ИҢ ТУРЫСТЫҒЛАРҒА - ХАЗНА СЫЙЫХТАРЫ
10.01.2018
Хабарлар
Виктор Зимин ирткен чылның халғанҷы кӱннерінде Хакасия правительствозының чыылиин иртірген. Чылның халғанҷы чыылиинда регион устағҷызы министрлерге Наа чыл ӱлӱкӱннерін хорғыс чох иртірібізерінҷе пӧгіннер турғысхан паза республиканың пӧзік чидіглерге читкен чуртағҷыларына хазна сыйыхтарын читірген.
Хакасияның пазы ідӧк пу чыылығда Россия президентше табығ кампаниязы пасталыбысханына хайығ айландырған.
- Хакасияда пу табығлар турыстығ, Россияның Конституциязына килістіре ирт парарға киректер: азых паза сын оңдайнаң, - пӧгін турғысхан Виктор Зимин.
2017 чылның салтарларын иткен оңдайынаң, тізең, республиканың иң турыстығ чуртағҷыларына хазна сыйыхтары читірілген.
- Алғыстапчам сірерні пу танығлығ кирекнең. Хакасия правительствозы паза позымның адынаң алғызым читірчем прайзына, сірер, постың предприятиезінде, учреждениезінде тіспен істеніп, тӧреен республикабыстың тилізіне улуғ хозым итчезер. Піди нандырығлығ тоғынчатханыңар паза, тоғасчатхан сидіксіністерге хайбин, турғысхан пӧгіннерге чидіп алчатханыңар ӱчӱн алғыс. 2018 чылда прайзына наа чидіглер, часка, пик хазых паза чахсы чуртас алғапчам, - алғыстаан Хакасияның пазы Виктор Зимин.
«За заслуги перед Хакасией» орденнең ікі кізі таныхтатхан. Оларның пірсі чаа, істеніс, Тирігліг кӱстер паза право хайраллаҷаң органнар ветераннары (пенсионерлері) халых пірігізінің Хакас региональнай пӧлии чӧбінің кізізі Евгений Смирнов, ол, пістің республика наа ла тӧстелгенде, Хакасияның Министрлер Чӧбінің кнезі полған. Ікінҷі кізізі, кем пу аарластығ сыйыхха турысхан, - Хакасияның чон артизі, ырҷы, композитор паза «Хайҷы» хакас эстрада ӧмезінің устағҷызы Герман Танбаев.
«Хакасияның саблығ транспорт тоғынҷызы» аарластығ ат Хызылчардағы тимір чолның поездтер чӧрізін хорғыс чох идерінҷе ӧӧн ревизорның орынҷызы Станислав Кобылянскийге пирілген. Хакасияның Аарластығ пічіктерінең таныхтатханнар: «Сибирский регион» ООО-ның директор орынҷызы Винера Степанова, Асхыс аймаа администрациязының градостроительнай паза чурт политиказынҷа управлениезінің энергетикаҷа ӧӧн специализі Зоя Бутонаева, Аршаннардағы культура туразының хормейстері Алефтина Бурнакова, «Коммунардағы рудник» ПАО-ның чир алтындағы тоғыстар маркшейдері Флюра Ефименко, олох предприятиенің ӧӧн бухгалтері Лариса Корецкая паза водительі Владимир Опенько.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде