«КВАНТОРИУМ» НАА СПЕЦИАЛИСТТЕРНІ ТИМНИРГЕ ПОЛЫЗАР
20.10.2017
Хабарлар
Хакасияда технопарк тӧстиріне федеральнай бюджеттең 57 миллион салковай позыдылған, 24 миллион салковайны республика хосхан. Мындағ улуғ ахчаның тузазы андағох улуғ поларына ікінҷілес чоғыл. Хакасияда инженерлер паза естественнай наукалар специальнозынаң танызар олған кӧп. Іди пайрамға республиканың прай город-аймахтарынаң олғаннар килгеннер. Оларның аразында робототехникаҷа марығларның чиңісчілері полғаннар. Ӱгретчілер паза іҷе-пабалар килгеннерӧк.
Прайзын мында аймах кӧзідіглер сағаан. Наа оңдайлығ оборудованиенің аймаан кӧре, полар туссар кір парған чіли пілдірчеткен.
Технопаркты азып, Хакасияның ӱгредіг паза наука министрі Лариса Гимазутина кванториумның танығлығ клӱзін иң кічіг инженерге читірген. Хайди ол таныхтаан, пеер 5 - 18 частығ олғаннар чӧр поларлар. Наа технопаркта пастағы хаалағлар итчеткен техниктер наа станоктарнаң тоғынарға, квадрокоптарнаң тузаланарға, постарының роботтарын тимнирге ӱгренерлер.
Кванториумның алғым ӱгредіг класстары, лабораториялары, наа оборудованиезі республикабыстың кічіг чуртағҷыларына кӧп наа піліс ағылар. Анда сигіс кӧстегҷе тоғыс апарылар: аэроквантум, автоквантум, робоквантум, биоквантум, геоквантум, IT-квантум, промышленность дизайны, хайтек цех. Прай пу сӧстерні олаңай кізее сидік піліп аларға, че анзынаң, арса, ол амғы тӧлге улам на хынығ.
- Пӱӱнгі олғаннарның кӧбізі робототехниканаң айғазарға хынча. Минің оолғыма тӧрт час, че ол амох роботтар чыырға хынча, - таныхтаан ХТИ-ның англия тілі ӱгретчізі Наталья Чезыбаева. Ол пеер мастер-класс иртірерге килген. Ӱгретчі англия тілін техника пастыра хайди ӱгренерін кӧзіткен. Килген олғаннар мастер-класстарда хынып араласханнар. Ідӧк олар дроннар позытханнар, кӱстіг микроскоптарнаң тоғынғаннар паза даа пасха хынығ техниканаң танысханнар.
Хакасияның хоза ӱгредіг кінінің устағҷызы Галина Жукованың чооғынаң, оларда ла техника кӧстеенҷе 612 олған ӱгренче. Технопаркта ӱгренер олған кӧп, че анда ам даа прай оборудование турғызылбаан. Іди техника кірген хоостыра группалар саны хозылып одырар. Пӧгінде - 2380 олғанны наа специальностьтарҷа тимнирі.
- Мин прай нимені хынып кӧргем. Олғаннарға, тізең, кӧрерге, тутхлирға уламох хынығ, - тіпче Галина Жукова.
Кванториум залында суум-саам турған. Мында ӱгренҷілер, наа техниканы кӧріп, хазыр ӱзӱріг апарғаннар. Оларның аразында кічіг инженерлер харахха тасталғаннар. Ағбанның кічіг чуртағҷызы Миша Чаптыков ӱзінҷі чылы программирование-ең айғасча. Ол чуртазын олох специальностьнаң палғалыс-тырарға сағынча.
- Амғы туста технология уғаа табырах тиліпче, аннаңар аннаң палғалыстығ тоғыстар пӧзік паалалчалар, - тіпче 5 класстағы оолағас.
Мындох аның тоғыстарын кӧрерге чарир полған. Ол позы, роботтарны чыып, оларға программа турғысча. Аның рободы хоосталған кругтардаң банкаларны сығарча. Аны ол кегель-ринг тіп адапча. Сумо-рингте, тізең, ол робот пасха роботты кругтаң сығара ітче.
Миша Болганов, тізең, пу науканаң пір чылҷа ла айғасча, че амох чидіглер кӧзітче. Мишаның рободы кубиктерні ӧң хоостыра чарча. Робот-футболистті ол арғызы Саша Поповнаң хада чыыптыр. Ол робот меспекті хаалхазар кирерге пілче. Олар прайзы компьютер алай телефон пастыра тоғынчалар.
Пу кічіг инженерлерні Ағбанның 14 № школазы тимнептір. Оларнаң ӱгретчілер Татьяна Лопатина паза Дмитрий Гладышев тоғынчалар.
Ідӧк пу кӱнде технопаркта «Наука О+» чииттер конференциязы ирткен. Полған на секцияда мастер-класстар кӧзіділген. Кӧзідімге, промышленность дизайны пӧлікте ӧнетін программа хоостыра хоостап тікчеткен машинаның тоғызынаң таныстырғаннар. Аэроквантумда видеокамералығ квадрокоптарның тузазын, чоохтап, кӧзіткеннер.
Пу технопаркта ӱгренҷілер аймах-пасха саринзар тилирлер, харахха тасталбинчатхан чайаачы оңдайлары даа сығызар. Ол, тізең, оларға мыннаң мындар амғы тус кирексіпчеткен тоғыс табарға полызар.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы