НАЛОГТЫ ПЕНЯ ЧОХ ТӦЛИРГЕ ТУС ПИРІЛЕР
08.12.2017
Хабарлар
Хакасияның парламент устағҷызы Владимир Штыгашев 6 декабрьда Ӧӧркі Чӧп президиумының чыылиин иртірген. Ӧӧркі чӧптегілер пу чыылығда ис-пайға налог ахчазын тузында тӧлебеен чуртағҷыларға пеняны хаҷаннаң сығара саларын кӧрібіскеннер. Хайди таныхталған ӱзӱрігде, налог тӧлирдеңер пічік албаан паза аның сылтаанда тузында тӧлебеен кізілер саны республикада ас нимес.
Олаңай кізілернің ис-пайына налогты тузында тӧлебееннернің аның ахчазын пеня чох тӧлеҷең тус ам даа пар. Ӧӧркі Чӧп депутаттары иртер сессияда пеняны салҷаң тусты чарым чылға чылдырыбызардаңар закон проектін кӧрібізерлер. Андағ чарадығ алылған Ӧӧркі Чӧп президиумының ирткен чыылиинда.
Бюджетче паза налог политиказынҷа комитеттің устағҷызы Сергей Комаровтың чооғынаң, Ӧӧркі Чӧпсер пу сурығҷа федеральнай налог службазының Хакасияҷа устаа айланған. Ӧӧн сидіксініс ис-пайға налог ахчазын кӧп кізі тузында тӧлебеенінең палғалыстығ. Кӧбізі оларға налог тӧлирдеңер пічік читпееніне хоптанча. Че амғы законҷа кізілерге, хайзыларына федеральнай налог службазының сайтында «постың кабинеді» азылған, андағ пічік почтаҷа ызылбинча. Кізілер, «постың кабинедінзер» кіріп, кирек пічіктерні (квитанцияларны) сығарып аларлар паза тӧлебізерлер тіп кӧрілче. Чоохтирға кирек, кізілернің кӧбізі оларның «постың кабинеді» парынаңар алай андар кірҷең парольларын ундут таа салған полар. Піреезіне андағ «кабинеттер» нинҷе-де чыл мының алнындох азылған нооза. Сергей Комаровтың искіриинең, андағ кізілернің саны республикада тиксі санның 35 - 40 %-і полча.
Олох туста федеральнай законодательствоҷа регионнарға, постың законын сығарып, пеняны салҷаң тусты соона чылдырыбызарға право пирілген. Анзы налог тӧлепчеткеннернің налог синінҷе паза пасха даа нимелер хоостыра кӧп сурығлар сығыс килчеткенінең палғалыстығ. Аннаңар ис-пайға 2016 чылның налогын тузында тӧлебееннерге пеня салҷаң тусты 2018 чылның 1 июльына теере чылдырыбызардаңар закон проекті тимнелген.
- Пу законны аларын сӧӧ тартарға чарабас, ол республика чуртағҷыларының кӧбізіне теелче, - таныхтаан Ӧӧркі Чӧп кнезі Владимир Штыгашев. - Аннаңар аны чағынғы сессиядох кӧрібізерге паза алыбызарға кирек тіп санапчам.
Ӧӧркі Чӧптің сессиязы 13 декабрьда иртер тіп кӧрілче.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы