МАТЫРЛАРЫБЫС ХАҶАҢ ДАА УҢДУЛБАС
21.02.2018
Хабарлар
Тӧллер тоғазии. Ағбан пилтірінде Культура туразында «Ӱс тӧлнің тоғазии» мероприятие ирткен.
Ағбан пилтіріндегі Культура туразының фойезінде чааҷыларнын тиріглері кӧзідіге сығарылтыр. Іди столларда гранатометтар, холнаң хаап чӧрҷең паза станоктығ пулеметтар, автоматтарның аймах кӧрімнері, противогазтар, бинокльлар, пистолеттер, чааҷыларнын кип-азаа, бронежилеттер полғаннар. Прай пу тиріглерні кӧзідіге Чиит патриоттар кіні сығарған, аның устағҷызы Сергей Сериков кізілерні ол кӧзідігнең таныстырған.
«Ӱс тӧлнің тоғазии» мероприятиені Хакасияның чииттер киректерінҷе хазна комитеді иртірген. Ідӧк араласханнар «Кедр» чаа-патриот клубы, Чиит патриоттар кіні паза Культура туразының тоғынҷылары. Мындағ мероприятие кибірли чыл сай иртірілче, анда ӱс тӧл тоғасча: Илбек Ада чаа ветераннары, кизек чаалазығларда араласхан чааҷылар паза чииттер.
Олох фойедегі залда ах скатертьтернең чабылған столлар кистінде Илбек Ада чааның ветераны Михаил Александрович Лещёв, кизек чаалазығларда араласхан чааҷылар, «Боевое братство» пірігістің кізілері паза патриот клубтарының чииттері одырғаннар. Чыылысхан чон чоох-чаахнаң алысхан.
Культура туразында мероприятие пасталар алнында чыылығ араласчылары Ағбан пилтіріндегі сыыратта кизек чаалазығларда чуртазын пир салғаннарға веноктар паза чахайахтар салғаннар. Аймахтың чааҷылар комиссариадының тоғынҷылары, кизек чаалазығлар араласчылары паза чаа-патриот клубтарының кізілері хысха чоох тутханнар.
Фойедегі залда хызылған экранда кизек чаалазығларда чуртазын пир салған чир-суғҷыларның чуртас чолынаңар видео-роликтер кӧзіділген. Ідӧк экраннаң хости турғызылған стендте матырларның 11 сомы кӧзідіге сығарылған. Оларның санында, Чечняда чаалазып, чуртазын пир салған Николай Доможаковтың (1971 - 1995 ч.ч.), Данил Аткниннің (1978 - 2000 ч.ч.) паза Андрей Кучендаевтің (1975 - 1995 ч.ч.) сомнары полған.
Мындағ мероприятие чиит улусты Чир-суубысха хынарға ӱгретче, чааҷы службазына тимненерге чахсы хабасча.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы