛ» компания республиканаң пірге тоғынардаңар чӧптезіг хоостыра пӱӱл социальнай кӧстеглерге 98 миллион азыра салковай пирген. Министрнің чооғынаң, ол ахча республиканың имнег туразының имнег оборудованиезін аларына (8 миллион 826 муң салковай), Палыхтығ суғ аалда имнег туразын паза поликлиниканы читіре пӱдіреріне (18 миллион 370 муң салковай), Ӱӱс паза Индіркі Сир аалларда школалар пӱдіриине (61 миллион 199 муң салковай), Асхыста «Афалина» бассейн пӱдіреріне (10 миллион 342 муң салковай) парар.
Салтарында республика бюджедінде ол пӱдіріглерге кӧрілген ахча, ӱзӱрлеліп, пасха кӧстеглерге позыдылар тіп искірген Ирина Войнова. Кӧзідімге, 60 миллион салковай чал ахчазын тӧлиріне парар, 11 миллионҷа салковай - социальнай тӧлеглерге. Паза пу закон проекті хоостыра муниципальнай пӱдістерге хабазығ пирері кӧрілче, ол ахчаның сині - 113 миллион салковай.
Хакасияның финанстар министрі ідӧк Абазада азылчатхан наа предприятиелерге налог льготаларын пирҷең закон проектінең таныстырған. Пу закон Абаза город алнынҷа тиліҷең орыннар (ТОР) санына кір парғанынаң палғалыстығ. Андағ городтарға инвесторлар табар ӱчӱн чахсы льготалар пирҷең оңдай пар.
Республика правительствозы тимнеен закон проектінҷе анда, резидент полып, наа азылған предприятиелер ис-пайға паза парысха налогтардаң 5 чылға позыдылчалар. Ағаа хоза андағы наа предприятиелерге ол тус соонаң 5 чылға парысха налог сині 10% ле полар. Ирина Войнованың искіриинең, Абазада наа предприятиелер тӧстирге сағыс тутчатхан инвесторлар амох табылча. Оларның пірсі ағасты «тирең» тимнеҷең предприятие пӱдірерге пӧгінче, ікінҷізі - молат канаттар сығарҷаң предприятие.
Ӧӧркі Чӧп президиумы правительство кирген закон проекттерін килер сессияда депутаттарның ӱзӱриине сығарарға чарат салған.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы