ХАРА ТАС АЛАРҒА ПОЛЫЗЫҒ ПИРІЛЕР
21.11.2017
Хабарлар
Хакасияның правительство туразында республиканың сағыбаан саайларҷа комиссиязының (КЧС) чыылии ирткен. Аны Хакасия пазы орынҷызының тоғызын толдырчатхан Владимир Крафт апарған.
Пастағы сурығ тураларзар чылығ пирҷең тус хайди парчатханына чарыдылған. Чоох тутхан Хакасияның пӱдіріг паза ЖКХ министрінің пастағы орынҷызы Анатолий Безлепкин. Аның чооғынаң, республикада тураларзар чылығ пирҷең тус иптіг иртче. Амғы тусха теере 18 улуғ нимес саай полған: ікілер саай - Орджоникидзе паза Шира аймахтарында паза Сорығда, пірер - Боградта паза Саяногорскта, ӱс саай - Ағбан пилтірінде паза читі - Харатаста. Саайлар ӧӧнінде суғ пирҷең системада полғаннар. Орджоникидзе аймаа чылығ пирҷең тусха 66 %-ке тимде. Приисковай аалда хара тас алты кӱнге ле чидер. Шира аймаа 28 %-ке тимде. Алты муниципалитет чылығ пирҷең тусха тимдезін кӧзітчеткен пічіктерні ал полбаан. Коммунар аалда хара тас чыындызы пис кӱнге читкіҷе. Боград аймаанда пір ле муниципалитет тимдезін кӧзітчеткен пічікті алып алған. Боград, Бородино, Пушной, Сон пазы аалларда хара тас пис кӱнге чидер. Ағбан пилтірінде тыхтағ тоғыстары тоозылған. Аймах чылығ пирҷең тусха 37 %-ке тимде. Харатаста паза Асхыста ідӧк топливо пис кӱнге ле чидер. Хара тасты хоза аларына бюджетте ахча кӧріл парған.
Владимир Крафт, сағыбаан саайлар полдыртпас ӱчӱн, соох кӱннерде сығызар сидіксіністерге тимде поларға чахығ пирген.
Ікінҷі сурығ ӧрттердең тоғыр профилактика тоғызына чарыдылған. Сӧс МЧС-тың Хакасияҷа ГУ-зының пастых орынҷызы Денис Коноваловха пирілген. Аның чооғынаң, пӱӱл республикада 540 ӧрт сыххан. Анда 30 кізі ӱреен паза 22 кізі палығлатхан. Ӧрттернің ӧӧн чардығы чирдегі чурттарда сыххан. Анда ӱреен кізілернің кӧбізі изірік полған. Иң сидік киректер Асхыс аймаанда. Анда ӧрттер паза палығлатхан кізілер саны хозылған. Андағох киректер Алтай, Шира аймахтарында. Соох кӱннер турыбысханда, чуртағҷылар пестерні кӧп одынчалар паза чылытчаң электроприборларнаң тузаланчалар. Абазада, Алтай аймаанда паза Сорығда чуртағҷыларнаң профилактика чоохтазығлары уйан апарылча. Аны хоостыра, анда ӧрттер саны алай ӧрттерде палығлатхан кізілер саны хозыл парған. Саяногорскта кізілернең чоохтазығлар кӧп иртірілген. Ол сылтағнаң городта ӧрттер саны хозылбаан. Ӧрттер сыхпас пӧгіннең профилактика тоғызын тыыдарға, СМИ-ларда ӧнетін статьялар сығарарға, тураларда ӧрт сыхханнаңар искірчеткен оборудование турғызарға, МЧС-тың Хакасияҷа ГУ-зына паза республиканың ӧрттердең тоғыр службазына орыннардағы пос устаныс органнарына профилактика тоғызын апарарынҷа полызығ пирерге паза кічіг аалларда пос кӧңні-нең ӧрт ӱзірҷеңнер дружиналарын тӧстирге чарадығ алылған.
Анаң муниципальнай пӱдістер хайдағ профилактика тоғызы апарылчатханнаңар искіргеннер. Владимир Крафт прай тоғыстарның салтарларын паза оларның тузазы парын ӱзӱрерге чахаан. Ідӧк чонға хазыр чил полардаңар орамалардағы динамиктер пастыра искірерге кирек тіп таныхтаан.
Халғанҷы сурығ пірге дежурнай-диспетчер службазы (ЕДДС) тоғызына чарыдылған. Хайди таныхтааннар чыылығда, «112» системаны тӧстирінҷе тоғыс декабрьда тоозылар. Амды ЕДДС-тар аннаң тоғынарға тимде ниместер. Че 20 декабрьға прай читпестер чох иділер. Пірее муниципальнай пӱдістерде диспетчерлер саны читкіҷе нимес. Чыылығда ЕДДС-тарда тоғынчатхан диспетчерлер санын алты кізее теере хозыбызарға чарадығ алылған.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы