КІЗІ ПАЗА АНЫҢ ИБІРКІЗІ
31.10.2017
Хабарлар
Хакасияның ӧӧн музейінде чапсых кӧзідіг азылған. Ол «Кізі паза аның ибіркiзі» адалча. Пу кӧзідіг - чоннар аразындағы проект. Аны В.И.Суриковтың адынаң Хызылчардағы хоос музейі паза «АйнАгtа» галерея Россиядағы Израильнің посольствозы полызиинаң тимнептірлер.
Тиксі алза, кӧзідіге 123 хоос сығарылған. Олардаңар кӧрігҷілерге, экскурсия иртіріп, Хызылчардағы хоос музейі директорының орынҷызы Анастасия Кистова чоохтап пирген. Экспозиция ікі чардыхтаң пӱткен. Пастағызында Михаил Моргенштерннің, Михаил Яхилевичтің паза Сергей Теряевтің тоғыстарын кӧрерге чарир. Чайаачы устар частарынаң тиңнер, олар 1950 чылларда СССР-да тӧрееннер. Вузтар тоозып, улуғ чидіге читкеннер. Че 1990 чылларда олар Израильзер кӧс парыбысханнар. Кӧзідіге хоосчыларның аймах туста чайалған тоғыстары сығарылған.
Экскурсия Михаил Моргенштерннің хоостарынаң пасталған. Аның хоостары импрессионизм кӧстегҷе чайалған тиирге чарир. Сомнап салған кізілернің омалары хоосталбан, че, іди дее полза, оларның кӧңнін чайаачы ус чахсы кӧзіт пирген. «Свадебное шествие» тоғыста чиит хыс ирге парча, аның хыринда іҷе-пабазы турча. Олар сағыссырапчалар: палаларының чуртазы килізер бе. Пу тоғыста М.Л.Моргенштерн позының хызының тойын хоостап салтыр. «Пианист» хооста піс чиит музыкантты кӧрчебіс. Пианинонаң ойнап, ол хайдағ-да сағысха тӱзібістір. Минің кӧрізімнең, хоосчының тоғыстарынаң «Пурунғы Молҷағны» чазирға кирек. Тиктең нимес аны Рембрандтнаң тиңнестірчелер.
М.Моргенштерннің чайаачызында ӧӧні кізі паза аның сағыстары полчатса, кӧзідігнің ікінҷі араласчызы Михаил Яхилевичтің хоостары саңай пасха оңдайлығ. Улуғ планетада кічіг кізілер чуртапчалар. Пу чир ӱстӱнде олар чалғызаннар. Хоостарда кӧзіділ парған хумнығ чазы, ағастар чох тағлар чалғыс кізінің чобаан уламох чахсы чарытчалар. Анастасия Кистованың таниинаң, Михаил Яхилевичке хырығ озариндағы чуртасха кӧнігерге сидік полтыр. Пу тоғыстарда ол позының кӧңнін паза амғы тӧлнің оңдайын кӧзіт пирген. Оларның кӧбізі, удур-тӧдір пілізерге хынмин, пос алынҷа тудынча. Анаң чалғыс постары балконнаң хонҷыхтарын харахсын чӧрчелер.
Кӧрігҷілернің хайиин Сергей Теряевтің портреттері тартханнар. Улуғ нимес хоостарда чиит абахай ипчілернің омалары сомнал партыр. Тоғыстарны хоосчы чахығ хоостыра чайапчаттыр. Ідӧк экспозицияда Сергей Теряевтің 1970 паза 1980 чыллардағы тоғыстары пар, ол акварельнең абстракционизм кӧстегҷе хоостаҷаң полтыр. Акварель хоостарны критиктер пӧзік паалапчалар. Сизінгенде, чайаачы ус Израильзер чуртирға парыбысханына хомзынчаттыр. Кӧні чоохтаза, Сергей Теряевтің совет тузындағы тоғыстары хай-хай артых, аннаңар чуртаҷаң чирін алыстырар алнында чахсы сағынып аларға кирек.
Кӧзідігнің ікінҷі чардығында Хызылчардағы хоосчыларның тоғыстарын кӧрерге чарир. Чайаачы ипчілер кӱстерін аймах жанрларда сынапчалар. Елена Лихацкаянаң Ирина Верпетаа неопримитивизм кӧстег чағын полтыр. Оларның тоғыстарын пастағызын на кӧрзең, піди пала даа хоостап полар тіп сағынчазың. Сынында ипчілернің узы пӧзік, хоостарында, тізең, тирең сағыс.
Пасха оңдайнаң Румяна Внукова тоғынча. Аның тоғыстарында часкалығ олған тузы («Хубанах» хоос), чалахай чайғы («Чайғы ирт парды...») сомнал партыр. Чайаачы ус чуртастың сілиине хайхапча, ағаа ӧкерсінче.
Кӧзідігнің халғанҷы араласчызы якут чонның хызы Анна Осипова полча. Чиит ипчі ӱгредіг пӧгіннең 2013 чылдаң сығара Хызылчарда чуртапча. Аның хоостары чарых сырларнаң танығлығ. Кӧрігҷілернің кӧңніне «Родтың кӱзі» тоғыс кірген. Одырчатхан якут оолағастың кистінде родтың худы кӧрінче. Харлығ тағларны чи Анна Осипова хайди хандыра хоостап салған. Ідӧк кізіні «Носорог» паза «Энесай» хоостар таңнатчалар. Оларны чайаачы ус неоархаика кӧстегҷе хоостаан. «Байкалдаңар ыр» триптих - чӱрек кӧӧретчеткен тоғыс. Улуғ кӧл хазында чиит лама сарнап одырча, аннаң ырах ниместе аттар оттап чӧрчелер. Чуртас хайхастығ ниме, кізее часкалығ поларға кӧп ниме киректелбинче.
«Кізі паза аның ибіркізі» кӧзідіге сығарылған хоостарны маңзырабин кӧрерге кирек. Полған на хоосчының позының сағыс-кӧрізі, оларның тоғыстары пастыра пар нимее ӧрінерге, таңдағызынзар ізеніснең кӧрерге ӱгренчезің. Кӧзідіг 2018 чылның 15 январьына теере тоғынар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы