ӰH ПИРЕРГЕ НИИК ПОЛАР
05.12.2017
Хабарлар
Пу наада Россияның Ӧӧн табығ комиссиязы (ЦИК) чыылығ иртірген. Анда Россия президентіне табығларны хайди иртірер оңдайларнаң таныстырғаннар. Регионнарнаң палғалыс видео пастыра тудылған.
ЦИК-тың пазы Элла Памфилованың таниинаң, амды ӧӧн пӧгін - хазнаның чуртағҷыларына табығлардаңар искірері. Ол тоғыс табығлар кампаниязы пасталзаох апарылар. Пӱӱнгі кӱнде видеороликтер паза баннерлер тимнелчелер, хайзылары СМИ-лар паза Интернет пастыра кӧзіділер. ЦИК улуғ хайығ айландырар чииттерге, хазии уйан кізілерге паза ырах чирлерде чуртапчатхан улусха. 2018 чылда Россия президентіне табығларда пастағызын на 7 миллион чиит кізі ӱн пирер. Оларнаң хада тоғысты алынҷа апарарға кирек. Табығлар тузында кинектернің ӱн пирібізерге хай-хай кӧп оңдай полар. Аннаңар ідӧк хоза искірілер.
Чыылығ тузында ЦИК-тың кізілері табығлар кампаниязының логотибін кӧзіткеннер. Аны «ИМА-консалтинг» PR-агентство чайаптыр. PR-агентствоның ӧӧн директоры Вартан Саркисовтың чооғынаң, дизайнерлер 77 логотип сағын тааптырлар. Иң артығын, кізілернің аразында сурастырығ иртіріп, таллап алғаннар. Амды компанияа 50 видеоролик суурыбызарға кирек, оларның ікізі тимде. Кӧзіділген видеороликтернің ӧӧн сағызы - ӱн пирерге ниик. Табығлар тузында кізі хырығ озаринда тынанчатса даа, пасха городсар командировкаа парыбысса даа, регистрация хоостыра чуртабаза даа, ол ӱн пирібізер оңдайлығ. Че ағаа азынада сурыныс пічиин пирібізерге кирек полар.
Россия президентіне табығлардаңар телевидение, радио, газета паза Интернет пастыра искірілер. Закон хоостыра СМИ-лар орынны тикке пирерге киректер. Интернетте прай тоғысты «Михайлов паза партнерлар» компания апарар. Хайди таныхтаан Элла Памфилова, анзы чуртағҷыларға табығлардаңар толдыразынаң чоохтап пирерге оңдай пирер. Ідӧк чуртағҷыларға, Ӧӧн табығ комиссиязының хабарлар кінінзер айланып, сурығлар пирерге чарир. Россия президентіне табығлар 2018 чылда 18 мартта иртер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы