ЧИР ТАМААН ХАЙРАЛЛАҶАҢ НАА ОҢДАЙ
05.12.2017
Хабарлар
Хакасияның аал хонии паза ас-тамах министрі Александр Башков, Ағбан пилтіріндегі М.Р.Магомедовтың кресен-фермер хонииның чир тамаа хайдағ оңдайнаң хайраллалчатханын піліп алар ӱчӱн, андар чорых тутхан.
Фермер чир тамаан хайраллирынҷа сурығны нинҷе-де чыл пӧкче. Хоных чир тамаан хайраллаҷаң складта 2012 чылдаң сығара тиксі тыхтағ тоғыстарын иртірген. Ол склад Ағбандағы ТЭЦ хыринда орныхча. Совет тузында анда чир тамаа хайраллалҷаң, соонаң ол тастал парған. 2016 чылдаң сығара хоных чир тамаан хайраллаҷаң орыннаң тузалан сыххан.
Хакасияда ӧзімнер ӧскірчеткен фермерлернің саны асхынах нимес. Оларның ӧӧн сидіксіністерінің пірсі чир тамаан хайраллаҷаң орыннар чидіспинчеткені полча. Аннаңар часхыда чир тамаан садығ тураларынзар пасха регионнардаң ағылчалар. Кӧзідімге, пӱӱл часхызын садығ тураларында Томск облазындағы морковь садылған.
Кресен-фермер хонии тилізінҷе директор Багавдин Магомедов чир тамаан хайраллаҷаң орында хайдағ тиксі тыхтағ тоғыстары иділгеннеңер чарыда ис-кірген.
- Чир тамаан хайраллаҷаң складтың, полын тӧзеп, хырын нааҷылабысхабыс, стенедегі чіктерні чах салғабыс.
Чир тамаа июнь айға теере хайраллалар ӱчӱн, анда Голландиядағы вентиляция системазы турғызылған, че аны пір-ікі неделя пазынаң на тоғындырарбыс. Вентиляция полызиинаң капустаны улуғ ағас харчахтарда хайраллапчабыс. Харчахтарны ӱстӱ ӱстӱне хылаттапчабыс, аннаңар орын даа кӧп киректелбинче. Пір квадрат метрде нинҷе-де тонна капуста хайраллир оңдай пол килген, - таныхтаан Багавдин Магомедов.
Пу складта 600 тонна морковь, свекла паза капуста 10 С чылығда хайраллалча. Багавдин Магомедовтың чооғынаң, амды чир тамаан 1000 тоннаа теере хайраллаҷаң оңдай пар. Вентиляция системазы чох анда чир тамаа 500 тоннадаң кӧп полбасчых. Тиксі тыхтағ тоғыстарына паза вентиляция системазына кресен-фермер хонии 17-ҷе миллион салковай хоратхан. Амды чир тамаа июнь айға теере час полар.
- Чир тамаан хайраллирына мында уғаа чахсы оңдайлар. Капустаа пір дее сых тартылбаан, ол хуруғ. Чир тамаан хайраллаҷаң орыннар республикада пар даа полза, олар мындағ улуғ ниместер. 20-30 ла тонна чир тамаан хайраллирына кӧріл парғаннар. Республиканың кресен-фермер хоныхтарына пу чир тамаан хайраллаҷаң орын кӧзідім полча. Арса, пасхазы даа мындағ орыннар пӱдірер. Хакасияда ӧзімнер ӧскірчеткен хоныхтар асхынах нимес, че хайраллаҷаң орын чохтаңар, фермерлер чахсы ӧскіріп алған чир тамаан кӱскӱзінӧк ниик паанаң садыбысчалар, - таныхтаан Хакасияның аал хонии министрі Александр Башков.
Фермер Магомед Магомедовтың хыралары Ағбан пилтірі аймаанда орныхчалар. Хоных 300 гектар чирде яблах, капуста, морковь, свекла ӧскірче, чир тамаан хоных олған садтарына, школаларға сатча. Яблахты хоных пасха орында хайраллапча. Багавдин Магомедовтың чооғынаң, яблах кӧмес пасха оңдайнаң хайраллалча. Хоных ідӧк чир тамаан Харатас город хыринда арендаа алылған орында хайраллапча. Килер чылда кресен-фермер хонии брокколи, кольраби капусталарны паза редька ӧскірерге пӧгінче. Пу чир тамахтарын хайраллаҷаң прай оңдайлар пар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде