ПОЛҒАН НА ИМНЕГ ТУРАЗЫНА - ИНТЕРНЕТ
07.02.2018
Хабарлар
Хакасия правительствозында республика пазының орынҷызы Ирина Смолина, министерство паза ведомство кізілерінең тоғазып, регионда палғалыс сурығларын тилідерінеңер чыылығ иртірген.
Россия президенті Владимир Путин 1 декабрьда 2016 чылда федеральнай чыылығда, Россия Федерациязының коммуникация паза палғалыс министерствозынзар айланып, хазых хайраллир структураларда палғалыс оңдайларын тилідерге погін турғысхан. Президент 2017-2018 чылларда хазна поликлиникаларына паза имнег тураларына Интернетче палғалыс тудар оңдайларны кирерге чахаан. Хысха тус аразына имнег туралары амғы тусха килістіре палғалыс тудар оңдайлығ поларға киректер.
- Хазна, имнег тураларынзар, поликлиникаларзар пӱӱл Интернет тартып, улуғ тоғыс ит саларға погінче. Пу программа хоостыра сірердең, социальнай сфераларнаң палғалыстығ министерство-ведомство устағҷылары, ідок город-аймах пастарының орынҷылары, Интернет киректепчеткен социальнай учреждениелерні таныхтап саларға сурынчам. Пу программаа ідок ыраххы ааллар кірчелер. Мындағ оңдай пирілчеткенде, толдыразынаң тузаланарға кирек, - таныхтаан Ирина Смолина.
Россия правительствозы чарадиинаң пу тоғыстарны апарарына 5,46 миллиард салковай позыдылған. Хазнаның имнег учреждениелерінде Интернет палғалызын тартар тоғыстарны «Ростелеком» компания толдырар. Ағаа хоза, олох компания «Наа технологияларнаң тузалан поларын тиң идері» проектче кічіг аалларзар Интернет тартар. Имнег тураларында ӧӧнінде кабель пастыра Интернет палғалызы полар. Андағ учреждениелерде Интернеттің табырии - секундада 10 Мбит. Пӱӱл тиксі Хакасияда 70 имнег туразы паза амбулаториязы табырах Интернетнең тузаланар. Ідок республикадағы кічіг ааллар чуртағҷыларына Интернетнен тузаланҷаң оңдайлар полар.
«Ростелекомның» Хызылчардағы филиал директорының орынҷызы Валерий Клейкин апарылар тоғыстардаңар чоох тутхан.
- Тиксі хазнада пу программаларҷа Интернет палғалыстары 13899 имнег учреждениезіне пирілер. 2017 чылда 4000-ҷа учреждениее Интернет пирілген. Пасхазына пӱӱл Интернет сетьтері тартылар.
Хакасияда ікі улуғ проектче тоғыс апарылар: «Интернет сетьтерінзер имнег организацияларын паза имнег-профилактика учреждениелерін кирері»; «Наа технологияларнаң тузалан поларын тиң идері». Пу ікі проект федеральнай бюджет ахчазына чуртасха кирілче. Ідок пӧгін турча ааллардағы пасха даа социальнай объекттерзер Интернет палғалызын кирері. Ол санда чуртағҷыларның чуртарына.
Пӱӱл піс 70 имнег учреждениезінзер кабель тартарбыс, Интернет сетьі полған на имнег туразынзар пирілер. Таныхтирға кирек, кабель хоостыра Интернет палғалызын пирер оңдай чох полза, спутник каналы турғызылар, хайда Интернеттің табырии секундада 5 Мбит полар, - чарытхан Валерий Клейкин.
Хакасияның хазых хайраллаҷан министрінің пастағы орынҷызы Александр Стреленко искірген:
- Пӱӱл «Телемедицина» федеральнай проект тоғынып пастапча. Имҷілер полған на имнег туразында Интернетсер кірер ондайлығ поларға киректер, анзы ағырчатхан кізінің хазиинаңар искірерге полызар. Ідок Интернет пастыра киректелчеткен специалисттерзер пазын саларға чарир. Амғы туста аймахтағы имнег тураларында андағ оңдайлар пар. 2018 чыл тоозылғанҷа, участковай имнег тураларында паза амбулаторияларда андағ оңдай пол килер.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы