ХАКАСИЯНАҢ ТУВАНЫҢ ЫНАРХАС ЧОЛЫ
01.12.2017
Хабарлар
Туваның аал хонии министрi Эртине ДАНЗЫ-БЕЛЕК
Республиканың музей-культура кінінде 24-25 ноябрьда ирткен Ӱстӱнзархы Сибирьнің агропромышленность форумында улуғ аалҷы полған Туваның аал хонии паза ас-тамах министрі Эртине Сергеевич Данзы-Белек. Форумға хонҷых республикадаң 50 кізі килген. Улуғ делегация санында аал хонии министерствозының пӧлік устағҷылары, фермерлер, ниме-ноо сығарчатханнар. Эртине Данзы Белек ікі республиканың хада-пірге тоғызын чарыт пирген.
- Иң пастағызын, Хакасия Туваға аймах чолларны асча: транспорт чолларынаң пасха тимір паза кии чолларын. Тувада, піс пілчебіс, позының тимір чолын пӱдірері проектке ле киріл парған, аэропорт пар, че аның оңдайлары кічіг. Аннаңар Хакасия пастыра пістің фермерлерібіс кӧп ниме-нооны тартчалар паза садыға ысчалар, - таныхтаан министр Эртине Сергеевич.
Чоохтирға кирек, Хакасиянаң Тува тӧӧй климаттығ ползалар даа, Тувада ол сала хатығ. Анзынаң кӧп сидіксіністер палғалыстығ. Кӧп орыннарзар чахсы чоллар чоғыл, чарытхы тартылбаан. Аннаңар сойан чоны кӧбізін мал ӧскірерінең айғасча. Хакас фермерлер ӧӧнінде інектер, аттар, хойлар, піреезі сосхалар ӧскірчетсе, тувадағылар інектерні, аттарны, хойларны, ӧскілерні паза яктарны тутчалар. Иттің ӧӧн чардығы Якутиязар паза Монголиязар парча.
Хыра кирее сала нымзах климаттығ аймахтарда апарылча. Ӱреннерні хонҷыхтар пістіңӧк хыраҷылардаң алчалар.
Хакасия, тізең, хаҷаннаң тува хойларына хынча. Олар салымнығлар паза кинетін алысчатхан кӱнге сыдамахтар. Іди республикадағы фермерлернің кӧбізі тува хойларын тутча. Кӧзідімге, Индіркі Тӧӧдегі фермер Артём Мамышев пос киреен 2009 чылда пастапчатханда, Асхыс аймааның программазында араласхан, аны хоостыра ол Тувадаң 500 пас хой алып алған. Андада программа араласчыларына хойларны аларға ахчалығ хабазығ пирілген. Кізее, тізең, хойларны пос хониинзар тарт килер оңдай табарға киректелген. Полызығны алған чуртағҷы нинҷе-де чыл пазынаң ол синӧк пас хойны аймахтың пасха чуртағҷызына андағох кирексіністерҷе пирген. Пӱӱнгі кӱнде Артём Мамышевтің улуғ нимес фермазы сӧбіре фермазына ӧс парған. Анда ол харындастарынаң паза палаларынаң хада хайынча. Ферманы тилідеріне сӧбіре фермазын тилідеріне грант мариинда чиңені чахсы хабасхан.
Ікі республика палғалыстарын аал хонии паза ас-тамах министерстволарының хада-пірге тоғынардаңар чӧптезіглер тыытча.
Форум ирткен кӱн республика устағ-пастаа иң артых аал хонии тоғынҷыларын чеестеен. Туваның аал хонии паза ас-тамах министрі Эртине Данзы-Белектің чооғынаң, олар аал хонии тоғынҷыларын чылда ікі хати чеестепчелер: Наадым малҷыларның республика ӱлӱкӱнінде паза Туваның аал хонии министрі октябрьда Россияның аал хонии тоғынҷылары кӱнінде. Наадымда иң артых малҷылар паза чабаннар таныхталчалар, профессия ӱлӱкӱнінде - иң пӧзік кӧзідімнерге читкен тоғынҷылар паза фермерлер. Халғанҷы пайрамда иң артых сигіс «чемпион» кӱн батареяларын аларына 160 муң салковайдаң сыйлаттырған. Ол, тізең, ыраххы турлағда мал ӧскірчеткен чабаннарға уғаа кирек сыйых.
Туваның аал хонии паза ас-тамах министрі Эртине Данзы-Белектің кӧрізінең, хонҷых регионнарның фермерлеріне Ӱстӱнзархы Сибирьдегі агропромышленность форумы осхас ӱгредігліг мероприятиелер удаа иртір турарға кирек, хайда олар постарының опыттарынаң ӱлезерлер паза наа пілістер ал турарлар. Сағынчам, пастағы аал хонии форумы пістің дее, хонҷых регионнарның даа аал хониинаң айғасчатхан улузына тузалығ ирткен.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде