АЛЫПТЫҒ НЫМАХТАРНЫҢ ИИРІ
19.01.2018
Хабарлар
Алыптығ нымахтар хакас чонның иң улуғ ис-пайы полча. Олар чонның пурунғызынаң, чозахтарынаң таныстырчалар. Че пӱӱнгі кӱнде хакас хайҷы-нымахчыларның кибірі ундудыл таа парир. Амды пу кибірні «Улгер» ансамбль айландырарға кӱстенче.
Килчеткен неделяда, 24 январьда 18.30 часта, Хакас филармониязының кічіг залында чайаачы устар, «Тулаға» концертті кӧзідіп, кип-чоохтарның, алыптығ паза чазағ нымахтарның ӱзіктерін толдырарлар. Ӧменің хоос устағҷызы Кучен Ай Чарых Сайынның (Вячеслав Кученов) таниинаң, концертке Пётр Курбижеков, Борис Коков паза Семён Кадышев ысхан нымахтар таллалғаннар. Оларны ӧмедегілер иргі оңдайнаң толдырарлар.
Артист чоохтаан: «Мының алнында хакас хайҷылар алыптығ нымахтарны, кӧг тириинең ойнап, ысчаңнар. Ідӧк хакас фольклорында чазағ нымахтар пар. Оларны пурунғыларыбыс чыылған чонға, кӧг тириинең тузаланмин, чоохтап пирҷеңнер. «Ӱлгер» ансамбльның артисттері, саблығ хайҷыларның кибірлеріне тӧстеніп, концертті иртірерлер.
Мирген Иргит (Владимир Доржу) «Хан Киҷегей» чазағ нымахты, хайлап, чоохтап пирер. Тагир Асачах (Вячеслав Асочаков), ыыхнаң ойнап, «Алтын Хан Хыс» алыптығ нымахты ызар. Артист ідӧк хайлир. Тюльбер Пӧгечі (Антонида Тюльберова) «Тасха Матырның» ӱзігін тимнеп салған. Чиит ипчі, топчыл (ікі хыллығ) хомыснаң ойнап, сарнир. Алтын Тан Айас (Анна Бурнакова) «Хан Мирген» алыптығ нымахтың ӱзігін кӧзідер. Ол кӱңӱр (ӱс хыллығ) хомыснаң ойнапча. Мин «Айдолайның» ӱзінҷі чардығын толдырарбын.
Алыптығ нымахты ызары - аар тоғыс. Аның пӱдізін чахсы пілерге кирек. Тиктең нимес хакас хайҷылар чонда іди пӧзік паалалҷаңнар. Алыптығ нымахтар иирін пір чыл тимнеебіс. Аны «Тулаға» адап салғабыс. Тулаға - алыптарның пӧрии. Сизінгенде, амғы туста алыптығ нымахтарны исчең кізі асхынах халған. Пылтыр, февральда «Айдолай» алыптығ нымахты филармонияның улуғ залында толдырғанда, кӧп нимес кӧрігҷі полған. Амды иирні кічіг залда иртірербіс, ағаа толдыра кізі чыылызар тіп ізенчебіс. Прайзын хакас алыптарның махачызына чарыдылған нымахтарны истіп аларға хығырчам. Піс, «Улгер» ансамбльның артисттері, ӧбекелерібістің чуртас-кӧрізінеңер, олар Ада чир-суубысты арачылааннаңар сарнап пирербіс».
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы