МЫЛТЫХ ӰЛӰКУНІ ПАЗА ӦРТТЕР
19.01.2018
Хабарлар
17 январьда Хакасияның правительствозында сағыбаан саайлар паза ӧрттер полдыртпазынҷа комиссияның чыылии ирткен
Чыылығның тоғызын Хакасия пазы орынҷызының тоғызын толдырчатхан, комиссияның кнезі Владимир Крафт апарған. Хайди ол искірген, чыылығның ӱзӱриине ікі сурығ сығарылча: республикада Мылтых ӱлӱкӱнін хайди иптіг иртірібізердеңер паза пу чыл пасталғаннаң ӧрттер саны тың ӧс парыбысханнаңар, ол киректі хайдағ оңдайнаң тӱзедердеңер. Чыылығ правительствоның видео-конференциялар залында ирткен.
Владимир Александровичтің чооғынаң, Мылтых ӱлӱкӱнінде чон суға кірер прай орыннарны азынада хорғыс чох, истіг оңдайлығ тимнеп саларға кирек. Андағ прай участоктарда чарых ползын, суға кірҷең паза пасха саринаң сыхчаң пасхыстар пар поларға кирек, чылынҷаң орыннар, ізіг чей тимнеп саларға киректелер.
МЧС, МВД тоғынҷылары, имҷілер дежурство апарарлар, пуссар техника позытпасха ГИБДД инспекторлары тоғынарлар.
Аның соонда город-аймахтардағы комиссияларның устағҷылары теести хайди тимнен салғаннаңар сан пиріс тутханнар. Іди Абазада ӱлӱкӱнні чахсы иртірібізерге прай ниме тимде одыр, город администрациязының устағҷылары суға сомҷаң участокты постары сыныхтағда тутчалар. Анда суға 300-че кізі кірері кӧрілче.
Ағбан пилтірі аймаанда суға кірер ікі ле орын кӧріл партыр - Томыҷахтар паза Сапогов аалларда ла. Аймах кініндегі чуртағҷылар суға кірерге Ағбанзар чӧрчеткенін Владимир Крафт критикаа тартхан. Посёлокта суға сомҷаң орын тимнирге кирек полған теен ол.
Ағбандағы комиссия кнезі Андрей Клюевтің искіриинең, городта суға кірер ікі орын тимде: пірсі - Тынағ паркындағы дренада, ікінҷізі - Никольскай тигіриб хыринда, Ағбан суғда. Прай ікі муңҷа кізі килері кӧрілче. Городсар Харатастаң паза Ағбан пилтірінең суға кірерге килчелер. Кізілерге чылынарға КамАЗ автомобиль тимде (пылтыр ГАЗ-66 полған).
Хайди Владимир Крафт таныхтаан, Ағбан городха ікі ле орын асхынах, хоза участоктар табарға кирек полған, ағаа хоза чылынарға пір автомобиль асхынах, пестіг палаткалар турғызарға кирек полар.
Чыылығда пасха даа город-аймахтардағы комиссиялар кнестері хайди тимнен салғаннаңар сан пиріс тутханнар. Крафттың чооғынаң, чыл сай алнынзар парчадарға кирек, кӧзідімге, пӱӱлгі тимненіс пылтырғызынаң артых поларға...
Ікінҷі сурығда ӧрттер пӱӱл кӧп сыхчатханы, ағаа хоза анда кізілер ӱрепчеткені ӱзӱрілген. Пу сурығҷа МЧС-тың Хакасияҷа Оӧн управление пастығының орынҷызы Денис Коновалов чоох тутхан. Хайди ол таныхтаан, пӱӱл республикада 55 ӧрт ӱзірілген, анда алты кізі ӱреен, пір кізі палығлатхан. Орттер саны пу тусха пылтырғызынаң 18-ке кӧп. Муниципалитеттерде профилактика тоғызы уйан апарылча. Аалларда ӧрттердең тоғыр кӱрезіг апарар сурығҷа чыылығлар иртірілбинче. Пос кӧңнінең тоғынчатхан ӧрт ӱзірҷеңнерні махтаға сығарар, хайдағ-да оңдайнаң сыйыхтир оңдайлар табарға кирек.
Чыылығның тоғызын тоозып, Владимир Крафт таныхтаан: «Пазағы неделяда соох кӱннер турыбызар, чил поларға айабас. Аннаңар чилліг кӱнде азых отнаң тузаланарға пірдеезіне чаратпасха кирек. Аймах кіннерінде тасхар искіріглерні чонға динамиктер пастыра читірерге чарир. Соохта чуртағҷылар электроприборларнаң кӧп тузаланарлар, аннаңар прайзына сизіктіг поларға кирек... »
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы