САБЛЫҒ ХООСЧЫ «ТУРАЗЫНЗАР АЙЛАНҒАН"
03.11.2017
Хабарлар
Пу наада Ағбанда саблығ хакас хоосчы Михаил Бурнаковха хумартхы чарды азылған.
Ол Советскай орамадағы 32 № турада хызылған, анда хоосчы чуртаан паза істенген. Михаил Бурнаковха хумартхы чарды азар сағыснаң сыхханнар чайаачы устың пиҷезі Евдокия Бурнакова паза хакас чонының Улуғлар чӧбі.
М.А.Бурнаковха чарыдылған барельефті азарында Хакасияның культура министрі Татьяна Чаптыкова араласхан. Ол хоосчы чуртаан туразар чыылған чонны мындағ танығлығ кирекнең алғыстаан:
- Піс Михаил Бурнаков осхас саблығ кізілерібісті хайди даа сағыста ал чӧрерге кирекпіс. Пу турада хумартхы чарды хызылғаны - улуғ часка. Хыринҷа иртчеткен чон, ол чардыны кӧріп, хоосчыны сағысха кир турар. Чиит тӧл, тізең, кем полған Михаил Андреевич Бурнаков, нименең ол сабланған, хайдағ хоостар пасхан тіп пілерге харазар.
Хумартхы чардыны скульптор, кӧгҷі, хайҷы, композитор, «Ӱлгер» ансамбльның устағҷызы Вячеслав Кученов чайаан.
- Мағаа улуғ ӱлӱс тӱскен Михаил Андреевиче хумартхы чардыны чайирға. Ӱгренҷі тузымдох, соонаң студент пол парып, аның тоғыстарынзар улуғ улуғласнаң кӧрҷеңмін, аның хоостары мині аптааннар. Пу тоғысты ӱр тус толдырғам. Портреді ағаа тӧӧй полар ӱчӱн, сигіс айҷа тоғынғам. Хоосчының пиҷелері полысханнар: олар тӧӧй тіп киречілебеенде, тоғызымны тохтатпаам.
Евдокия Бурнакова хумартхы чарды хызарға полысхан чонны прайзын алғыстаан, ол санда республиканың культура министерствозын, Ағбан мэрі Николай Булакинні, город чӧбінің кнезі Альберт Тупикинні паза Улуғлар чӧбінің кнес орынҷызы Владислав Торосовты.
- Пір саринаң, Бурнаковтарға пу чобағлығ кӱн: 40 чыл мының алнында, 21 октябрьда 1977 чылда, минің харындазым Михаил Андреевич Бурнаков, 44 чазын апарчадып, ах чарыхтаң парыбысхан. Че пасха саринаң, пу ӧріністіг кӱн, аны улуғлапчалар, ундутпинчалар, - таныхтаан хоосчының пиҷезі.
Автор :
Ксения СОЛДАТОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы