ПОС ПРАВОЗЫН ПІЛГЕНІ ЧУРТАСТЫ НИИКТЕПЧЕ
12.12.2017
Хабарлар
9 декабрьда тиксі Россияда Право (юридическай) диктанты ирткен. Аның пастағҷылары - «Россияның юристтер ассоциациязы» паза «Деловая Россия» тиксі Россиядағы халых пірігістері. Право диктантының ӧӧн пӧгіні - чуртағҷыларның праволарынаңар пілістерін паалиры. Аннаңар диктантха кирілген 30 сурығ Конституцияа, істеніс, административнай, гражданскай паза сӧбіре праволарына теелче. Диктантха сурығларны тимнеен О.Е.Кутафиннің адынаң Москвадағы юридическай университет.
Ӏдӧк таныхтирға кирек, халых пірігістері диктант салтарларын Конституция кӱнінде искірерге пӧгінчелер. Тиксі паалағ мыннаң мындар чуртағҷыларға тикке юрист полызиин пирерге полызар.
Хакасияның чуртағҷыларына пу диктантта араласчаң оңдайлар тӧстелгенӧк. «Россияның юристтер ассоциациязының» Хакасиядағы пӧлии паза Н.Ф.Катановтың адынаң Хакас хазна университеді право диктантын пазарына наа ӱгредіг корпузында тӧрт аудитория тимнеен. Чоохтирға кирек, пасха диктанттарнаң право диктантын толдырары пасхалалча: араласчы, сурығларға компьютерде нандырып, сах андох салтарны піліп алча. Аннаңар диктантта араласчаң оңдайлар тӧстирге компьютер класстары киректелген. Араласчыларны санға аларға паза оларнаң тоғынарға полысханнар университеттің тархын паза право институдының студенттері.
- Сағынчам, право диктанты - уғаа кирек акция, ол чуртағҷыларның праволарын пілчеткенін ілезіне сығарар, чидіспинчеткен пілістерні кӧзідер, андағ оңдайнаң чуртағҷылар праволарына сала ситкіп хай сығарлар, - сағызынаң ӱлескен Хакасияның юстиция киректерінҷе паза региондағы безопасностьча министр тоғызын толдырчатхан Елена Кудинова. Ол ідӧк право диктантында араласхан. - Пӱӱнгі кӱнде полған на ӱлгӱ органнарының сайттары пар, хайда кирек искіріглерні, чарадығларны таап аларға чарир, че, андағ даа полза, чуртағҷыларның кӧбізі ол оңдайларнаң хайдағ-да сылтағларнаң тузаланминча.
Полған на чуртағҷы позының ӧӧн праволарын пілерге кирек: Конституция, істеніс, сӧбіре, гражданскай паза пасхазын, - чарытхан «Россияның юристтер ассоциациязының» региондағы пӧлиинің толдырығлығ директоры Сергей Исайченков.
- Саннар таниинаң, Россияның тоғысха кӱс чуртағҷыларының 26 проценті чуртаста пір хати ла юрист полызии соонҷа айланған. Пос правозын пілгені кӧп сурығларны чарадарға, алҷаастар итпеске полысча.
Араласчыларны санға алған соонаң аудиторияларзар ӱдескеннер. Пір часха кӧрілген диктантты чуртағҷылар 15-20 минутаа ла пӧгібіскеннер. Иң пастағылар санында полған Хакасия парламентінің аппарат устағҷызы Нина Шейерман. Ол, диктантта хайдағ сурығлар пирілгенін пілерге сағынып, араластыр. Пӧзік паалағ алған устағҷы диктант сурығларына чӧпсінген.
Пістің ӧӧн вузыбыстың тархын паза право институдының пастағы курс студенті Екатерина Кузнецоваа сурығлар аар пілдірбееннер, че, андағ даа полза, алҷаастар иткен. Профильліг ӱгредіг алчатханда, аның пілістерін алғытчаң чыллар пар. Тиксі Россия чуртағҷыларының чи праволарынаңар пілістері хайдағ синде полҷаң? Пу сурыға нандырығ Конституция кӱнінде чарлалар. Че анда араласпаан чуртағҷыларға диктант сурығлары тӱрчедең Интернетте азых поларлар. Хынған на кізее позының пілістерін паалабызарға чарадылар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы