ТӦӦЙ НИМЕС ЧИҢІСТЕР
16.01.2018
Хабарлар
Чир-суғҷыларыбыс ӱчӱн «ағырарға», оларны чиңіске кӧӧктірерге уғаа килістіре кӱннер полғаннар 13-14 январьда. Айас, тың соох нимес, чил чох кӱннерде ноға арығ киинең тынып албаҷаң, пістіңнерні чахсы ойнирға кӧӧктіріп, ӱн харылғанҷа хысхырбаҷаң.
Кӧрігҷілернің оңдай-хылиин оңарарға сидік арах. Аалҷыларның хаалхазына Александр Захваткин ӱс гол кирібіскен, пу чидігде тохтирға сағынминчатхан. Кізілер, тізең, «Русла-ан!.. Гавричко-ов!» тіп хысхырысчалар. Анзы, андағ суулас-хысхырысты истіп, кӧрігҷілерні ӧріндірерге харасхан чіли, суббота кӱн, ойын тоозылчатханда, ікі гол кирібіскен. Тоғазығ 11:0 саннаң тоозылған.
Саңай пасха оңдайнаң ирткен позырахтағы тоғазығ. Таң пістіңнер аалҷыларны нимее салбиныбысханнар ба, таң киҷеегізінде кӱс кӧп хоратханнар ба, че ойынның пастағы чардығы 2:0 саннаң тоозылған. Хомзынысха, Новосибирсктең килген команда утчатхан. Кӧрігҷілер дее, кӧңнілерін тӱзіріп, ай-сым одырғлапчатханнар. Нӧӧс, пістіңнер утыр саларлар? Чох, іди полбасха кирек. Ибде стенелер дее полысча тіпчелер нооза.
Тоғазығның ікінҷі чардығында Александр Захваткиннең Алексей Башарымов пірер гол кирібіскеннер. Саннар тиңнес парғанда, кӧрігҷілер дее «тіріліп» пастабысханнар, хысхырыс сыхханнар. Евгений Ткачук пістің команданы алнынзар сығарча. Тынарға ниик полыбысханда, саннар пазох ла тиңнес чӧрібіскеннер. Ойын тоозылар алнында ла Александр Захваткин чиңіс голын кирібіскен. Тоғазығ 4:3 саннаң тоозылған. Сынап таа пірсі пірсіне тӧӧй нимес чиңістер.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы