ЧААҶЫ СЛУЖБАЗЫ ЧУРТАСТА КИРЕК ОРЫННЫ ТАБАРҒА ОҢДАЙ ПИРЧЕ
Армияа хығыртығ кампания узарадылча. Пу кӱннерде Ағбанда республиканың чааӌылар комиссариадында оолларның армияа пастағы ӱдезии ирткен. Армияа 20 оол парыбысхан. Оларның 13-і Плесецк городта чаа-хан тигір кӱстерінде (ВКС) служба иртер, читізі — Хызылчарда национальнай гвардияда.
Пайрамнығ ӱдезіг пасталғанда, призывниктер стройы алнынзар Чиңіс знамязының хобырғаны сығарылған, Россия гимні толдырылған.
Пастағы сӧс Хакасия правительствозындағы мобилизация тоғызынӌа комитет кнезі Василий Будылинге пирілген. Василий Васильевич, таңдағы чааӌыларзар, оларның туған-чағыннарынзар айланып, 1 октябрьдаң хығыртығ кампания пасталғанын таныхтаан.
— Пӱӱн — танығлығ кӱн. Призывниктернің пастағы ӧмезі чаацы службазын апарарға чолға сыхча. Піске прайзына пу кӱн уғаа чӱрексіністіг полча. Амғы туста чонда тирігліг кӱстердеңер сағыстар чахсы саринзар алысча. Чааҷы службазы чииттерге кирек. Іди олар чуртастарында кирек орынны таапчалар. Тирігліг кӱстерде ирткен чыл оолларға туза поларына паза армиядаңар оларның чахсы сағыстар халарына ізенчем. Че служба тузында пірее сидіксіністер по- ларох. Сірер пасха оңдайларда чуртирзар. Андағ оңдайларға тимде ползаңар, прай киректерің чахсы полар. Республика пазы чахиинаң, сірерге службаны чахсы иртібізерге алғапчам, — айланған призывниктерзер Василий Будылин.
Ідӧк призывниктерге чылығ сӧстер Хакасиядағы кізі праволарынӌа уполномоченнай Александр Чистотин читірген. Аның чооғынаң, оолларға турғызылған пӧгіннерні хайди даа толдырарға кирек полар. Служба тузында алынған опыт чир-суубысты арачылирында туза полар. Ағаа хоза, призывниктер, служба апарчадып, туған-чағыннарын ундутпин, оларнаң палғалыс сыбыра тударлар. Іди оларнаң ӧріністерінең паза сидіксіністерінең ӱлессіннер.
Ідӧк пайрамнығ ӱдезігде Россияның тирігліг кӱстері паза тыл ветераннарының халых пірігізінің региондағы пӧлиинің кнезі Анатолий Ширяев паза республиканың чааӌылар комиссары Виктор Максимчук чоох тутханнар. Олар таңдағы чааӌылар чахсы командирлер холында ӱгренерге ӱлӱстіг ползыннар паза службаны турыстыра апарзыннар тіп алғааннар. Паба-іӌелеріне ооллары ӱчӱн уйадыстығ полбазын.
Алғыстас сӧстері соонаң призывниктерге туған-чағыннарынаң анымӌохтазып аларға тус пирілген. Тимур Токояков армияа Харатас городтаң хығыртылған. Аны ӱдезерге пабазы Виталий Арсентьевич, іӌезі Оксана Николаевна паза туңмалары Любанаң Глеб килгеннер. Армияа парар алнында, Тимур Ағбандағы пӱдіріг техникумын тоозыбысхан. Амды ол национальнай гвардияда служба иртер. Чааӌы службазы тузында ол чахсы опыт алынып аларға, наа арғыстарнаң танызып аларға сағынча.
— Пір чылға прай киректерім чахсы киліссе, контрактча службада халарға сағынчам, — чоохтапча Тимур.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |