ПІСТІҢНЕРНІҢ ТЕЕСТЕГІ ЧИҢІСТЕРІ
12.12.2017
Хабарлар
Меспектіг хоккейҷе Россия чемпионадының пӧзік лигазында ойнапчатхан Ағбандағы «Саяны» команда пу ирткен тынағ кӱннерінде позының айғызында Хабаровсктағы «СКА-Нефтяник-2» команданаң тоғасты.
Таныхтирға кирек, «Саяны» команданың хоккеисттері пастағы ойыннарын пасха городтарда иртіргеннер. Чир-суғҷыларыбыс пастап Новосибирсктегі «Сибсельмаш-2» команданаң тоғасханнар. Анда олар ізестіг чиңістер тутханнар. Пастағы ойын 4:0 саннаң, ікінҷізі 6:0 саннаң тоозылған. Хайди кӧрчебіс, пістіңнер постарының хаалхазына пір гол даа кирдірбееннер.
Новосибирсктең айлан киліп, пістіңнер Кемеровтағы «Кузбасс-2» команданаң аның айғызында тоғасханнар. Уғаа чахсы тимненістіг команда тіп саналча. Аның алнында ла «Кузбасс-2» команда, «Енисей-2» команданаң тоғазып, 3:2 саннаң утхан, ікінҷі ойында утыр салған.
Че пістіңнердең тоғыр чахсы ла ойнап полбин салғаннар. Пастағы тоғазығда «Саяны» 7:1 саннаң, ікінҷізінде 6:2 саннаң чиңіс тутхан.
9-10 декабрьда, тізең, Ағбанзар Хабаровсктағы «СКА-Нефтяник-2» команда килген. Аалҷылар уғаа маңат ойнапчалар, хаҷан даа сыйыхтығ орынға сығып аларға харасчалар. Меспектіг хоккейге хынчатхан улус пӱӱл пу командада уғаа чахсы спортсменнер чыыл парғанын таныхтапча. «СКА-Нефтяник-2» команда пу сезонда меспектіг хоккейҷе Россия чемпионадының суперлигазынзар сығып аларға пӧгін тутча.
Че андағох пӧгін тутча «Саяны» команда. Пірдең ол айғы ээзі полча. Хайди тидірлер, ибде стенелер дее полысча. Стадионда кӧрігҷілер парох, че андағ ла кӧп нимес. Стадион 20 муң артиинаң кізее пӱдірілген полған. 1980 чылларда андар чон матап чыылысчаң. Орындағы «Саяны» команда меспектіг хоккейҷе СССР-ның пӧзік лигазында ойнаҷаң, маңат тимненіс кӧзітчең. Иң пӧзік чидии - СССР чемпионадында хола медаль утханы. Андада хайди матап ӧріністібіс, команданың улуғ тренері Виталий Лазицкий махтаға сыххан.
Тоғазығ пасталғандох, хайзы даа команда табырах ойынға хынчатханын кӧзіт сыххан. Хызыл ӧңніг меспек стадионның пір саринаң пасха саринзар оңнығ табырах учуға халбинчатхан. Кӧрігҷілернің ӧріністіг хысхырыс-аахтазы, сығырызы ӱр нимеске дее тохтабинчатханға тӧӧй. Сынап таа чи, хайди сым одырып аларзың, хаҷан пістіңнер тудығ чох алнынзар кӱстенчеткенде. Аннаңар даа, неке, аалҷылар пістің хоккеисттерні, сайбағ салып, тохтадыбысчатханнар. Анзы постарына уламох хомай кирекнең айлан турған: сайбағҷы айғыдаң 5 алай 10 минутаа сығарылча, ағаа хоза, аалҷыларның хаалхазынзар штрафной сабарға чарадылча.
Андағ туста «Саяны» команданың кип-азахтарын кис салған алты хыс, кӧрігҷілер алнында тур салып, оңнығ ла хысхырыспинчалар, прайзының кӧңнін кӧдірчелер: «Саяны» чемпион, амох гол кир пирер!» Че хаҷан пістіңнер сайбағ салзалар, гол кирбес ӱчӱн «Чаза сабызар!.. Чаза сабызар!» тіп тыыда аахтасчалар. Пірее хати хызыл меспек сынап таа «Саянының» хаалхазы хыринҷа учуға халча.
Суббота кӱн пістіңнер 8:2 саннаң чиңіс тутханнар. Позырахта ойын 9:3 саннаң тоозылған, «Саяны» утхан. Амды пістіңнер алты ойын соонда 18 саннығ позының подгруппазында - пастағы орында.
Позырах кӱн ойын соонда «Саяны» команданың улуғ тренері Евгений Баженов хабарҷыларның хай пірее сурығларына нандырған. Аның кӧрізінең, командадағылар удур-тӧдір ам даа чахсы піліс полбинчалар. Анзы пасха городтардаң хоккеисттер піссер килгенінең сылтағлығ тіп санапча тренер. Ол алҷаастарны тӱзедерлер, уламох маңат ойнирлар, кӧрігҷілерні чиңістернең ӧріндір турарға харазарлар.
Амды «Саяны» 13-14 декабрьда позының айғызында Арсеньевсктең килген «Восток» команданаң тоғазар. Ойын 19.00 часта пасталар.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы