ПІРСІНДЕ...
17.01.2018
Хабарлар
Наа ла тоғынып пастапчатханда, улуғ частығ арғыстарым піди ӱгретчең полғаннар: аймах чорыхтар, тоғазығлар тузында пазылған танығлығ блокнотты хаҷан даа тастабасха, чыып сал турарға. Сынап таа, соонаң хати хығырарға хынығ полтыр, наа сағыстар тӧрітче, ирткен туссар айландырча.
Амды хапчых тӱбінде сӱӱл халған хай пірее танығнаң таныстырыбызим. Хабарҷы полып, ӧӧнінде спорт сурығларын чарыдарға киліскенде, мында даа чоох-чаах аннаң ибіре парар. Марығлар тузында даа хатхырызып алчабыс.
Іди пірсінде Хакас драма театры Тувазар ойыннар кӧзідерге чол сығыбысхан. Хап-сорт улуғ ӱлӱкӱнге орта партырлар. Хызыл городтың ӧӧн стадионына кізі сыыспинчатхан осхас. Пістіңнерні, улуғлап, тӧрзер иртірчелер, чахсы орыннар таап пирчелер, ӱлӱкӱннеңер чарыда чоохтап пастабысчалар.
Аймах ойыннар, спорт марығлары прайзының хайиинда. Пістіңнер ікі чарылыбыстылар: иреннер спорт мариин кӧрчелер, ипчілер ыр-сарынзар сабыл парыбыстылар. Паза ла сизінзелер, хап-хара хойығ сағалын кӧксіне читіре ӧскір салған артист Данил Анжиганов кӱресчілер аразында тур тастабыстыр, оңнығ ла хысхырбинча, кемні-де чиңіске кӧӧктір парча.
Сах ол туста иң аар кӧдірімде чиңіс тутхан алып-кӱлӱк, кибір хоостыра хара хустың теелбегін толдырыбызып, кӱрес мариина салылған ӧӧн сыйыхты холға кирерге тимненібістір. Чир-суғҷыбыс андағ кирекнең чараспинчатхан осхас. Хайдағ даа чонның ӱлӱкӱні тузында кӱрес мариинда чиңіс тутхан алып позынаң тоғыр сыхчаң кӱлӱк пар ба тіп сурарға кирек. Арса, піреезі сығар?
Орындағы чуртағҷыларға хынығ даа пілдірібісті: нӧӧс, пу ирен оларның саблығ кӱресчізінең харбазарға тимненібісті? Артист Анжиганов сынап таа кип-азахтарын суурып пастабыстыр. Тува чонның кӱрезінде позының оңдай-кибірлері пар. Оларның ікізі дее кӱрес алнында паза харбазығда чиңіс тутханы хайди даа хара хустың теелбегін толдырча. Артист кізі поғда кӧрімніг дее полза, хомай теелбектенер бе. Че аннаң андархызы саңай пасха оңдайнаң парыбысхан - ниме-де хысхырып, кӧксін сапхланып, узун сағалын ӱгдередіп, Данил кӱресчізер хорғыстығ кӧрімніг ойлап сыххан. Саңай чабыра пас парыбысхадаға тӧӧй.
Кибіс ээзі, андағ ниме поларын сағыбаан-тӱзебеен позы, саңай алаң асхан. Анаң, тӧдір пазынып-пазынып, кибістің тастынзар сығара чӱгӱрібіскен. Хахап парған харахтары чир-суғҷыбыста ла. Хайди хылынчатханын пір дее піл полбинчатхан осхас. Чир-суғҷылары, тізең, аны, хорығып, тизібіскен тіп санабысханнар, саңай алаң ас парған кӱресчее чоо хатхырысханнар, утырды тіп хысхырысчалар.
Іди Данил Анжиганов, алып-кӱлӱкнең харбаспин даа, чиңіс тутханға саналған. Амды ағаа хара хустың теелбегін толдырарға кирек. Мына хайди ол пӧзік чайаачы узын толдыразынаң кӧзіт пирген: холларын чаза тутхлабызып, анаң на ипти сіліг кірлектен чӧр сыххан. Ӱлӱкӱнге чыылған кӧп саннығ чонның хазыр айа сабызы чайаачы усха иң аарлығ тӧлег полчатпас па. Ойыннар кӧзідерге парған артист спорт сыйиинаң таныхталғанын хысхаҷахти пас салтырбын иргі блокнодымда.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы