ХАКАС ЭТНО-РОКТЫҢ ХАННАРЫ
12.01.2018
Хабарлар
Наа чылның тынағ кӱннері Хакасияның чуртағҷыларының сағызында ӱрге халар, неке. Піс прайзыбыс, экраннардаң харах албин, «Чылтыс» телеканалда тиксі Россиядағы «Наа чылтыс» марығның финалын кӧріп, «Иренек Хан» ӧменің ӱчӱн «ағырғабыс», ӱн пиргебіс.
Марығ хазыр парған. Анда Россияның прай регионнарынаң 85 араласчы узынаң сынасхан. Оларның узын пілістіг жюри паалаан: композитор, Россия искусствозының саблығ деятельі Максим Дунаевский, Россияның чон артизі Дмитрий Харатьян, саблығ телеведущай Юрий Николаев, опера режиссеры Василий Бархатов паза ырҷы, Россияның саблығ артизі Зара.
Финалға жюри 12 ле араласчыны таллап алған. Олар Москвадаң, Татарстаннаң, Адыгеядаң, Пермь крайынаң, Алтынзархы Осетия-Аланиядаң, Архангельск, Вологда, Владимир, Курган, Свердловск, Ярославль областьтарынаң паза Хакасиядаң полғаннар. Республиканың чуртағҷылары пістің музыканттар постарын турыстыра кӧзідерлер тіп ікінҷілебееннер. «Иренек Хан» республиканың иң хынчатхан ӧмезі полча. Ол 2007 чылда тӧстелген. Он чыл аразына чайаачы устар кӧп чидіглерге читкеннер. Кӧзідімге, пылтыр ӧме, тиксі Россия синінде иртірілген «От ыры» марығның чиңісчізі полыбызып, Гран-приге турысхан. Музыканттар сольнай концерттер тӧреміл иртірчелер, фестиваль-марығларда араласчалар. «Иренек Хан» ӧменің араласчылары пір ле хати алыспааннар. Амды анда пис кізі: устағҷы Игорь Колесников (барабаннар), ырҷы Юлия Тиникова (хобырах, тимір хомыс), музыканттар Аржан Туденев (хай, ыых, хобырах), Иван Колов (бас-гитара), Алексей Брюханов (гитара).
Марығ оңдайларынҷа «Иренек Хан» саблығ сарынны толдырарға кирек полған. Таллағ чардығында таланттығ чир-суғҷыларыбыс Виктор Цойның «Кӧӧк» ырын сарнааннар. Аны ӧменің солизі Юлия Тиникова морсымнығ толдырыбысхан. Аржан Туденев, тізең, хоза хайлап пирген паза шоорнаң ойнаан. Анзы кӧрігҷілерні дее, жюридегілерні дее таңнатхан. Композитор Максим Дунаевский, сағыстарынаң ӱлезіп, таныхтаан: «Сын рок мындағ поладыр. «Иренек Хан» ӧме рок-музыканаң чуртапча, аннаңар хай даа, чон кӧг тиріглері дее мында чахсы истілчелер».
Чарым финалында, ол 5-6 январьда ирткен, чайаачы устар «Хайдазың син, хыныс?» сарынны толдырғаннар. Аны композитор Игорь Корнилов поэт Инесса Каминскаяның кибелізіне пас салған. Олох сарынны «Иренек Хан» ӧме финалда сарнаан. Пістің музыканттарның узына Россияның кӧрігҷілері аптаттырғаннар. Кізілер, чир-суғҷыларыбысты махтап, «Наа чылтыс» марығның «Вконтакте» социальнай сетьтегі группазында кӧп комментарий пасханнар, ӱн пиріп, смс ысханнар.
Чоохтирға кирек, пӱӱл «Наа чылтыс» марығда ікі чиңісчі полған. Пастағызын жюринің кізілері таллааннар, ікінҷізін - кӧрігҷілер. Эксперттернің таниинаң, прайзын Москвадағы «Ки? Туа!» ӧме асхан. Кӧрігҷілернің кӧңніне Адыгеядағы «Coffeetimeband» ӧме кірген. «Иренек Хан» кӧрігҷілер ӱн пирген хоостыра тӧртінҷізі полыбысхан. Чоохтирға кирек, смс-наң ӱн пиргеніне кӧрігҷілер хоратхан прай ахча Константин Хабенскийнің полызығлығ фондынзар парыбызар. Ол фонд онкология ағырығларынаң ағырчатхан палаларға полысча.
9 январьда араласчыларны Москвада чеестееннер. Чиңісчілерге сыйыхтарны Россияның арачыланыс министрі Сергей Шойгу читірген. Пістің музыканттарны улуғ чидігнең Хакасияның пазы Виктор Зимин алғыстаан. Губернаторның таниинаң, «Иренек Хан» Россияның иң артых пис араласчызы санына кіргені улуғ чидіг полча. Ол музыканттарға мыннаң мындар тӱзімніг тоғынарға алғаан.
2017 чылда кӱскӱзін «Иренек Хан» ӧме В.Г.Чаптыковтың адынаң Хакас филармониязынзар тоғысха алылған. Ізенчебіс, тӱрчедең тиксі Россияа саблан парған чир-суғҷыларыбыс пістің кӧрігҷілерні наа концерттернең ӧріндірерлер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде