ЧАХСЫ САРИНЗАР АЛЫЗЫҒЛАР ПАР
08.12.2017
Хабарлар
Пу кӱннерде Хакасияның пазы Виктор Зимин, аның социальнай сурығларҷа орынҷызы Ирина Смолина паза республиканың хазых хайраллаҷаң министрі Владимир Костюш тоғыс сурығлары хоостыра тоғасханнар. Олар имнег тоғынҷыларына хабазар паза специалисттер чидіспинчеткенінең палғалыстығ сидіксіністі пӧгер оңдайларны ӱзӱргеннер.
Хазых хайраллаҷаң министрнің таниинаң, республикада имҷілер чидіспинче, уламох тамырлар хирургы, аллерголог, гематолог киректелчелер. Пу сурығны чарадар пӧгіннең республикада чиит специалисттерні, кӧстегліг оңдайнаң ӱгредіп, тимнир программа тоғынча. Аның полызиинаң халғанҷы пис чылға Хакасиязар 600 имҷі килген. Виктор Зимин, оларны тоғыс орыннарында артыс халар ӱчӱн, социальнай полызығ пиреріне улуғ хайығ саларға кирек тіп таныхтаан.
Ідӧк чыылығда Владимир Костюш Хакасияның имнег киреенің тархынына танығлығ киректеңер чоохтаан: ӱр ниместе ЭКО (экстракорпоральное оплодотворение) процедуразын иртіреріне лицензия алылған. Мының алнында пу имнег полызии хонҷых регионнарда ла пирілҷең полза, амды республика чуртағҷыларына ырах чӧрерге кирек чох полар.
- Процедураны пу айда иртіріп пастирбыс. Оборудование пар, специалисттер ӱгредіг иртібіскеннер, прай кирек пічіктер тимде, - искірген министр.
ЭКО иртірҷең пӧлік Хакасияның пала тапчаң кінінде азылған. Таныхтирға кирек, пӱӱл 11 ай аразына ЭКО-ға 100 азыра кізі ызылған, процедураны 83 сӧбіре иртібіскен, 37 ипчі санға алылған, 42 ипчі ЭКО соонаң пала тапхан, 51 ыңааҷах тӧреен (оларның 9-зы ікістер).
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде