СФО-ның ИҢ ЧАХСЫ ХИРУРГТАРЫ - ХАКАСИЯДА
27.10.2017
Хабарлар
Пу неделяда Г.Я.Ремишевскаяның адынаң имнег туразының наа хирургия корпузының актовай залында регионнар аразындағы наука-практикалығ конференция ирткен. Мында Новосибирск облазының, Хызылчар крайының, Хакасия, Тува республикаларның иң артых хирургтары араласханнар. Конференция Хакасияның саблығ имҷізі Надежда Гончарованың пайрамына чарыдылған - 20 октябрьда ағаа 90 час толған. Саблығ хирург хазых хайраллирында 60 азыра чыл тоғын салған.
Надежда Гончарова Украинадағы Фастов городта тӧреен. 1950 чылда ол Томсктағы имнег институдын тоосхан. 5 чыл Ағбандағы имнег туразында педиатр полған, соонаң мындох чуғынҷах ағырығларның пастағы пӧлиинең устаан. 1956 чылда чиит имҷі облвоенкоматтағы курстарны «Хирургия» специальностьча тоосча, ол тустаң сығара хирург полып тоғынча.
1961 чылда Надежда Николаевнаны областьтың имнег туразынзар тоғынарға ысчалар. Анда ол 2016 чылға теере істенген. 1991 - 2001 чылларда Н.Н.Гончарова Хакасияның хазых хайраллаҷаң министерствозының штаттағы нимес ӧӧн хирургы полған. Таныхтирға кирек, ол - Хакас автоном облазының хирургия службазының тӧстегҷізі Фёдор Александрович Гергенредернің ӱгренҷізі. Соонаң улуғ опыттығ, пай пілістіг хирург позы нинҷе-нинҷе чиит имҷіні ӱгреткен, оларға чол асхан.
Надежда Николаевна матлама тоғызы ӱчӱн «Знак почета» орденнең, «За доблестный труд», «Ветеран труда», «За освоение целинных земель» медальларнаң, «Андрей Первозванный» знакнаң таныхтатхан, ідӧк ағаа «Достояние Сибири» аарластығ алтын знактың кавалері, хазых хайраллирының отличнигі, «Почетный житель города Абакана» аарластығ аттар пирілген. Надежда Николаевна, улуғ частығ полза даа, хада тоғынған нанҷыларына удаа полысча - имҷілер андар сурығларнаң айланчалар.
Конференцияны республика имнег туразының ӧӧн имҷізі Алексей Тихонович асхан, олох аны апарған. Иң пурун аарлығ аалҷаа, Надежда Гончароваа, чылығ алғыстас сӧстері, чахайахтар читірілген. Танығлығ кӱннең аны Хакасияның хазых хайраллаҷаң министрі Владимир Костюш, ӱгренҷілері, хада тоғынған арғыстары алғыстааннар. Конференция араласчыларына, тізең, пілістернең алызып, тӱзімніг, тузалығ тоғынарға алғааннар.
Иң пурун чыылысхан чонның алнынзар ӧӧн имҷінің хирургия тоғызынҷа орынҷызы Владимир Борисов сыххан. Ол искіриинде Хакасияның хирургия службазы хайди тӧстелгеннеңер, тархынынаңар, тилізінеңер, пӱӱнгі кӱндегі тоғызынаңар паза алнында турчатхан пӧгіннердеңер чоохтаан.
Республиканың имнег туразының хирургия пӧлии азылғанда, анда 6 имҷі тоғынған полза, амды мында 39 хирург істенче. 2-ҷі хирургия корпузы тоғынып пастааннаң имҷілер алнында наа оңдайлар азылған. Пӱӱнгі кӱнде мында хирургия профильінҷе 7 пӧлік тоғынча, ол санда нейрохирургия, тамырлар хирургиязы, травматология паза ортопедия пӧліктері. Амғы туста оларда тиксі 179 орын саналча. 2018 чылда гинекология пӧлии азылар тіп кӧрілче.
Чыл сай хирургтар иртірген операцияларның саны ӧзіп одырча. Анзына улуғ хозым полча амғы тустың кирексіністеріне килістіре, пӧзік технологиялығ оборудование алылчатханы. Мындағ оборудование полызиинаң операцияларны наа, хазыхха хорғыс асхынах ағылчатхан оңдайларнаң апарарға чарир. Таныхтирға кирек, пӱӱнгі кӱнде «Телемедицина» проект ӧткін тиліпче. Ол имҷілерге компьютерҷе видео палғалыс пастыра пасха-пасха городтарда иртчеткен операцияларны кӧріп алар, мастер-класстарда аралазар паза хазнабыстың улуғ имнег кіннерінің пӧзік квалификациялығ специалисттерінең чӧптезіп алар оңдай пирче.
Ідӧк конференцияда хирургтарның ӱгредиин, квалификациязын кӧдірер, кізілерні имнирінде наа оңдайларнаң, оборудованиенең тузаланар сурығлар кӧдірілгеннер. Іди искіріглернең сыхханнар хирург, имнег наукаларының докторы, профессор, Новосибирсктегі хазна имнег университедінің хирургия кафедразының устағҷызы Владимир Анищенко; имнег наукаларының докторы, профессор, Хызылчардағы хазна имнег университедінің хирургия ағырығлары кафедразының устағҷызы Дмитрий Черданцев паза пасхазы даа. Чоох тутчатханнарның полғанын на залдағылар ситкіп исчеткеннер, искіріглері соонаң сурығлар пир турғаннар.
Конференция имҷілерге, хирургияның ағырсымнығ сурығларына чарыдылған. Че, андағ даа полза, пӧзік пілістіг, тоғыстарына хынчатхан, профессиязына чуртазын пир салған кізілерні истерге уғаа хынығ полған. Искіріглердең пілдістіг, амғы туста тиксі имнег кирее алнынзар улуғ хаалағ идібіскен. Мының алнында имнелбинчеткен тіп саналҷаң ағырығларнаң пӱӱнгі кӱнде чахсы салтарлығ харбасчалар. Че, андағ даа полза, тиліҷең оңдайлар ам даа пар. Аннаңар мындағ тоғазығлар, оларны таап, имҷілерге кізілернің хазиин хайраллирында пӧзік чидіглерге чидерге полысчалар тіп сағынчам.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы