ХЫҒЫРЫҒҶЫЛАРНЫ ЧАЗАҒЛЫҒ УДУРЛАПЧА
27.12.2017
Хабарлар
Наа чыл ӱлӱкӱні алнында Ағбан городтағы паза прай даа республикадағы учреждениелер постарының тураларын сіліг чазап сыхханнар.
Іди Н.Г.Доможаковтың адынаң национальнай библиотекада (устағҷызы Ю.В.Костякова) «Наа чылның кӧдірілістіг кӧңні» марығны пастағызын на иртірділер. Пу марығның спонсорпары - «Единая Россия» партияның Хакасиядағы региональнай пӧлии, «Марафет» клининговай компания паза «Слаткарница» садығ туразы.
Библиотека тоғынҷылары хығырығҷыларның паза аалҷыларның кӧңнілерін кӧдірерге матап кӱстенгеннер. Іди библиотекадағы национальнай паза краеведение хабарларының кіні хакас этниказынаң тузаланған. Хакастар мының алнында Наа чыл сыбызын чазабаҷаң полғаннар, аннаңар пістің ӱзінҷі хадылындағы холлда ах ӧңніг ағазах турғызыл парған. Пеер килген аалҷылар паза хығырығҷылар ол ағасха аймах ӧңніг чаламалар палғапчалар. Іди олар постарының сағынған сағыстары толзын тіп алғапчалар. Ах ӧңніг чалама ол хазых сурынғаны полча. Чахсы ӱлӱс сурап, кӧк чалама палғапчалар, хан тигірзер айланчалар.
Ағазахтың тӧзінде кічиҷек тадар ибіҷегі паза ат палғаҷаң сарчын хыринда хулунах турчалар. Олар Наа чыл сӧбіреде удурлаҷаң ӱлӱкӱн полчатханын таныхтапчалар. Туғаннар удур-тӧдір аалласчалар.
Национальнай паза краеведение кінінің хығырығҷылар залындағы кӧзенектерде пістің пурунғы хайалардағы хоостар чайал парғаннар: кииктер паза антропоморфнай сырайлар. Ідӧк «Наа чылнаң!» хакас тілінең пазыл парған.
Ааллап килген хығырығҷылар ӧнетін турғызылған абдыраҷахтаң постарына Наа чылның алғыстастарын сығарып алчалар паза, кӧңнілері пар полза, библиотека тоғынҷыларына постарының алғыстарын пасчалар.
Аннаңар хығырығҷылар, национальнай паза краеведение кінінзер пістің республиканың прай тархынынаңар книгалар хығырарға киліп, чазалған орында пол парчалар. Кӧңнілері сах андох кӧдірілче. Наа чылнаң сірерні!
Автор :
Марина АЕВА, национальнай паза краеведение кінінің устағҷызы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы