БЮДЖЕТТІҢ ПОС ПАРЫСТАРЫН ӦСКІРЕРГЕ
10.11.2017
Хабарлар
Киҷее Хакасияның пазы Виктор Зимин правительство чыылиин иртірген. Чыылығ Москвазар тоғыс чорығының салтарларына, республиканың таңдағы пӧгіннеріне паза аал хонии тоғыстарына чарыдылған.
Регион устағҷызы министрлер кабинедінің чыылиин ахча суриинаң пастаан. Виктор Михайлович ӱр ниместе Хакасияа хоза ахчалығ полызығ пирер сурығҷа Москвазар чӧрген нооза. Ол чорыхтың ӧӧн салтарларының пірсі - республикаа федеральнай бюджеттең 9,6 миллиард салковай пирілері.
- Хакасияа пирілчеткен ахчалығ полызығ сині иң улуғ - 9 миллиард 640 миллион салковай, - искірген Хакасия пазы. - Піске аның алнында 4,7 миллиард салковай, анаң 1,3 миллиард салковай полызығ пирілгенін санға алза, тиксі 16 миллиардча салковай пол парча. Регионнар аразында ол иң улуғ син.
Хайди таныхтаан Виктор Зимин, пістің регион хазна алымын олаңай ла нимес ӧскірген. Аның ӧӧн сылтаа - республика промышленность сығарызын ӧскірерінҷе тоғынғаны. Аннаңар федеральнай ӱлгӱлер, республика пу кӧстегҷе хайдағ хаалағлар иткенін санға алып, мындағ хабазығ пирерге чаратханнар.
Аның ӱчӱн Хакасияның пазы Россия президенті Владимир Путинге, премьер-министр Дмитрий Медведевке, хазнаның финанстар министріне паза Хазна Думазының бюджетче комитет кнезіне улуғ алғызын читірген.
Хакасия пазының искіриинең, пирілчеткен ахча регионның хазна алымының пӱдізін алыстырыбызарға паза проценттер тӧлеҷең хорадығларны хызырыбызарға оңдай пирер.
- 14,5 миллиард чарымҷа салковай коммерческай кредиттерні алыстырарына парар, олар чылда 0,1% полчатхан бюджет кредиттеріне алыстырыларлар, - таныхтаан Виктор Зимин. - Оларны ла хоостыра республика бюджеді чыл сай 2 миллиардча салковай ӱзӱрлир.
Ӱзӱрлелген ахча социальнай пӧгіннерні толдырарына парар: чал ахчазына, социальнай пособиелерге паза пасха даа тӧлеглерге. Ідӧк чардығы коммерческай кредиттер синін хызырарына. Федеральнай бюджеттең пирілчеткен ахча полызиинаң хазна алымындағы бюджет кредиттері сині 10%-тең 70 %-ке теере ӧс парар. Чарыда чоохтаза, бюджет кредиттері 70% полар, коммерческай кредиттер - 30%.
Олох туста Хакасияның пазы ӧӧн пӧгіннерні таныхтаан, хайзыларына регионның паза муниципальнай ӱлгӱ органнарына амды хайығ саларға кирек.
- Хати чоохтапчам, Россияның финанстар министерствозынаң чӧптезігҷе республикаа пу чылда пос парыстарын 2 миллиард салковайға ӧскірібізерге киректелче, - теен регион устағҷызы. -2018 чылда, тізең, бюджет парыстарының ӧзізі пӱӱлгінинең азарға кирек. Олох туста алынҷа хайығ промышленность сығарызы паза чыылчатхан налогтар синін ӧскіреріне салылар. Ол пӧгін республика правительствозына паза муниципальнай пӱдістернің пастарына иң ӧӧні полча.
Министрлер кабинедіне пӧгін турғызылған - бюджетсер хоза ахча кирер тоғыста ӧткін аралазарға, гранттар алчатхан регионнар санына кіріп аларға. Мында чоох парча чуртас-экономика тилізінҷе иң чахсы кӧзідімнерге читкен регионнарға трансферт оңдайынаң пирілчеткен гранттардаңар. Федеральнай бюджетте ол гранттарның тиксі сині амды 20 миллиард салковайға чит партыр, полған - 5 миллиард салковай.
Паза Виктор Зимин Хакасияның финанстар министрі Ирина Войноваа чахығлар пирген. Оларның пірсі - килер чылға республика бюджедінің дефициді 10%-тең аспазын. Ідӧк республика пазы чыл тоозылчатса бюджетниктерге декабрь ӱчӱн аванс ахчазын кӧп арах тӧлирге чахаан.
Регион пазы алынҷа чоох апарған Хызылчар крайынаң, Туванаң чуртас-экономика паза культура сурығларынҷа пірге тоғынардаңар. Хайди таныхтаан ол, пістің регионнарны кӧп ниме піріктірче, аннаңар хада тоғынарға кирек.
- Піске хонҷых регионнарнаң пірге тоғынарға, кӱстенізібісті піріктірерге кирек. Пістің дее, оларның даа сатчаң нимелер кӧп. Хакасия улуғ садығ орны чіли пол поларҷых, - теен Хакасияның пазы.
Аның соонаң аал хонии министрі Александр Башков ас кизер паза малға азырал тимнир тоғыстың салтарларынаңар искірген. Республикада 160 муң тонна от сабылтыр (ирткен чылда -157 муң тонна), 41 муң тонна силос тимнелтір (ирткен чылдағызынаң 10 муң тоннаа кӧп). Тоңастығларҷа кирек сала уйан - 100 муң тоннаҷа ла кизілген (ирткен чылда -150 муң тонна). Че анзы хар ирте чаап парғанынаң сылтағлығ.
Чыылығда Виктор Зимин прай устағҷыларға чуртағҷыларның айланыстарынҷа тоғынарын кӧдірерге чахығ пирген.
- Анда кӧп сурығ, хайзын олаңай ла пӧгібізерге чарир. Че пірее чиновник оларны даа пӧгерге ынанминча, - искірген республика пазы.
Ідӧк Хакасияның пазы тӱрчедең кӧні палғалыс иртердеңер сизіндірген паза прай министрлерге аның тоғызында ӧткін аралазарға чахаан.
- Ол пиар нимес, ол - чуртағҷыларнаң палғалыс тудары. Айланыстарға хайбинчатхан чиновниктерні пу палғалыс пастыра «имнирге» чарир,- таныхтаан Виктор Зимин, чыылығ тоғызын тоозып.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы