ЧАЙААЧЫ УСТАРНЫ ТАНЫХТААННАР
26.12.2017
Хабарлар
Ирткен неделяда Ағбанда С.П.Кадышевтің адынаң культура кінінде Хакасияның пӱӱл пайрамнығ частарын толдырған писательлерні алғыстааннар.
Хакасия правительствозының адынаң писательлерні республика пазының орынҷызы Ирина Смолина алғыстирға килген. Ол писательлерге, чылығ сӧстерін читіріп, чонны ниме сағыссыратчатханын пазарға алғаан. Анаң Ирина Геннадиевна пайрамнығ частарын толдырған паза литературада пӧзік чидіглерге читкен писательлерге сыйыхтар читірген.
Іди Хакасиядағы писательлер пірігізінің кнес орынҷызы, поэт Юрий Ивановха Хакас Республика правительствозының Аарластығ пічиин пиргеннер. Ағаа хоза Хакасиядағы Улуғлар чӧбі президиумының адынаң Ағбандағы Улуғлар чӧбінің кнезі Виктор Чепчигашев Юрий Ивановха «Чахсы киректер ӱчӱн» халых орденін кӧксіне хазаан.
Анаң Ирина Смолина, литературада пӧзік чидіглері паза «Чиңіс ӧрінізі» книгазы Н.Г.Доможаковтың адынаң литература сыйиина турысхан ӱчӱн, ахчалығ сертификат писатель паза хабарҷы Анатолий Султрековха читірген. Сыйых алған писатель позының нандырығ сӧзінде «Хабар» газетаның редакциязын аның пу чайаачы тоғызын марыға сығарған ӱчӱн алғыстаан.
Хакасия пазының - Хакасия правительствозы кнезінің прозада, поэзияда М.Р.Баиновтың адынаң литература сыйиина турысхан кибелісчі Наталья Ахпашева, че ол пу пайрамға кил полбаан.
Ідӧк литературада чидіглері ӱчӱн, чыл сай чииттерге Хакасия пазының ӧнетін ікі стипендиязы пирілче. Пӱӱл андағ стипендияны Н.Ф.Катановтың адынаң Хакас хазна университедінің студенті, Харатаста чуртапчатхан 19 частығ Светлана Акатова паза Асхыс аймаандағы Катанов аалның чуртағҷызы 23 частығ Василий Пахтаев алғаннар.
Анаң пайрамнығ частарын таныхтаан писательлернің паза поэттернің чоохтарын паза кибелістерін Ағбандағы олған искусство школазының ӱгренҷілері сценадаң хығырғаннар. Іди Юрий Ивановтың, Геннадий Маерковтың, Алексей Козловскийнің, Валентина Татарованың кибелістерін паза Геннадий Синельниковтың, Лариса Катаеваның паза Радион Топоевтің чоохтарын, прай кӧңнілерін салып, Андрей Ултургашев, Дмитрий Боргояков, Мария Кириллова, Анна Судочакова, Арис Амзараков хығырғаннар. Ӱгренҷілернең устаан режиссер Саяна Ултургашева.
Анаң Хакасияның культура министрі Татьяна Чаптыкова, пу адалған писательлерні алғыстап, оларға Аарластығ пічіктер паза сыйыхтар читірген.
Пу пайрамнығ чыылығны Хакасияның чайаачылар туразы (устағҷы Надежда Бурнакова) паза Хакасиядағы писательлер пірігізі (кнезі Альбина Курбижекова) тимнеп, иртіргеннер.
Автор :
Илья ТОПОЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы