ААЛ-ГОРОДТАРДА ИСТӀГ ОҢДАЙЛАР ТӦСТЕЛЕР
13.02.2018
Хабарлар
«Хакасия» газетаның редакциязында «Городта истіг оңдайлар тӧстирі» проектке чарыдылған пресс-конференция ирткен
Анда Хакасияның пӱдіріг паза чурт-коммунальнай хоных министрi Валерий Келин паза Ӧӧркі Чӧптің мандат комиссиязының кнезі Виктор Лебедев араласханнар. Пӱӱлгі чылдаң сығара «Городта истіг оңдайлар тӧстирі» федеральнай проектнең пӱдіріг паза чурт-коммунальнай хоных министерствозы устапча. Амғы туста пу министерство 2018-2019 чылларда проектте аралазар муниципальнай пӱдістернең уламох чағын тоғынарға пӧгінче. Пу кирек проектті чуртасха киреріне федеральнай бюджет Хакасияа субсидия пирче. Кӧп квартиралығ тура ибіркізін иптиріне субсидияның сині 109 млн 802 муң салковайға тиңнелче. Чон чӧрчеткен чирлерні иптиріне федеральнай бюджеттең 5 млн 807 муң салковай позыдылар. Ағаа хоза, тура ибіркі чирлерін иптиріне республика бюджеді 9 млн 806 муң салковай хорадар, чон чӧрчеткен чирлерні иптиріне - 90 муң салковай.
«Городта истіг оңдайлар тӧстирі» проектте аралазар ӱчӱн муниципальнай пӱдістернің бюджет сині паза чуртағҷыларның саны санға алылча. Аал-городта 4 муңнаң кӧп кізі чуртаза, кӧп квартиралығ туралар полза, ол пу проектте аралас полар.
- Пістің регионда пӱӱл пу программада 14 муниципальнай пӱдіс аралазар: 8 аймах кіні паза 5 город. Программада араласчатхан аал-городтарға 1 мартха теере тура ибіркі чирлерінің паза парктарның дизайн проекттерінің чарадиин тимнебізерге кирек, - теен Валерий Келин.
Виктор Лебедев «Городта истіг оңдайлар тӧстирі» проектке хайдағ алызығлар киріл парғанын искірген. Іди 20 муң азыра чуртағҷылығ городтарда чон чӧрчеткен чирлерні иптирін чуртағҷылар пӧгерлер. Хакасияда андағ ӱс город: Ағбан, Харатас паза Саяногорск. Пу городтарның муниципальнай ӱлгӱлері рейтинг табығларын иртірері ӱчӱн нандырчалар. Пу сурығ хоостыра муниципалитеттерде ӧнетін чыылығлар иртірілген. Амғы туста муниципалитеттерде чуртағҷылардаң хайдағ объекттерні иптирінҷе чӧптер алылча. Ағбан чуртағҷылары 7 объектті иптирінеңер чӧп пирчелер, Харатас чуртағҷылары - 9 объект, Саяногорск чуртағҷылары - 10 объект. Пу саннар алыс таа парарлар. Чуртағҷыларнын чӧптері санға алылып, рейтинг табығлары иртер. Анда пу ӱс городтың чуртағҷылары аралас поларлар. Табығлар 16 - 23 мартта ирт парарға киректер. 2018 чылда программада хайдағ объект аралазарын чон таллир. Табығларда нинҷе-де объект ӱчӱн ӱн пирерге чарир. Аның салтарлары 25 мартха теере СМИ-ларда искірілер.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы