ЧАЙААЧЫ ТОҒЫСТАРЫНДА - АЛҒАҒ СӦСТЕРІ
25.10.2017
Хабарлар
Улуғ ӱлӱкӱн чағдапчатса, кізілер чағын туғаннарына, арғыстарына, ӧӧрелеріне, хада тоғынчатханнарына сыйыхтар аларға садығ тураларынзар маңзырапчалар. «Ниме сыйлаҷаң?» - пу сурығ полған на кізінің алнында турыбысча. Пірее кізее сыйых сыйлирға сағынчатсабыс, ниме аның кӧңніне кірчеткенін сағысха кирчебіс. Піреезі сыйыхты пос холынаң итче. Андағларның санында Ольга Калмыкова.
Ол школаа даа парғалахха іҷезі аны спицанаң палғирға ӱгрет салған. Пасталығ класстарда ӱгренчеткенде, крючокнаң палғаҷаң. Пастап кӧклӧлеріне кип-азах палғаҷаң. 6 класста ӱгренчеткенде, Ольга позына кӧгенек палғап алған. Спицанаң, крючокнаң палғирға, кип-азах тігерге Ольга «Работница» паза «Крестьянка» журналларҷа ӱгренген. 1990 чылларда Интернет чох полған, аннаңар журналлар, книгалар пастыра палғирға паза тігерге ӱгренҷеңнер.
Ольга Калмыкова Якутиядағы Ленск городта тӧреен, андох школа тоосхан. Школа соонаң сӧбірезінең Хакасиязар кӧс килген. Н.Ф.Катановтың адынаң Хакас хазна университедінзер естественнай наукалар паза математика институдынзар ӱгренерге кірібіскен. Анда ӱгренчеткенде, чайаачы оңдайлығ хыс студент театрында ойнаҷаң паза кибелістер пасчаң, пос туста хоостаҷаң паза кип-азах тікчең. ХГУ-ны тоозыбысханда, Ольга Калмыкова «Линия рекламы» реклама фирмазында дизайнер полып тоғынған. 2009 чылда ол Москвазар чуртирға парыбысхан. Анда ол ідӧк реклама фирмазында дизайнер полған. Москвада чуртапчатханда, тус читпинчеткеннеңер палғирын, тігерін тохтатхан, че хоостирын тастабаан.
2013 чылда Ольга Ағбанзар айланған. Пуох туста Интернетте ойнаҷахтарны амигуруми оңдайынаң хайди палғирын кӧріп алған. Амигуруми - япон чонының улуғ нимес аймах ойнаҷахтар палғирынҷа искусство. Ольга пу оңдайнаң улуғ арах ойнаҷахтар палғап кӧрген. Ойнаҷахтар палғиры аның кӧңніне кірген. Оларны ӧӧрелеріне, туған-чағыннарына сыйлаҷаң. 2016 чылда часхыда «Инстаграм» социальнай сетьте позының группазын тӧстеен, хайдар чайаан тоғыстарын, сомға суурып, сығарҷаң. Олох чылның авгузында Ольга пос киреенең айғазып пастаан, ойнаҷахтарын сат сыххан. Іҷезі Августа Калмыкова Ольгаа пос киреен азарға паза тилідерге чахсы полысча. Пос киреен тилітчең муниципальнай фондтың ахчалығ хабазиин аларына марыға бизнес проектін чахсы тимнеп, чиит идінҷек 300 муң салковай грант алған.
- Пос киреен кізі чалғызан тиліт полбас. Полысчылар хайди даа кирек. Мин чалғызан пос киреен ас полбасчыхпын. Мағаа хабасхан ӱчӱн іҷеме улуғ алғыс. Ниме-де чайиры кӧңніме кірче. Че пічіктер орта тимнирінде паза ахча санирында сидіксінчем, іҷем, тізең, пу сурығларны чахсы пӧк полча, - теен Ольга Калмыкова.
Грант ахчазына чиит идінҷек футболкаларны, чірчелерні сомнарнаң чазаҷаң оборудование паза мебель садызып алған. Кирек ниме-ноолар садызып алғанда, ол хоза садығ пӧлиин азып алған, хайзын «Podarok Company» чайаачы мастерской тіп адап салған. Мастерскойда садығ тасхахтарын, компьютер, оборудование, столлар паза креслолар турғыс салған. Садығ тасхахтарында крючокнаң палғаан ойнаҷахтар, сувенирлер, сомнығ чірчелер, календарьлар турғлапчалар. Ольганың чооғынаң, кізілернің хайиин прай даа ниме тартча. Піреезі ойнаҷахтар садызып алча, хайзы-да, сомнығ футболка кӧр салза, позының сомын ағылып, футболкада ит пирерге чахыпча. Кізілернің хайиин ідӧк календарьлар тартча. Мастерскойда хайдағ даа сомнығ календарь ит пирерге тимделер. Стенее ілҷең календарьлардаң пасха, столда турғысчаң календарьлар пар. Ідӧк мында хынчатхан сомнығ чірче чахып саларға чарир.
- Амғы туста идінҷектер, пос киреен тиліт полбин, хорадыға кір парып, тоғыстарын тохтатчалар. Хайдағ даа пос киреен азарға итсе, кӧп ахча кирек. Пастағы чылларда хорадығлар кӧп полча, парыс кірбинче, аннаңар пірее идінҷектер, парыстан полбин, киректерін чабысчалар. Мағаа даа кӧп хорадынарға килісче. Улуғ городтарда кӧп чон чуртапча, аннаңар идінҷектернің парыстанар оңдайлары алғым арах, - сағыстарынаң ӱлесче идінҷек.
Ольга Калмыкованың чайаачы мастерскойында Анастасия Доценко істенче. Анастасия пӱӱл Н.Ф.Катановтың адынаң Хакас хазна университедінің ӱгретчілер тимнеҷең колледжін тоосхан. Студент тузында Анастасия крючокнаң ойнаҷахтар палғап, Ольга Калмыковаа садыға пирібісчең. Колледжті тоозыбысханда, чиит хыс тоғыс тілеп сыххан. Чайаачы мастерскойзар ӱр нимеске тоғынарға кірібіскен. Че пу тоғыс аның кӧңніне кірчеткеннеңер, ол мында халарға чаратхан.
- Ольга ниме паза хайдағ оңдайнаң чайирын сағынып алча. Мин аның сағызын чуртасха кирчем. Тоғысха наа ла килгенімде, сомнар тимнеҷең программаларнаң тоғынарға пілбеем. Ольга мині ол программаларнаң тоғынарға ӱгрет салған. Амды піс Наа чылға тимненчебіс. 2018 чылға календарьлар, ойнаҷахтар, сувенирлер чайапчабыс. Ідӧк сомға суурынҷаң орын пар, хайда тикке суурынып аларға чарир, - теен Анастасия Доценко.
«Podarok Company» чайаачы мастерскойда полған на кізі килістіре сыйых таап алар. Минің хайиимны тӱстер алғағы тартхан. Аны Анастасия тимнеен. Аның чооғынаң, мындағ талисманны орта тимниріне тал салаазы, харға чӱглері, чіп киректелче. Че чиит ус оларны сувенир оңдайынаң итче. Тал салааларының орнына эмекнең тузаланча.
Ольга Калмыкова пос киреен аннаң андар тилідерге пӧгінче. Амды ӧңніг кип-азахта сомнар итчең оборудование садызып аларға сағынча.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы