АҒЫРЧАТХАННАРНЫҢ САНЫ ӦСЧЕ
06.12.2017
Хабарлар
Н.С.КОНГАРОВ, Е.Ю.ШАЛГИНОВА
1 декабрьда тиксі тилекейде СПИД ағырығдаң тоғыр 1 кӱресчең кӱн таныхталча. «Хакасия» газетаның конференц-залында ол кӱнге чарыдылған пресс-конференция ирткен. Хакасияның «СПИД-таң тоғыр кӱрезіг паза профилактика апарчатхан республика кінінің» ӧӧн имҷізі Николай Конгаров паза Роспотребнадзорның Хакасияҷа управлениезінің эпидемиология пӧлии пастығы Елена Шалгинова хабарҷыларнаң тоғасханнар. Олар ВИЧ-чуғынҷах ағырығнаң республикада нинҷе кізі ағырчатханнаңар паза имнег-профилактика тоғызынаңар чоохтап пиргеннер.
Хакасияда 2017 чылның 10 ай аразына ВИЧ-чуғынҷах ағырығнаң 400 кізі ағырыбысхан. Ирткен чылда олох тус аразына пу ағырығнаң ағырыбысхан 392 кізі ілезіне сығысхан.
- Пір чыл аразына ВИЧ ағырығнаң ағырыбысханнарның саны ӧс парған. Пӱӱнгі кӱнде республикада 1944 кізі пічікке кирілген, ӧӧнінде 30 - 39 частығ кізілер. Ідӧк таныхтирға кирек, ағырчатханнарның санында ипчілер саны ӧс парған, амды 779 ипчі санға алылған. Ол республикада прай ағырчатханнарның 40 %-і пол парча. Анзы ВИЧ-чуғынҷах ағырығ палалар тӧриріне хорғыс ағылча. Амғы туста республикада чазы читкелек 22 пала ВИЧ ағырығнаң ағырчатханы сығысхан, - чоохтапча Елена Шалгинова.
Тиксі Россияның регионнары аразында СПИД-наң ағырчатханнарның санынҷа Хакасия 19-ҷы орында турча.
- Амғы туста ВИЧ-чуғынҷах ағырығнаң ағырыбыспаспын тіп пірдеезі сананмасха кирек. Посты прайзы пілчеткен оңдайларнаң хайралланарға. Ағырчатхан кізінең арачыланмин узуза паза чуғынҷах хан пастыра пір шприцнең наркотикті турғысса, чух парча. Сибирьдегі федеральнай округча кӧзідімнерні тиңнестірзе, пістің республикада 100 муң кізее ағырчатханнарның саны 3,5 хати тӧбін. Че ирткен чылнаң тиңнестірзе, пӱӱл ВИЧ-чуғынҷах ағырығнаң ағырчатхан кізілер нинҷе-де кізее кӧп табылған. Ідӧк пістің ӧӧн тоғызыбыс - полған на кізіні ВИЧ ағырыға сыныхтағ иртібізерге чӧптирі. Ағырчатхан кізілерні алай инфекцияны ал чӧрчеткен кізіні имнеп, чуғынҷахты чох идерге киректелче. Ағырчатхан кізее килістіре имнер таап имнезе, ол пасхазына хорғыс ағылбас. Че имнир алнында, ол вирусты ал чӧрчеткен кізіні ілезіне сығарарға кирек. Олар сыныхтағ иртерге чочынмасха киректер. Кізілер сыныхтағны хорыхпин иртерлер, хаҷан ибіркі чон ВИЧ-чуғынҷах ағырығнаң ағырчатхан кізізер пасхаҷыл кӧрбес, ағырыбызарынаң ӱрӱкпес.
Вирусты ал чӧрчеткен кізіні ілезіне сығарып аларынаң пасха, ідӧк аны имнег туразында санға турарға чӧптеп аларға кирек. Андада ла кізіні тикке имнирге чарир, - таныхтаан Николай Конгаров.
Мының алнында ағырығдаңар профилактика тоғыстары ӧӧнінде чииттернің, саарбахтарның аразында апарылҷаң. Амды ілезіне сығысча, улуғ частығ кізілер аразында тоғыс читкіҷе апарылбинчатханы. Аннаңар тиксі Россияда 60 час ас парғаннарның аразында, иреннің паза ипчінің хыныс палғалыстары сылтаанда, вирусты ал чӧрчеткен кізілернің саны ӧсче.
Пістің республикада, пасха регионнардағы чіли, городтарда паза кӧп чуртағҷылығ аймахтарда пу ағырығнаң ағырчатхан кізілер удаа табылчалар.
Хакасияда ВИЧ ағырығнаң ағырчатханнар иң кӧп Шира аймаанда, Абаза, Ағбан, Саяногорск паза Харатас городтарда тоғасча. Ідӧк таныхтирға кирек, аалларда даа ағырыбысханнар удаа тоғасча. Пӱӱл Пии аймаанда пу ағырығ 19 кізіде табылған. Аннаңар полған на кізі сыныхтағ иртерге кирек.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы