НАА ЧЫЛ - АЙМАХ ЧОННАРНЫ ПІРІКТІРЧЕТКЕН ӰЛӰКӰН
29.12.2017
Хабарлар
Михаил ПОБЫЗАКОВ чыылған чонны Наа чылнаң алғыстапча
Декабрьның халғанҷы кӱннерінде С.П.Кадышевтің адынаң культура кінінде чоннар аразындағы Наа чыл иирі ирткен. Анда хакасгар, орыстар, немецтер, чуваштар, кореецтер, узбектер, таджиктер араласханнар.
Наа чылға чарыдылған иирні Хакасияның национальнай паза территориальнай политика, культура министерстволары 2005 чылдаң сығара тӧреміл иртірчелер. Мероприятиенің ӧӧн пӧгіні - пістің республикада чуртапчатхан чоннарны піріктірері.
Кізілер пай салылған столлар кистіне одырғанда, пайрам пасталыбысхан. Чыылған чонны чалахай ӱлӱкӱннең национальнай паза территориальнай политика министрі Михаил Побызаков алғыстаан. Ол ирткен чылның салтарларын искірген, халых пірігістеріне паза диаспораларға, аймах акцияларда, мероприятиелерде ӧткін араласчатхан ӱчӱн, улуғ алғызын читірген. М.А.Побызаков Хакасияның кӧп нациялығ чонына пик хазых паза часкалығ чуртас алғаан. Аның алғыстас сӧстеріне культура министрінің орынҷызы Лариса Киштеева хозылған. Ол республика чуртағҷыларына Наа чыл чахсы ла ниме ағылзын тіп алғаан. Пайрам тузында алғыстастар кӧп полған, халых пірігістерінің паза диаспораларның кізілері, чон алнынзар сығып, чылығ сӧстер читіргеннер паза чайаачыларынаң ӧріндіргеннер.
«Алтынай» хакас ипчілер пірігізінің паза Г.Батцтың адынаң немец культура кінінің кізілері ырлааннар. Чарых ӱлӱкӱнге чарыдылған сарыннар аймах тіллернең толдырылғаннар. «Чосон» диаспораның араласчылары амғы корея теелбектерін толдырғаннар.
Чоннар аразындағы Наа чыл ииріне кізілер хынып чӧрчелер, анзы тиктең нимес. Мындағ пайрамнар халых пірігістеріне паза диаспораларға, стол кистінде одырып алып, удур-тӧдір пілізерге, ынағлазарға оңдай пирче.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы