ЧООХЧЫЛДА НАА ШКОЛА ПОЛАР
29.11.2017
Хабарлар
Пу кӱннерде Чоохчыл аалзар чорыхха сығарға киліскен.
Анда пасталығ школа изелерге чит парғанда, ӱгретчілер палаларны Культура туразында ӱгретчелер. Че аалда ам наа школа турғызылча. Андағы наа школаны хоос кірписнең пӱдірчеткен устағҷынаң чоохтазарға киліскен.
- Чоохтап пиріңер, хайдағ пӱдіріг организациязынаңзар?
- Мин Валерий Александрович Белов полчам, пу пӱдірігнең устапчам. Школаны «Синадекор» ООО пӱдірче. Аны табырах пӱдірерге килісче, иргі школа изелерге чит парған сылтаанда. Тоғызыбысты пӱӱл 25 декабрьға теере тоос саларбыс.
- Нинҷе пала ӱгренер пу школада?
- Прай - 20 пала. Анда полар ікі класс, спорт пӧлии паза ас-тамах тимнеҷең, палаларны азыраҷаң пӧліктер. Ӱгретчі чуртир квартира піргӧк турғызылча. Школа прай саринаң чахсы полар. Пу чылда наа котельнай турғызыл парған. Чир алтынҷа суғ пирҷең трубалар тартыл парған. Палалар чылығ туалетсер чӧрерлер.
- Пу иргі школа сайалар ба?
- Иргі школаны сайирбыс. Ибіре чир хоңнап парар. Ол чирде піс спорт площадказын ит саларбыс. Палалар ойнир орында брусчатка тӧзелер, пасха чирлері асфальтнаң чабылар. Машина чӧрер чол салылар. Пу школаҷах Чоохчыл аалның иң сіліг туразы полар.
Автор :
Надежда СОЛОМАЧЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде