ААЛЛАРДА ПӰДІРІГ СУРЫҒЛАРЫН ИПТИРГЕ КИРЕК
08.11.2017
Хабарлар
Республиканың правительство туразында Хакасияның орындағы пос устаныс органнарының пӱдіріг сферазындағы полномочиелерін чуртасха кирер сурығҷа (ол санда аалларның ӧӧн планнарын чарадарынҷа) чыылығ ирткен. Анда араласханнар министерство-ведомстволарның устағҷылары, Ӧӧркі Чӧп президиумының кізілері, муниципальнай пӱдістер пастары, муниципальнай аймахтарның депутаттар чӧптерінің кнестері. Чыылығны Хакасияның Ӧӧркі Чӧп кнезінің пастағы орынҷызы Юрий Шпигальских апарған.
Хайди Юрий Александрович таныхтаан, Хакасияда чир, пӱдіріг сурығлары сидік пӧгілче. Кізілер, пӱдіріп алған тураларын, андағы чирні собственностьха ал полбин, ирееленчелер. Сығысчатхан таластығ аймах сурығларны чарғы пастыра чарадарға килісче. Закон хоостыра аалларда пӱдіріг киреенҷе ӧӧн планнар поларға, оларны чарат саларға кирек. Аалларға хайдағ полномочиелер пу сферада пирілчеткеннеңер республиканың законында кӧзіділче. Ол сурығ амға теере орнынаң тибіребинче. Муниципальнай аймахтарда андағ сурығларны чарадарға киректер. Аймахтар паза ааллар постарының аразында ӧӧн планҷа полномочиелерні ӱлестір турзыннар. Прай ол сурығлар пӧгілзе, орыннардағы бюджеттерге хоза парыс кірер, чурт пӱдірер сурығ пӧгілер. Че аал чӧптеріне прай инфраструктураны тимге сығарарға кирек полар.
Ӧӧркі Чӧп кнезінің орынҷызы, бюджетче комитет кнезі Сергей Комаровтың чооғынаң, прай пу сурығлар орындағы пос устаныс органнарының тоғызына кірчелер. Правительство оларға ахчанаң хабасча. Чурт алай пасха даа кирек ниме-ноолар пӱдірініп алған кізілерге ол пӱдіріглерге собственность правозын идіп аларға киректелче. Андада ла олар аны, сыйлап, сат поларлар. Ідӧк удаа фермерлерге банкта кредит аларға собственностьтағы пӱдірігні залогка пирерге килісче. Мында чирнең тузаланар правилоларҷа тудынарға кирек, ағаа аалдағы ӧӧн план киректелче. Кізі кирек пічіктер тимнирге аал чӧбінзер айланча, анда аны аймах кінінзер ысчалар, аймахта даа аның киреен чарат полбинчалар. Ӧӧн план аалда хайди даа пар поларға кирек, ол сыбыра алысча. Чурт пӱдірінерге пирілчеткен чирлер тӧреміл сыныхтағда тудылзыннар. Кізі чирні собственностьха алып алза, налог органында ол чирнің статузы алысча, орындағы бюджетке хоза парыс кірче.
Ағбан пилтіріндегі Тазоба пилтірі аал чӧбінде чирні чурт пӱдірінерге пирер сурығларҷа кӧп таластар сығысча. Анда ӧӧн план даа тимнелбеен. Хайди чоохтааннар чыылығ араласчылары, наа ӧӧн план тимнирге кӧп тус киректелче, ағаа ідӧк илееде ахча хорадылча.
Аннаңар позының сағызынаң Пии аймаа муниципальнай пӱдістің пазы Юрий Курлаев ӱлескен:
- Минің кӧрізімнең, ааллардағы амғы иргі ӧӧн планны чарат саларға кирек. Анаң андар кирек алызығлар кир турарға. Чуртас алысча, аны хоостыра ӧӧн планға алызығлар кирілер. Іди ахча даа, тус таа ӱзӱрлелер. Мында ӧӧні - муниципальнай аймахтарға, аал чӧптерін хыйа итпин, оларнаң хада-пірге тоғынарға, прай сурығларны чӧптезіп пӧгерге. Аал чӧптері постарының техническай сурығларын тимнирлер, андағ оңдайнаң прай киректерҷе полномочиелер ӱлестірілер.
Пу орыннардағы прайзына кирек сурығларны ӱзӱрерінде муниципалитеттер пастары, депутаттар чӧптерінің кнестері, административнай органнарның устағҷылары араласханнар. Прай ӱзӱріглер тоозылғанда, Юрий Шпигальских муниципальнай аймахтар пастарына паза муниципальнай аймахтарның депутаттар чӧптерінің кнестеріне алынҷа чӧптер чаҷында читірген. Анда хысхаҷахти чоохталча:
«Хакасияның Ӧӧркі Чӧбінзер орындағы пос устаныс органнарынаң кӧп айланыстар кірчеткені хоостыра, Оӧркі Чӧп Россияның Хазна Думазының федеративнай пӱдісче паза орындағы пос устаныс сурығларынҷа комитедінзер муниципальнай аймахтарның орындағы пос устаныс органнарының пӱдіріг сферазындағы тоғысты хайди апарарын чарыт пирерге айланған.
Комитет ол сурығларны чарыт пирген. Федеральнай закон хоостыра, городтарда позының ӧӧн планын город позы чаратча. Муниципальнай аймахтардағы чирлерде ол сурығларны орындағы пос устаныс органнары пӧкчелер. Хакасияның «Хакас Республикада орындағы алынҷа сурығларны аалларға пир салардаңар» 84-ЗРХ законы хоостыра, аалның ӧӧн планын чарадары аалларның орындағы сурығларына кирілбеен.
Андағ оңдайнаң, орындағы пу сурығны пӧгер прай полномочиелер муниципальнай аймахтың орындағы пос устаныс органнарынаң пӧгілерге кирек. Муниципальнай аймахха аалның ӧӧн планын чарадардаңар позының нормативной право актын тимнеп аларға кирек. Ӧӧн план Россияның Пӱдіріг кодексіне килістіре ползын. Андада аалда алылған иргі нормативнай право актын чох идерге киректелер.
Ідӧк муниципальнай аймахтың орындағы пос устаныс органнары аймахха кірчеткен алынҷа аалларның орындағы пос устаныс органнарынаң позының пірее полномочиелерін орындағы сурығларны пӧгерге (ол санда пӱдіріг сферазында) пир салардаңар чӧптезіг идіп алар праволығлар. Анзы бюджеттер аразындағы трансферттер хоостыра муниципальнай аймах бюджедінең аал бюджедіне ахча пирерінҷе пӧгілче».
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы