ХАКАС ТІЛІНІҢ КӦӦЛБЕК КӦГҶІЗІ
15.11.2017
Хабарлар
Пӱӱл саблығ кибелісчі Моисей Баиновха 80 час толарҷых. Чир-суғҷыбыстың пайрамнығ чазын таныхтап, Чайаачылар туразы поэттің таллама тоғыстарының чыындызын чарыхха сығарыбысхан. Ол «Ӧскей ах хазыңа пӱрлер» адалча. Аның презентациязы пу наада Н.Г.Доможаковтың адынаң национальнай библиотекада ирткен.
Мероприятиеде М.Р.Баиновтың туған-чағыннары, орындағы писательлер пірігізінің кізілері, Алтай аймааның ӱгретчілері, ХГУ-ның студенттері, библиотека тоғынҷылары паза хабарҷылар араласханнар. Презентация хакас тілінең ирткен. Аны Чайаачылар туразының директорының тоғызын толдырчатхан Надежда Бурнакова апарған. Ол чыылған чонны саблығ поэттің чуртас чолынаң таныстырған паза чыындынаңар хысхаҷахти чоохтап пирген.
Улуғ нимес кинде ӱс чардыхтаң пӱткен. Пастағызынзар таланттығ чир-суғҷыбыстың аймах туста пазылған кибелістері кірчелер, ікінҷі чардыхсар - «Чазыдаңар сағыстар» поэма. Халғанҷызында «Таң солбанында тоғазығ» кибеліснең пазылған романны хығырарға чарир. Чыындының тиражы 500 экземпляр. Аны чарыхха сығарарға Хакасияның культура министерствозы полыстыр.
Саблығ поэттің таллама тоғыстарын пірге чыып, Сибдей Том улуғ тоғыс иткен. Ол, Моисей Баиновтың чайаачызын пӧзік паалап, аны хакас поэзиязына улуғ хозым иткенін таныхтаан. Таланттығ чир-суғҷыбыс, ямбтарны хакас кибелізіне кир салып, кибелістіг роман жанрын тӧстеп, пістің литератураны пайытхан. Аннаңар хакас чонның саблығ оолғын Шекспирнең, Дантенең, Пушкиннең пір синде турғызарға чарир тіп санапча ол.
«Оскей ах хазыңа пӱрлер» чыындының редакторы филология наукаларының кандидады Нина Майнагашева полча. Нина Семёновнаның чооғынаң, Хакасияда чыл тооза Моисей Баиновтың пайрамнығ чазына чарыдылған мероприятиелер иртірілді. Анзы кізілер саблығ поэтті аарлапчатханын, чайаачы тоғыстарын хығырчатханын киречілепче. Ідӧк Н.С.Майнагашеваның таниинаң, учёнайларға М.Р.Баиновтың чайаачызын хайди даа мыннаң мындар істезерге кирек. Пу тоғысты апарып, нинҷе-нинҷе диссертация арачылап аларға чарир.
Презентацияда поэттің пархазы Лидия Баинова араласхан. Кибелісчі ах чарыхтаң парыбысханда, ол кічіг полған, аннаңар ағазынаңар чиит ипчі кӧп ниме пілбинче. Чарыхха сыххан «Оскей ах хазыңа пӱрлер» чыынды ағаа поэттің чайаачызынаң танызарға паза хакас тілін ӱгренерге оңдай пирче. Чоохтирға кирек, хакас тілін Лидия ӱр ниместе ле ӱгрен сыххан. Іди дее полза, Моисей Романовичтің «Ууҷама» кибелізін ол чахсы хығыр пирген. Хакас тілінең хоос литературадаң пасха, чиит ипчі «Хабар» газетаны
тӧреміл хығырчаттыр.
Кӧп чапсых ниме чир-суғҷыбыстаңар чайаачы ус Галина Казачинова чоохтап пирген. Моисей Баиновнаң поэт Валерий Майнашев уғаа ынағ полтырлар. Тоғасса, ікі нанҷы орыс поэттернің кибелістерін хығырҷаң, андағ оңдайнаң олар марығласчаңнар. Итсе, пірееде кирек ӱрге парыбысчаң полтыр.
Хакас кибелісчі Моисей Баинов Аршаннар хыринда орныхчатхан Хызыл салда аалда тӧреен. Аршандағы школада аның чайаачызына чарыдылған республика синінде наука-практикалығ конференция иртірілче. Аннаңар чыылысхан чонға анда істенчеткен хакас тілі паза литература ӱгретчізі Александр Сербигешев искірген. Аршаннарда Моисей Романовичнең чахсы таныс полған кізілер ам даа пар. Ӱгретчілерге оларнаң хада хайди даа чоохтазып аларға кирек тіп чӧп пирілген.
Презентацияның халғанҷызынзар студенттер Альбина Бурнакова паза Мария Бельтерекова поэттің кибелістерін хығырғаннар, Сибдей Том, тізең, хомыснаң ойнап, аның тахпахтарын толдырған. Чалахай кӧглер килген чонның кӧңнін кӧдірген.
Моисей Баиновтың таллама тоғыстарының чыындызы Хакасиядағы библиотекаларҷа тарадылар. Ідӧк наа киндені Чайаачылар туразында садызып аларға чарир. Аның паазы - 150 салковай. Надежда Бурнакованың таниинаң, Чайаачылар туразы мыннаң мындар хакас писательлернің паза поэттернің тоғыстарын сығарар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде