ӰР САХТААН САҒЫЗЫБЫС ТОЛДЫ!
10.01.2018
Хабарлар
2017 ЧЫЛНЫҢ ИЮЛЬ АЙЫНДА ИНДІРКІ СИРДЕГӀ ИРГІ ШКОЛА ОРНЫНДА НАА ПӰДІРІГ ФУНДАМЕНТІ САЛЫЛҒАНЫ ААЛ ЧУРТАҒҶЫЛАРЫН ӦРІНДІРГЕН. ИТСЕ, НАА ШКОЛА НАА ЧЫЛ ӰЛӰКӰНІНЕ ТИМДЕ ПОЛАРЫНА ПІРДЕЕЗІ КИРТІНМЕЕН. ПАСТЫХТАР ПАЗА ПӰДІРІГҶІЛЕР, ТІЗЕҢ, СӦСТЕРІНЕ ТУРЫСХАННАР - НАА ЧЫЛҒА ШКОЛАНЫ ТИМГЕ СЫҒАРЫБЫСХАННАР.
КӦРІЛГЕН ТУСХА, ЧООХТАСХАН ЧАСХА НАА ШКОЛАЗАР ІҶЕ-ПАБАЛАР, АҒА-УУҶАЛАР ПАСТЫРҒАННАР. ПІРЕЕЗІ НАА ПӰДІРІГНІҢ ИРКІНІН ПАСТАҒЫЗЫН НА АЛТААН, АННАҢАР ААЛҶЫЛАР ИБІРЕ ХАРАХСЫНҒАННАР: ПӦЗІК ПОТОЛОКТЫҒ, ЧАРЫХ ӦҢНЕРНЕҢ СЫРЛАЛҒАН СТЕНЕЛЕР. АҒЫЛАХ ХОЛЛДАҢ АЙМАХ-ПАСХА ПӦЛІКТЕРЗЕР ІЗІКТЕР ПАРҒАННАР ПАЗА ЧАЛБАХ КОРИДОР СӦӦЛІНГЕН. КОРИДОРНЫҢ СОЛ САРИНДАҒЫ ПАЗЫНДА СПОРТЗАЛ ОРНЫХЧА, ОҢ САРИНДАҒЫ ПАЗЫНДА - СТОЛОВАЙ. ӰЛӰКӰН АЛНЫНДА ХОЛЛ ІДӦК КИЛІСТІРЕ СІЛІГЛЕЛГЕН, АНЫҢ ОРТЫЗЫНДА АЙМАХ ОЙНАҶАХТАРНАҢ ЧАЗАЛҒАН СЫБЫҶАХ ТУРҒАН, ОЛ ІДИ ДЕЕ ТАНЫҒЛЫҒ КӰНГЕ КІЗІ КӦҢНІН УЛАМОХ КӦДІРЧЕТКЕН.
Ӱгретчілер дее, олғаннар даа республика пастыхтары килчеткеніне тың чӱрексееннер. Улуғ аалҷылар тӧреміл килбинчелер, наа пӱдіріглер дее удаа азылбинчалар нооза, уламох республиканың ыраххы аалларында. Ӱр сахтаан сағыс толдырылғанда, андағох чылығ паза аллығ алғыс сӧстері читірілген.
- Наа школа уғаа кӧңніме кірче, чарых кабинеттер, ӱгретчілерге, ӱгренҷілерге амғыі тусха килістіре оңдайлар тӧстелгені ӧріндірче! Наа школа аалныі пілдірте кӧдірче. Кӧңнібіс мыннаң мындар уламох кӱстеніп тоғынарына кӧдіріл парды! Алғыс читірчебіс пастыхтарға: Виктор Михайлович Зиминге, Владимир Николаевич Штыгашевке, Лариса Николаевна Гимазутинаа, аймах устағ-пастаана паза пасхазына! - чуртағҷылар адынаң алғыстаан англия тілі ӱгретчізі Раиса Максимовна Дорофеева.
Улуғ опыттығ ӱгретчі пу школада ла 40 азыра чыл істен парир, ол санда 18 чыл директор полған. Аннаңар ол школаның, аалның чуртазынаң чахсы таныс. Аның холында пастағы ӱгренҷілерінің пала-пархалары ӱгренчелер. Ӧӧн тоғызынаң пасха Раиса Максимовна халых тоғызынаң айғасча, аал чӧбінің депутады паза ветераннар чӧбінің кнезі полча.
Наа школаны кӧрерге маңзырапча 67 частығ аға Пётр Васильевич Канзычаков. Ол тӧрт паланың пабазы, 15 парханың ағазы полча. Палаларының ӱзі Индіркі Сирде чуртапчатханда, пархаларының кӧбізі ідӧк аалдағы школада ӱгренче, піреезі, тізең, андар чӧрерге тимненче. Пётр Васильевичтің чооғынаң, ол пӱдіріг тузында андар чӧрбеен, аннаңар школаны кӧрерге хайди даа парарға чаратхан. Пархаларына наа школада ӱгренерге ӱлӱс тӱскеніне ӧрінче.
Аалда чиит іҷелер кӧп, оларның пірсі Валентина Николаевна Бутотова тіпче:
- Наа школа тузында пӱдіріл парғанына тың ӧрінчебіс. Сахтап алдыбыс. Минің школаа ікі пала чӧрче: 8-ҷі классха Виктория паза 7-ҷі классха Альберт. Очы палам Эльдарға пір час ла, че ол даа пу школаның ӱгренҷізі полар.
Школа хайдағ даа городта, аалда ӧӧн социальнай пӱдіріглернің пірсі полча, аннаңар ағаа улуғ хайығ салылча. Индіркі Сирде пастағы школа 1913 чылдох азылған, ол пастағы пілістерні пиреріне ле кӧрілген полза даа, чуртағҷыларны пічікнең паза саннаң таныстырған. 2013 чылда, тізең, школа 100 чылын таныхтаан. 100 чыл - танығлығ пайрам. Че олох туста пілдістіг полған: аалға наа школа кирек. Пу чылларға 1978 чылдох аалзар кӧзірілген школа туразы пілдірте иргілен парған. Ағаа хоза, ол наа пӱдіріг полбаан. Аны Аңзастаң ағылғаннар. Изелібіскен школа туразы чир тітірееніне сыдаспаан, стенелернің пірсі чіктел парған.
2017 чылда республика ӱлгӱлерінің кӱстенізінең федеральнай кінде чарадығ алылған: Хакасияның ікі аалында - Ӱӱсте паза Индіркі Сирде - школалар пӱдірерге. Хакасия пазы Виктор Зимин Россияның ӱгредіг паза наука министрі Ольга Васильеванаң февральда тоғасхан соонаң чӧптезіг иділген, хайзының хоостыра школалар пӱдіриине «Модернизация образования» федеральнай программаҷа ахча пирілген. Индіркі Сирдегі школа пӱдіриине ле 79 миллион салковай позыдылған.
- Мин пір ле хати таныхтабаам - аалдағы олғаннарның городтағы олғаннарнаң тиң оңдайлар поларға кирек, - чоохтанған Хакасия пазы Виктор Михайлович Зимин школаны асчатхан пайрамнығ мероприятиеде. - Наа школа азылчатханы - аалдағыларға ӧріністіг тус! Наа класстар, оборудование, оңдайлар - ол наа чидіглерзер чол! Піс, аалларда амғы тусха килістіре школалар пӱдірерге оңдай пирілчеткен ӱчӱн, пістің президент Владимир Владимирович Путинге алғызыбыс читірчебіс.
- Мин сірернең хада ӧрінчем, Индіркі Сирнің чуртағҷьілары! - айланған чуртағҷыларзар Хакасияның Ӧӧркі Чӧбінің кнезі Владимир Николаевич Штыгашев. - Сірер ызых аалда чуртапчазар. Наа школа маңнаныстығ чиит тӧлні ӧскірерге полызар!
Пастыхтар пӱдірігҷілерге паза пӱдіріг ӱчӱн нандырығлығ специалисттерге алғыстас пічіктерін читіргеннер. 70 орынға кӧрілген школаны пис азыра айға пӱдірібізерге ниик ле полбаан сағынчам, че пӱдірігҷілер кӧрілген тусха тиксі тоғыстарны тоос салғаннар. Наа школаның клӱзі 2-ҷі класстағы ӱгренҷі Алёна Полютинаа читірілген.
Школа устағҷызы Татьяна Павловна Канзычакова ідӧк прай синдегі пастыхтарға алғыс сӧстерін читірген паза мыннаң мындар чахсы ла салтарлар кӧзідерге молҷаан. Ӱгренҷілер дее наа пілістерге тартыларға, кӱстеніп ӱгренерге сӧс пиргеннер.
- Наа школаны иргізінең тиңнестір полбассың, - тіпче 7-ҷі класстың ӱгренҷізі Виолетта Канзычакова. - Мында чарых, истіг класстар, улуғ спортзал. Піс наа чидіглерге чидерге уламох кӱстенербіс!
Физкультура ӱгретчізі Ольга Васильевна Канзычакованың чооғынаң, олғаннар 3-ҷі класстаң сығара волейболға чӧрчелер. ГТО-ның сыныхтағларында чахсы салтарлар кӧзітчелер. Пӧгін турча алтын таныға чидерге. Спортнаң ӧткін айғасчаттырлар Виолетта Канзычакова, 6-ҷы класстағы ӱгренҷілер Ангелина Канзычакова паза Александр Тюмереков. Чахсы ӱгренчеткен олғаннарның санында Алина Тодоякова, Элла Уксекова, Андрей Сыргашев, Дмитрий Тюмереков, Виктория Бутотова.
- Школада прай 46 пала ӱгренче, - чоохтапча школа устағҷызы Татьяна Павловна. - Ол санда 10 пала школа алнындағы тимнегліг классха чӧрче, 21 пала пастағлығ класстарда ӱгренче, пасхазы -5 - 8 класстар ӱгренҷілері. Улуғ класстардағылар ӱгредігні Таштып аалның школаларында узаратчалар.
Зинаида Семёновна Патачакова школада 20 чыл істен салтыр. Ӱгретчі хакас паза орыс тілі, литература уроктарын апарча. Наа школада аның алынҷа класс, сағам анда орыс писательлернің не сомнары ілілік, че соонаң хакас таа, орыс таа тіллеріне килістіре искірігліг стендтер поларына ізенче.
- Ӧӧні - олғаннарға, ӱгретчілерге амғы оңдайлар тӧстелгені: килістіре класстар, оборудование, - сағызынаң ӱлесче ӱгретчі. - Наа школа наа киртініс, кӱс пирче.
Пӱӱл школа наа пайрамын наа турада таныхтир. 105 чыл! Наа тура нинҷе-нинҷе тӧлге кӧрiлген, ол, тізең, тайға хыринда орныхчатхан аалға ол синӧк чыл пирче. Школалығ аалзар чон тартылча нооза.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы