МИНИСТР ЧАЛ АХЧАЗЫНАҢАР СУРЫҒЛАРҒА НАНДЫРҒАН
19.12.2017
Хабарлар
Ирткен неделяда Хакасияның хазых хайраллаҷаң министрi Владимир Костюш имнег тоғынҷыларынаң кӧні палғалыс иртірген. Мында чал ахчазының синi кӧдірілчеткені паза социальнай полызығлар пирілері ӱзӱрілген. Ідӧк видео палғалыс полызиинаң иртірілген чыылығда республиканың имнег учреждениелерінің тоғынҷыларына Владимир Фёдоровичсер сағыссыратчатхан сурығларынаң айланар оңдай пирілген.
Хайди таныхтаан Владимир Костюш, пу кӧні палғалыс теестегі нимес полған. Аның иртірілері пӧгінде полған, че чағынғы туста нимес паза анда пасха сурығны ӱзӱрерге сағынчатханнар. Халғанҷы туста, тізең, хазых хайраллаҷаң учреждение тоғынҷыларынаң чал ахчазы саналчатханы паза тӧлелчеткені хоостыра кӧп айланыс кіртір. Аннаңар Хакасия пазы Виктор Зиминнің чахиинаң Владимир Костюш, мындағ чыылығ иртіріп, Россия президентінің чахии республикада хайди толдырылчатханынаңар паза социальнай полызығлар пирерінҷе законзар кирілген алызығлардаңар чоохтаан. Пу сурығны чарыдар пӧгіннең кӧні палғалысха республиканың паза аймахтарның СМИ-лары хығыртылғаннар.
Видео папғалыс пурун аймахтардағы паза Абаза, Сорығ городтардағы имнегтуралары тоғынҷыларынаң иртірілген. Анаң обед соонаң Ағбан, Харатас, Саяногорск городтардағы имнег тураларынаң чоохтазығ апарылған. Анзы аалларда істенчеткен имнег тоғынҷыларына социальнай полызығ пирілчеткеніне алызығлар кирілгені хоостыра хоза искіріглер читірерге кирек полчатханынаң палғалыстығ полған. Чыылығда хазых хайраллаҷаң министерство устағҷызынаң пасха аның орынҷызы Ольга Максимова, кадрлар пӧлиинің эксперті Елена Теппе паза имнег кирее тоғынҷыларының республикадағы профсоюзының кнезі Тамара Гольнева араласханнар.
Хайди пілчебіс, президент 2018 чылға имнег тоғынҷыларының чал ахчазын кӧдірерге чахығ пирген. Іди 2012 чылдаң амғы тусха имҷілернің ортымах чал ахчазы 35 муң салковайдаң 46 муң салковайға ӧс парған, ортын имнег тоғынҷыларының - 19,5 муңнаң 28,5 муң салковайға, кічіг имнег тоғынҷыларының - 9 муңнаң 16,9 муң салковайға.
Мында таныхтирға кирек, ортымах чал ахчазы саналчатса, тоғынҷының хоза тоғыс ӱчӱн паза пасха даа тӧлеглері санға алылчалар. Республиканың полған на имнег туразының тоғыс оңдайлары пасхалалча, аннаңар ортымах чал ахчазының сині ідӧк полған на учреждениеде пасхалалча. Че пеер имнег туразы администрациязының (ӧӧн имҷі, аның орынҷылары) чал ахчазы кирілбинче.
2018 чылның 1 январьынаң имҷілернің ортымах чал ахчазы республикадағы ортымах чал ахчазынаң 200 %-ке кӧдіре поларға кирек, ортын паза кічіг имнег тоғынҷыларының-100 %-ке. Хакасияның хазых хайраллаҷаң министерствозы устағ-пастааның таниинаң, килчеткен чылда президенттің чахығлары толдыразынаң толдырылар паза имнег тоғынҷыларының чал ахчазы кӧрілген синге кӧдірілер.
Ідӧк тоғазығда социальнай полызығлар пиреріне 2018 чылдаң кирілер алызығлардаңар чоох парған. Наа чылдаң пір хати пирілчеткен 1 млн салковай тӧлег аалзар паза 50 муңнаң асхынах чуртағҷылығ городтарзар (оларға Сорығ паза Абаза кірчелер) тоғынарға килчеткен имҷілерге пиріл турар. Ідӧк пір хати пирілчеткен 500 муң салковай тӧлег фельдшер-акушер пункттарынзар істенерге килген фельдшерлерге тӧлелер. Таныхтирға кирек, килчеткен чылдаң пу тӧлеглер кӧстегліг поларлар. Оларны специалист тоғынарға килген орында чурт аларына хорадарға чарадылар.
2018 чылда пӧзік ӱгредігліг тоғынҷыларға полызығлығ тӧлег (150 муң салковай) пирер программаның тоғызы узарадылар. Ідӧк аалда он чыл азыра істен салған, 2015 чылның 1 январьының алнында социальнай полызығлар алған имнег тоғынҷыларына паза 2015 чылның 1 январьының алнында тынаға сыххан, имнег киреенде 10 чылдаң асхынах нимес тоғынған кізілерге чарытхы, чылығ, хара тас ӱчӱн тӧлеен ахчаның компенсациязы пирілче. Аның сині 485 салковайға тиңнелче. Хакасияның хазых хайраллаҷаң министрі социальнай полызығ пирерінеңер законзар алызығлар кирер пастағнаң сыххан. Ол ай сай пирілчеткен компенсацияның синін ікі хати ӧскірібізерге чӧп пирген.
Социальнай полызығлар аларынаң палғалыстығ сурығлар полза, тоғынҷыларға имнег туразының устағ-пастаанзар айланарға кирек.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы