ХЫРАҶЫЛАРНЫҢ ӰРЕГЛЕРІ САНАЛДЫ
18.10.2017
Хабарлар
Хакасияда октябрьның пастағы кӱннерінде чаған хар хыраҷыларны 345,9 миллион салковайға ӱреге кирген. Улуғ хар тӱскен сылтаанда республикада сағыбаан саай режимі чарлалған. Боград, Шира паза Орджоникидзе аймахтарында тоңастығлар паза азых культуралары хар алтына кір парғаннар.
Хар табырах хайыларын паза хыраҷылар тоңастығларны чыырынҷа тоғысты узарадарларын сағааннар, че чабыра пазылған тоңастығлар паза палғас техниканы хыразар кирерге пирбеен.
Хакасияның аал хонии паза ас-тамах министерствозының паза аймахтарның аал хонии устаныстарының специалисттерінің пірге комиссиязы ӱреге кірген хыраларны санға алған. Ол 38,5 муң гектарға тиңнелген. Ӱрегні санирында хоныхтың хар чаар алнында пір гектарға тиксі хорадығлары санға алылған.
Пасха аймахтарда тоңастығларны чыыры узарадылча. Нинҷе-де кӱн чылығ турған. Іди пӱӱнгі кӱнге Хакасияда 49693 гектарда тоңастығлар кизіл парған. Тиксі культуралардаң 71563 тонна тамах тимнелген. Пу чылға кӧрілген кӧзідімнер 45,6 % толдырылған. Пуғдай ортымахти гектардаң 17,5 центнер сыххан, тиксі 35525 тонна тимнелген.
Хакасияның хоныхтары азых тимнирін тоосчалар. Республикада 140 муң тонна от, 77 муң тонна сенаж паза 36 муң тонна силос тимнелген.
Автор :
Алексей БАИНОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы