«ЧАС ХАНАТТЫҢ» ИРКЕҶЕКТЕРІ СЫЙЫХТЫҒ АЙЛАНДЫЛАР
14.11.2017
Хабарлар
Новосибирскте 3-5 ноябрьда олғаннарның, чииттернiң,улуғларның чайаачы ӧмелерінің «Адмирал чылтызы» чоннар аразындағы 65-ҷі фестиваль-марии ирткен. Пістің республика ӱчӱн «Час ханат» олған эстрада паза теелбек студиязы турысхан.
Таныхтирға кирек, палалар ибзер пӧзік сыйыхтар ағылғаннар. «Олғаннар теелбегі» номинацияда «Сойан саңыҷахтары» теелбек ӱчӱн I степеньніг дипломнаң сыйыхтатханнар. Ідӧк 5 - 7 частығ олғаннарның аразында «Мода театры» номинацияҷа марығ ирткен. Пістіңнер, «Хакасияда аалҷы полыңар» ойын турғызып, пастағы орын алғаннар.
«Эстрада вокалы» марығда 11 - 13 частығлар аразында Денис Индыгашев, сарынны пӧзік синде толдырып, ідӧк I степеньніг дипломант полыбысхан. Оолағас «Пуланнығ кӧл» ырны толдырған. 5 частығ Виктория Гулакова «Кӧклӧ» сарынны ачыныстығ ырлаан, ағаа II степеньніг диплом пирілген.
6 частығ Алина Ивандаева «Час ханат» эстрада паза теелбек студиязынзар ікінҷі чылы чӧрче, иң кічіглер ӧмезінде теелбектенче. Пасха регионзар марыға ол пастағызын на чӧр килді.
- «Час ханат» студияда теелбектеніп, кічіглернің ӧмезі республиканың культура туразында, олған садтарында паза школаларда чон алнынзар сыххан, - чоохтаан Алинаның іҷезі Оксана Геннадьевна. - Ағбанның сценаларынаң пасха палаларыбыс Асхыссар чӧр килгеннер. Хызыҷаам пасха регионзар пастағызын на пар килді.
Мындағ фестиваль-марығда араласчатханнары уғаа махтағлығ, уламох пӧзік сыйыхха турысчатсалар. Че прай даа іҷелер, палаларын ӱдезіп, чӱрексееннер. Кічіг олғанны ибдең ырах ызарға чочыныстығ нооза.
Марыға тимненіс хатығ парған. Пістің хореограф Алёна Сергеевна Тимофеева полча. Мин іҷе-пабаларның адынаң, палаларыбысты чолға иптіг, хорғыс чох апар килгеннері ӱчӱн, устағҷыларға алғыс читірчем.
Новосибирсксер олғаннарны «Час ханат» студияның вокал ӱгретчізі Светлана Аткнина, хореограф Алёна Тимофеева паза хай пірее іҷелер апарғаннар.
2 ноябрьда Ағбанда поездке одырып, ікінҷі кӱнінде андар читкеннер. Палаҷахтарға гостиницада чуртирға чапсых полған. Улуғлар оларны аквапарксар апар килгеннер, анда кічіглер суғда матап сомып алтырлар.
- Олғаннарыбысты марығларға ал чӧрерге кирек ле, - чоохтапча Светлана Михайловна. - Іҷе-пабалар піске удур парчалар. Каникуллар тузында иртірілчеткен фестивальларға часхы-кӱскӱ туста чӧредірбіс. Кӱскӱде піс Сибирьдегі городтарзар, ырах нимес пар килер оңдай таапчабыс.
«Адмирал чылтызы» фестиваль-марығ чыл сай Россияның аймах городтарында иртірілче. Мының алнында ол Магнитогорскта, Тюменьде, Барнаулда, Пермьде паза пасха даа городтарда полған. Новосибирске 65-ҷі хати ирт парды. Пілдістіг, чайаачы ӧмелер аразындағы марығда уғаа кӧп чон араласхан. Новосибирск, Хызылчар городтардаң кӧп ӧме полған.
3- 5, 5 - 7 частығлар паза олардаң улуғлар аймах номинацияларда посты кӧзіткеннер. Кинек олғаннар паза улуғлар даа араласчалар. Оларны кӧрерге, истерге уғаа чӱрексіністіг.
Марығны пӧзік профессионал жюри паалаан. Кӧзідімге, Россияның саблығ артизі Алла Аркадьевна Фортэ анда полған. Ол опера паза эстрада ырларын толдырча. Ӧӧнінде искусство алай музыка школаларында ӱгренчеткен олғаннар араласчалар. Олар кӧглерні пӧзік синде толдырчалар, чахсы тимненіс кӧзітчелер.
Пістің палалар, тізең, вокал даа, теелбек тее, мода даа номинацияларында посты турыстығ кӧзіткеннер. Че сценада артист чіли тудынар оңдайыбысты ам даа тилідерге кирек.
Светлана Михайловна сарыннар толдырчатхан Вика Гулаковадаңар чоохтаан. Хакас хызыҷахты іҷе-пабазы кӧг уроктарына Пуланнығ кӧл аалдаң Ағбанзар ағылчаттыр. «Кӧклӧ» сарынны ӱгрен салып, хызыҷах аны фестиваль-марығда чахсы толдырған.
Денис Индыгашевті 3 чыл мының алнында чайалған «Пуланнығ кӧл» сарын «сағыптыр». Пу ыр олған тынағ лагерьінеңер. «Час ханат» студияның ӱгретчілері палаларнаң хада, наа сарыннарны паза теелбектерні тимнеп, мындағ марығларда аралазарға кӱстенчелер.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы