ЧАХСЫ ЧОЛЛАР - ХАКАСИЯНЫҢ ПОҒДАРХАЗЫ ПАЗА ЧОЛҶЫЛАРНЫҢ УЛУҒ ТОҒЫЗЫ
24.10.2017
Хабарлар
ПУ НААДА ХАКАСИЯНЫҢ ӰЛГӰЛЕРІ ОКТЯБРЬДА ТАНЫХТАЛЧАТХАН ІКІ ӰЛӰКӰННІ - ЧОЛ ХОНИИ ТОҒЫНҶЫЛАРЫНЫҢ ПАЗА АВТОТРАНСПОРТ ТОҒЫНҶЫЛАРЫНЫҢ КӰННЕРІН - ПІРІКТІРІП, ЧОЛ ПӰДІРІГҶІЛЕРІН ПАЗА ВОДИТЕЛЬЛЕРНІ ЧЕЕСТЕДІЛЕР. С.П.КАДЫШЕВТІҢ АДЫНАҢ КУЛЬТУРА ПАЗА ЧОН ЧАЙААЧЫЗЫ КІНІНІҢ УЛУҒ ЗАЛ СЦЕНАЗЫНАҢ ХАКАСИЯ ПАЗЫ ВИКТОР ЗИМИН, РЕСПУБЛИКАНЫҢ ТРАНСПОРТ ПАЗА ЧОЛ ХОНИИ МИНИСТРІ АЛЕКСАНДР ПОПОВ ЧОЛ ХОНИИНЫҢ ТОҒЫНҶЫЛАРЫН, ГОРОД-АЙМАХТАРДАҒЫ ПАЗА ОЛАРНЫҢ АРАЗЫНДАҒЫ МАРШРУТТАРҶА ТОҒЫНЧАТХАН ИДІНҶЕКТЕРНІ, ВЕТЕРАННАРНЫ АЛҒЫСТААННАР.
Хакасия пазы Виктор Зимин позының чооғында иң пастағызын республиканың чахсы чолларын паза чолҷыларның аар тоғызын таныхтаан, анаң улуғ нимес сан пиріс иткен. Республикада федеральнай синдегі пір ле чол иртче - «Енисей», че пу чағында Россияның спорт министерствозынаң паза Кемеров облазының пазы Аман Тулеевнең чӧптескен соонаң, Хакасияның ізеніс пар паза nip чолны федеральнай синге кирерге. Чоох парча Пирікчул - Тӧӧ пазы чолдаңар. Ікі чыл аразына мында чолның 8 километрінде асфальт тӧзел парған. Пӧгін турча Тӧӧ пазына теере чолны асфапьтнаң чабарға. Аннаң андар ол чол Писхамҷызар, Палыхтығ суғзар парар. Анда, тізең, Улуғ Ортонзар ырах нимес.
Пу сағысты чуртасха кирерге полызар Тӧӧ пазындағы спорт кініне чоннар аразындағы спорт кіні ат пирері. Аны хоостыра ідӧк улуғ тоғыс апарылча. Спорт кінін читіре пӱдірердеңер чарадығ алылғанох.
Ідӧк республика пазы 2018 чылда Харатастағы, Кӧк хайадағы, Чапаевтегі паза Тазоба пилтіріндегі чолларны тыхтирына паза асфальт тӧзиріне пу чылдағызынаң ікі хати кӧп ахча пирердеңер чарадығ алылғаннаңар искірген. Аның таниинаң, республика ӱлгӱлері аймах кіннеріне паза кічіг аалларға ідӧк хайығ салчалар. Чыл тоозылчатса Виктор Зимин транспорт паза чол хонии министрі Александр Поповнаң хада тыхтағ киректепчеткен чол участоктарын хатап ӱзӱрер, анда тың изел парған чол участоктарын тыхтирға иң пастағылар санына кирерлер.
- Че иң улуғ тоғыс парар транспорт инфраструктуразын чахсыландырарынҷа, - теен республика пазы. - Хара тас анирын чылдаң чылға айныдып одырчатханда, чоллар даа хай-хай пик поларға кирек, аннаңар, сағынчам, республика чолларында наа технологияларнаң тузаланарға кирек. Чоллар аар таарлағ машиналар чӧрізіне сыдассыннар!
Чол пӱдірігҷілеріне, тізең, тоғыс хаҷан даа читче. Майдаң ноябрьға теере республиканың паза муниципальнай пӱдістернің чолларында тыхтағ тоғыстары парча. Хайда-да оймах-тар тӱзеділче, хайда-да, тізең, тиксі орамада асфальт тӧзепчелер. Че иң не хатығ оңдайларда тоғынчалар алтынзархы аймахтардағы паза тайға чиріндегі чолҷылар. Мында хар даа удаа паза кӧп чаапча нооза. Хысхызын тоғыс кӧп.
Пу аар тоғыста пизінҷі чылы істенче Альберт Никитич Албычаков, Таштыптағы ДРСУ-ның грейдер машинизі. Хысхызын ол ӧӧнінде Олең чазы аал чӧбінің чолларын хардаң арығлапча, че кирек полза, чол тыхтапчатхан пӱдіріг управлениезі нандырчатхан пасха даа участоктарзар тоғынарға чӧрче. Кӧзідімге, Кызлас аал чӧбінің чолларын арығлирға. Тоғынҷының нандырығлығ тоғызын аарлапча устағ-пастағ. Пайрамнығ мероприятиеде ол Хакасияның транспорт паза чол хонии министерствозының Аарластығ пічиинең таныхтатхан.
Шира аймаандағы чолларны хайығда тутча Ширадағы ДРСУ, хайда директор орынҷызы полып істенче Александр Леонидович Щетинин. Чол тыхтаҷаң-пӱдірҷең управлениеде 2009 чылдаң сығара тоғынча, ол санда писче чыл чолларны кӧрерінҷе орынҷы полып. Управлениеде прай 100-ке чағын кізі істенчеттір. Устағ-пастағда 10 кізі, пасхазы - техниканаң тоғынчатхан улус паза олаңай тоғысчылар. Оларның санында аар техниканың тінін тут парча 34 частығ машинист Николай Николаевич Янгулов. Предприятиеде ол ӱс ле чыл істен салған, тоғызына нандырығлығ хайчатханы тикке парбаан. Ол министерствоның алғыстас пічиин алған. Щетининге, тізең, Виктор Зимин республика пазының алғыстас пічиин читірген. Ширадағы ДРСУ аймахтағы 429 километр чол ӱчӱн нандырча, ол санда асфальттығ 257 километр чол.
Иң аарластығ сыйыхха - «Трудовая доблесть Хакасии» медальға - пу кӱнде турысхан «Хакасавтодор» хазна учреждениезінің директор орынҷызы Андрей Иванович Будянский. Андрей Иванович чол хониинда 27 чыл істен салған. Чол хонии предприятиелерінең пасха, ідӧк алғыстас пічіктерінең таныхтатханнар городтар аразындағы маршруттарда тоғынчатхан идінҷектер, оларның пірсі Кирилл Геннадьевич Жердев. Идінҷек 2000 чылдаң сығара пассажирлерні тарт чӧрче.
Сыйыхтар, алғыстас сӧстері читірілген соонаң чыылған чонға С.П.Кадышевтің адынаң культура кінінің чайаачы ӧмелері улуғ нимес концерт кӧзіт пиргеннер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы