ӦӦН ГОРОДЫБЫС ӦТКІН ПӰДІРІЛЧЕ ПАЗА ТИЛІПЧЕ
01.12.2017
Хабарлар
ПУ НЕДЕЛЯДА ХАКАСИЯ ПАЗЫ ВИКТОР ЗИМИН ХАКАСИЯНЫҢ ТИЛӀС ЧӦБІНІҢ ТЕЕСТЕГӀ ЧЫЫЛИИН АҒБАН ГОРОДТЫҢ УСТАҒ-ПАСТААНДА ИРТІРГЕН, ХАЙДА РЕСПУБЛИКАНЫҢ ӦӦН ГОРОДЫНЫҢ ИНВЕСТИЦИЯ ПРОЕКТТЕРІ ӰЗӰРІЛГЕН. ЧЫЫЛЫҒДА АРАЛАСХАННАР РЕГИОН МИНИСТЕРСТВОЛАРЫНЫҢ ПАЗА ВЕДОМСТВОЛАРНЫҢ УСТАҒҶЫЛАРЫ, ДЕПУТАТТАР, МУНИЦИПАЛЬНАЙ ӰЛГӰ ПАЗА ХАЛЫХ ПІРІГІСТЕРІНІҢ КІЗІЛЕРІ, ИДІНҶЕКТЕР.
ТИЛӀС ЧӦБІНІҢ ЧЫЫЛИИН АЗЫП, РЕГИОН УСТАҒҶЫЗЫ ТАНЫХТААН, АҒБАН РЕСПУБЛИКАНЫҢ ӦӦН ГОРОДЫ ПАЗА ВИЗИТНАЙ КАРТОЧКАЗЫ ЛА НИМЕС, ІДӦК СУБЪЕКТТІҢ ЧОН ЧУРТАПЧАТХАН ИҢ КИЛКІМ ОРНЫ. АННАҢАР ЭКОНОМИКА СУРЫҒЛАРЫНАҢ ХАДА ИНФРАСТРУКТУРА ТИЛІЗІ АЛЫНҶА ХАЙЫҒНЫ КИРЕКТЕПЧЕ.
- Проекттернің кӧбізі хорғыс чох поларынҷа, ибіркі чирні иптирінҷе сурығларны пӧгеріне кӧстелген, че тиксі алза, олар пістің чуртағҷыларның чуртас синіне паза истіг оңдайларына теелчелер. Анзы, тізең, чииттерні Хакасияда чуртирға, ӱгренерге паза тоғынарға кӧӧктірче. Олох туста кадрлар пары регионзар инвестициялар тартарына паза пір чахсы сари полча, - таныхтаан Виктор Зимин.
Ағбанның тилізінің ікі ӧӧн проектінең таныстырған город пазы Николай Булакин. Пастағызы «Арбан» наа чурт микрорайонын тиксі пӱдіреріне теелче. Наа микрорайон Крылов, Некрасов, Итыгин паза Киров орамаларының хырығларында орныхча. Кӧрілген участоктың ортызында парк орнығар, аны ибіре социальнай пӱдіріглер турғызылар, анаң - кӧп хадыллығ туралар. Социальнай пӱдіріглер санында 1000 орынға школа, ікі олған сады, олған поликлиниказы паза пустығ арена.
Город пазы ідӧк Мир орамазынзар виадукты алты полосаға теере алғыдарынҷа проектнең таныстырған. Чол Мир орамазында Гагарин орамазына теере алыстырылар. Чоохтирға кирек, пу участокты алыстырардаңар чоохтар хаҷаннаң парча. Проект-смета пічіктері 2012 чылдох тимде полғаннар, че чолны тиксі алыстырарынҷа тоғыстарны толдырарына хоза хабазығ кирек. Проектті чуртасха кирер ӱчӱн, 11 тураны (27 квартира) сайирға, оларның чир участоктарын садызарға, суғ, палғалыс паза чарытхы сетьтерін кӧзірерге киректелче. Проект хоостыра чолда алты полоса тартылары, ікі саринаң тротуар салылары паза тураларны бетон сиденнең чарары кӧрілче. Тиксі проекттің паазы - 350 миллион салковай.
Ағбан мэрі «Арбан» микрорайондағы социальнай пӱдіріглерні паза чол кисчең орынны алғыдарынҷа тоғыстарны федеральнай кӧстегліг программаларға кирерге чӧптеен. Чоохтирға кирек, город устағ-пастааның пу пӱдіріглернің алында тузаланған проекттері пар.
Хакасия пазы проекттің ікізін чахсы паалаан паза республика правительствозына оларны регионның социальнай паза экономика тилізінің планына кирерге, ідӧк федеральнай профильліг министерстволарнаң хада хоза ахча пирерінҷе тоғыныбызарға чахаан.
- Ӱс кӱснең - федерация, республика паза муниципальнай пӱдіс - пу пӱдіріглерні турғысчаң прай оңдайларыбыс пар. Чолны кисчең орынны алғыдарынҷа хорадығларның чарымын республика позына алча - ол пӧгіннерге 2019-2020 чылларның бюджедінде 170 миллион салковай кӧр саларға. Піс Ағбанда чуртапчабыс, студенттер ӱгренерге килчелер, удаа аалҷылар полчалар - прайзы ол инфраструктуранаң тузаланча, - хосхан Виктор Зимин.
Ідӧк Хакасияның Тиліс чӧбінің кізілері чахсы паалааннар ікі спорт пӱдіріглерінің проектін - кӱрестің аймах кӧрімнерінҷе кіннің паза стол теннизі кінінің. Пірсі 130 миллион салковайға турча, ікінҷізі - 112 миллион салковайға. Пастағларнаң таныстырған Ағбан пазының орынҷызы Алексей Лёмин.
Аның искіриинең, кӱрестің аймах кӧрімнерінең городта прай 885 кізі айғасча, че оларның алынҷа спорт заллары чоғыл. Кӱрес Хакасияда чахсы салтарлар кӧзітчеткен спорт кӧрімнерінің санына кірче. Спорт школазында сигіс пӧлік, 22 тренер-ӱгретчі тоғынча. Школа тоғынғаннаң сығара Россияның 17 спорт узы, спорт узына 123 кандидат паза разрядтығ 1000 азыра спортсмен тимнелген. Стол теннизінең 398 кізі айғасча.
Пӱдірілер кіннерде ӧнетін спорт заллары паза оборудование кӧрілче, хайзы тиксі Россиядағы марығларны иртірерге полызар. Олох туста спортсменнер пір орында истіг оңдайларда хынған спорт кӧрімінең айғас турарлар. Кіннерге кирек пічіктер тимнелче. Кӧзідімге, кӱрестің аймах кӧрімнерінҷе кін городтың пастағы микрорайонында орнығар. Аның туразы хакас хоостарынаң чазалар. Ол 2018 - 2020 чылларда пӱдірілер. Стол теннизінің кінін «Ағбан» спорткомплекске хоза пӱдірерге пӧгінчелер, аннаңар аның істі-тастындағы кӧрімі спорткомплекс тиксі кӧріміне килістіре полар. Пӱдіріг 2019-2020 чылларда парар.
Проекттерні физическай культураны паза спортты тилідерінҷе федеральнай кӧстегліг программаа кирерінҷе город устағ-пастаа Хакасияның спорт министерствозынаң хада тоғынар.
Пос киреенең айғасчатханнарның проекттері ідӧк чахсы паалаға турысханнар. Ағбан город устағ-пастааның хабарлар пӧлии искіриинең, проекттернің пірсі идінҷек Татьяна Ту-татчикованың проекті - «Малинники» пекарня-кондитерскайның тилізі». Хараа-кӱнӧрте тоғынчатхан пекарня-кондитерскайда 135 тоғыс орны саналча, айда 43 тонна аймах-пасха ас-тамах сығарылча: халастар, торттар, пирожнайлар, пельменнер, варениктер. Предприятие ээзінің искіриинең, пӱӱл пос ас-тамаан тимниріне 532 квадрат метрліг пӧлік кредит полызиинаң алылған. Кредит читі чылға 12 % пирілген. Татьяна Тутатчикова кредиттің проценттерін тӧлирге хабасчаң оңдай табарға сурынған Тиліс чӧбінең. Президиум ол сурығны городтың инвестиция чӧбіне хайыға аларға паза субсидия пирҷең оңдай табарға чӧптеен.
Ікінҷі проект - «Циркус» аттракционның сӧбіре паркы. Проект пастағҷызы Виктор Черных паркты тӧстеҷең чир участогын город устағ-пастаанаң сурча. Городтың андағ ікі орын пар - «Преображенский» парк паза «Арбан» микрорайонда наа тӧстелер парк. Инвестиция проектіне Тиліс чӧбі чӧпсінген паза город устағ-пастаана чирні ӱр тусха арендаа пирерін паза коммуникацияларны тартарын пӧгерінде полызарға чахаан.
Автор :
Тимнеен Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы