OЛҒAHHAPFA ӰЛӰКӰН ӦРІНІС СЫЙЛАПЧА
27.12.2017
Хабарлар
1-ғы рядта: Влад АЕВ, Никита АЧИТАЕВ.
2-ҷі рядта: Ксения БОРГОЯКОВА, Максим АМЗАРАКОВ, Алина САГАЛАКОВА, Алиса ПАХТАЕВА
Пу кӱннерде A.M. Топановтың адынаң Хакас драма театрыңа республиканың чахсы ӱгренчеткен, таланттығ ӱгренҷілеріне Правительство сыбыҷаа ирткен.
Пӱӱл андар республиканың аал-городтарынаң 600-че олған килген. Оларның санында ӱгредігде чахсы чидіглерге читкен ӱгренҷілер, аймах олимпиадаларның, чайаачы паза спорт марығларының чиңісчілері. Ағаа хоза, ӱлӱкӱнге килгеннер республиканың олған тураларының паза коррекционнай школаларының ӱгренҷілері.
Олар ідӧк пу чылда уғаа чахсы чидіглер кӧзіткеннер. Аннаңар пеер иң артыхтары чыылыс парған тізе, саба полбас.
Ӱлӱкӱнге чыылған олғаннарны театрның фойезінде хубулған актёрлар удурлааннар. Олар ӱгренҷілерге аймах ойыннарнаң, хормачы чоохтарнаң эрінерге пирбееннер. Театрға толдыра олған-узахтың суулазы, хатхы-кӱлкізі тараан. Оолағастар паза хызыҷахтар артисттернең хада теелбектенгеннер, ойнааннар, хынығ тус иртіргеннер.
Анаң, прайзы театрның улуғ залында чыылыс парғанда, олғаннарзар Хакасия пазының пастағы орынҷызы Олег Нам айланған. Ол прайзын чағдапчатхан ӱлӱкӱннең алғыстаан паза аннаң андар ідӧк кӱстеніп ӱгренерге алғаан.
Соонаң пайрам «Сапогтығ хоосха» нымахнаң узарадылған. Ол сах андох прай палаларның хайиин тартхан, ӱгренҷілер ойынны харах албин кӧргеннер. Мындағ кирек Хакасияның ӱгредіг паза наука министрінің орынҷызы Юрий Сагалаковты чӧпсіндірген.
Хайди ол таныхтаан, палаларның хатхы-кӱлкізін истіп, ачых-чарых кӧңнілерін кӧріп, оларға улам на кӧп чахсы ниме идерге кӱс кірче. Анзы андағ, олғаннарның чарых кулімзірезін кӧре, пу даа кізінің кӧңні кӧдірілче. Аннаңар мындағ ӱлӱкӱн иртірілчеткені уғаа чахсы. Ол олғаннарға даа, улуғларға даа ӧрініс сыйлапча.
Наа чыл пайрамына хубулған палаҷахтар ойын соонаң костюмнарынаң сынасханнар. Кем не мында полбаан: хозан, адайах, хар хызыҷах, хуу хат, хакас алып, ковбой паза даа пасхазы. Олғаннар хубуларға тастабинчатханы уғаа чахсы, ол пайрамның кӧңнін кӧдірче нооза. Іди ойын соонаң даа ӱлӱкӱн тоозылбинчатхан. Тыс пілбинчеткен артисттер программаларын аннаң андар узаратханнар. Олар ӱгренҷілерні, сыбыны ибіртіріп, аймах ойыннаң паза кӧзідігнең ӱтертіргеннер. Пу чарых ӱлӱкӱннең прайзы кӧгліг паза тадылығ сыйыхтығ нанған.
- Мында уғаа хынығ. Прайзы ӧрчіліг, ачых-чарых кӧңніліг, аймах марығларда араласча, тадылығ сыйыхтар алча. Актёрларның ойыны кӧңніме уғаа кірген, - сыбыҷах пайрамынаңар чоохтаан Хакас национальнай гимназияның 6-ҷы класстың ӱгренҷізі Ксения Боргоякова. Ол, «Лира» хорның араласчызы полып, пу чылда Швецияда чоннар аразындағы фестивальда пол килген.
Асхыс аймааның ӱгредіг киреенҷе ӧӧн специализі Неля Какаева чылдаң аймахтағы иң артых ӱгренҷілерні пеер ағылча. Іди пӱӱл Асхыс чирінең 20 пала килген. Хайди таныхтапча Неля Трофимовна, Правительство сыбыҷаана олғаннар хынып килчелер. Аннаңар Наа чыл костюмнарын азынада тимнеп пастапчалар.
Таныхтирға кирек, Правительство сыбыҷаа чыл сай Ағбанда иртче. Аны республиканың ӱгренҷілері чидікпин сағыпчалар. Че анда аралазар ӱчӱн, оларға чахсы ӱгренерге паза чуртаста ӧткін поларға киректелче. Аннаңар Хакасияның ӱгренҷілеріне, ӧӧн сыбыҷахсар килер ӱчӱн, чыл тооза тимненерге килісче.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы