ЧАРЫ, ЧАРЫ, СЫБЫҶАХ!
29.12.2017
Хабарлар
Пӱӱл республиканың ӧӧн сыбызы паза Наа чылға удур ӱлӱкӱн иирі пайрамни Хакасия правительство туразы алнында, Пастағы май площадьында, 26 декабрьда азылған.
Ағбанның чуртағҷылары паза аалҷылары ойыннарны, Наа чыл сыбызының ӧңнерін паза салютты кӧріп аларға чыылысханнар.
Пу кӱнде чирібісте хысхы тус ээленібіскен тиирге чарир. Кӱнӧрте паза иирзер хар чаап турған полза, ӱлӱкӱн пасталарынаң ол кинетін тохтап парған. Анзын хысхының хайхастарының пірсі полча тиирҷікпін. Харыҷах чонға ойыннарны ипти кӧріп аларға харығ полбас ӱчӱн тохтап парған полбас па за.
Пастағы май площадьында чазалған Наа чыл сыбызы хайығ тартхан. Ідӧк пустаң тимнелген сӱлейке осхас пӱдіріглер турғлапчалар. Республиканың ӧӧн сыбызы ибіре пустаң иділген Соох Апсахнаң Хар хызыҷах паза чыл гороскобының танығлары турғызылғаннар. Аннаң пасха Хакасияның аймахтарының пустаң пӱткен танығлары полғаннар. Олғаннарға ӧрініс, тізең, ол чылғайахтар.
Мында чааҷылар «кухнязы» тоғынған. Аның хыринда чон илееде тееске турыбыстыр. Ол ачыхта гречка кашазының татхыннығ чызы тарапчатхан. «Нименең сыйлапчалар?» - хыныға сурғам. «Тушёнкалығ гречканаң. Паза ізіг чей ур пирчелер», - нандырғаннар теестегілер.
Мына Наа чыл иирінің театрализованнай кӧзідии пасталыбысты. Сценада чыл гороскобының танығлары хайынғаннар: кізі, обезьяна, петук, адай паза пасхазы. Сценазар Хар Королева нымысчыларынаң хада сыға салча. Сарын ырлап теелбектенгеннер. «Адайны минзер ағылыңар! Мин аны соохха тоңдырт саларбын!» - тіпче Хар Королева. Іди адай аның чалҷызы пол парча, Адай чылы пасталбасха чӧр. Уламох Хар Королева позының чылы килерӧк тіп хыҷанча.
Че пасха чылларның ээлері чабал Хар Королеваа харығ полчалар, килчеткен чыл таниин - Адайны - хайди даа ал халарға кирек нооза! Чоон килескілер, киліп, адайны арачылап алчалар. Прайзы ӧрчіліг «Ура-а!» тіп хысхырысханнар.
Театрализованнай ойын соонаң Соох Апсахнаң Хар хызыҷахты хығырғаннар. Олар чонны алғыстабызарға ах лимузин машиналығ ойлат килгеннер. Соох Апсах прайзын Наа чылнаң алғыстаан. Хакасияның правительство пазы Виктор Зиминге Наа чыл сыбызы ӱчӱн алғыс сӧстері читірілген.
Республика чуртағҷыларын алғыстирға Хакасия пазы орынҷызының тоғызын толдырчатхан Владимир Крафт сыххан:
- Ирткен чыл олаңай ла полбаан, алныбыста пӧкчең сурығлар ам даа кӧп. Че піс, прай кӱзібіс салып, идер тоғысты толдырчабыс. Полған на кізі пілче - чахсы чуртассар ізік позы ла азылбинча. Чыл тоозылчатса, иткен киректернің салтарларын итчебіс. Чир-суубыстың таңдағы кӱні прайзыбыснаң палғалыстығ. Республика пазы Виктор Михайлович Зиминнің чахии хоостыра сірерге алғыс сӧстерін читірчем. Сірер істеністе пӧзік чидіглерге читкезер. Мыннаң мындар ідӧк удур-тӧдір аарлазып, улуғлазып чуртаңар! Хакасия ӧңненізі ӱчӱн улуғ хозым итчезер. Алғыстапчам прай чонны пасталчатхан Наа 2018 чылнаң паза Кӧлееденең! Ӱлӱкӱн чуртыңарзар чазағлығ сыбыҷахнаң, ізеніснең килзін. Прайзына часка, ӧңненіс, пик чуртас паза хазых алғапчам!
Алғыстас сӧстері соонаң тигірзер наа чыл салюдының пызыңнапчатхан ӧң-пазы «чылтызахтары» ӧӧрлебіскеннер. Республиканың ӧӧн сыбызы чари тӱскен.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы