ЧЫЛ САЛТАРЛАРЫНА ЧАРЫДЫЛҒАН ЧЫЫЛЫҒ
15.11.2017
Хабарлар
Ағбанда тиксі Россияның «Россия ӱчӱн» чон фронты» халых чӧрімінің Хакасиядағы пӧлиинің теестегі конференциязы ирткен. ОНФ кізілерінең пасха, аның тоғызында Хакасия пазының пастағы орынҷызының тоғызын толдырчатхан Олег Нам, администрацияның устағҷызы Валерий Денщиков, республиканың национальнай паза территориальнай политика министрі Михаил Побызаков, пасха ӱлгӱ органнарының, халых организацияларының кізілері, идінҷектер, чииттер араласханнар.
Иң пурун чыылығның кнезі, хачызы, сананыс комиссиязы табылған. Анаң араласчылар алнынзар Олег Нам сыххан. Ол Хакасия пазы Виктор Зиминнің паза позының адынаң, чыылысхан чонны удурлап, конференцияның тоғызы тӱзімніг иртсін тіп алғаан. Ідӧк Олег Валерьевич мында кӧдірілген сурығлар, хада-пірге тоғынған сылтаанда, чағынғы туста пӧгіл парарына ізенізінең ӱлескен.
Чыл сай иртірілчеткен конференцияда ОНФ-тың иң артых кізілерін таныхтапчалар. Пӱӱл дее Хакасиядағы халых чон фронты исполкомының пазы Анатолий Сунчугашев халых чуртазының ӧткін араласчыларына алғыстас пічіктерін читірген.
Конференцияның пайрамнығ чардығы тоозылғанда, сурығларны ӱзӱріп пастааннар. Чыылығ кнезі Александр Профатиловтың таниинаң, ирткен чылдағы конференция салтарлары хоостыра Хакасия пазына 12 халых айланызы ызылған. 2017 чылның 13 апрельінде Виктор Зимин нандырығлығ министерство-ведомстволар устағҷыларына оларны пӧгерінеңер чахығлар пирген. Амғы тусха 12 айланыстың 7-зі толдыразынаң пӧгіл парған, 3-і чардыхти толдырылған, 2-зі пӧгілгелек. Ідӧк Александр Дмитриевич ОНФ-тың 2017 чылда чуртасха кирілген проекттерінеңер чоохтаан, оларның аразында - «Чол инспекциязы», «Город ибіркізі чахсыландырылчатханын хайығда тудары».
Чыылығда Россия президентінің майдағы чахығлары хайди толдырылчатханынаңар алынҷа чоох парған. ОНФ кізілері республиканың имнег учреждениелерінде имнег полызии хайди пирілчеткеніне, школа алнындағы паза тиксі ӱгредіг учреждениелерінде ӱгредіг хайди апарылчатханына, «Доступная среда» программаның тоғызына паза халых чуртазының пасха даа сариларына хайығ айландырғаннар. Чооғын тоозып, Александр Профатилов Хакасия пазына 2018 чылға 14 халых айланызы тимнелген тіп искірген, пу чағында олар республика пазына ызылар.
Кнестің соонаң ОНФ-тың тоғысчы ӧмелерінің устағҷылары искіріглерінең сыхханнар. Олар пӱӱл апарылған тоғыстың салтарларынаңар чоохтааннар. Хайди таныхталған, министерство-ведомстволар устағ-пастаа пар сидіксіністердеңер пілчелер. Амғы туста оларны пӧгер оңдайлар, ӱзӱріліп, чуртасха кирілчелер. Ӱлгӱнің ОНФ кізілерінең палғалыс тутчатханы, сурығларны пӧгерінде хада-пірге тоғынчатханы, оларның тоғызын хайығ чох артыспинчатханы ӧріндірче.
Конференция тоғызы ОНФ-тың региондағы штабына паза сыныхтағ иртірҷең комиссиязына наа кізілер табылғанынаң тоозылған.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде