АБАЗАНЫҢ НАА ЧУРТАССАР ХААЛАҒЛАРЫ
27.02.2018
Хабарлар
Тоғыс чорығы. 21 февральда Хакасия пазы Виктор Зимин Абазада тоғызын узаратхан. Устағҷы «Хозяинъ» ООО-да, Благовещенскай ачыхта, 49 №школада пол килген паза городтың ӧткін чуртағҷыларынаң тоғасхан.
Владимир НЕДОРЕЗОВ Виктор ЗИМИННІ заводтың тоғызынаң таныстырча.
ГОРОДТАҒЫЛАРҒА ИҢ АРЫҒ СУҒ
Тоғыс чорығы «Хозяинъ» ООО-ның ісчең суғлар сығарчатхан заводынаң пасталған. Хакасия пазы Виктор Зиминні удурлааннар предприятие ээзі Андрей Гущин паза завод директоры Владимир Недорезов. Олар республика пазына завод сығарызынаңар паза мыннаң мындар хайди тилирге
сағынчатханнарынаңар чоохтааннар.
Завод 2002 чылдаң тоғынча. Пӱӱнгі кӱнде предприятие 10 азыра аймах суғ сығарча, оларның ӧӧн чардығы газтығ суғлар паза квас. Завод директоры Владимир Недорезовтың искіриинең, чылда тиксі сығарыс 100 тоннаа чит парча. Чуртағҷыларның хынызынаң тузаланча квас. Чайғызын 50 азыра тонна садыл парчаттыр. Предприятие ап-арығ сууна махтанча.
Аны артезианскай суғдаң итчеттірлер. Амды предприятие ӧӧнінде Абаза городха ла тоғынча, суғның улуғ нимес чардығы Ағбан городтағы нинҷе-де садығ туразынзар тартылча. Ырах апарҷаң оңдай чоғыл. Прай ісчең суғлар ап-арығ суғдаң тимнелчелер, аннаңар олар ӱр тудылбинчалар, иң кӧп пір ай, тіпче предприятие ээзі Андрей Гущин.
Хакасия пазы Виктор Зимин сығарыс ап-арығ полчатханын чахсы паалаан паза завод Абазаның экономиказына, социальнай чуртазына туза ағылчатханын таныхтаан. Заводта прай тоғыс кізі істенче, оларның санында чиит хыс Виктория Непомнящая этикеткалар машиназында тоғынча. Олох аалҷыларға газтығ суғларны читірген.
Тиксі алза, предприятие мыннаң мындар тилирге пӧгін тутча, че сығарысты алғыдары - ол хоза пӱдіріг, наа оборудование паза наа тоғыс орыннары. Хакасия пазы, пос киреенең айғасчатханнарның сағыстарын истіп, республиканың экономика тилізі министерствозына полысчаң оңдай табарға чахаан.
ЧУРТАҒҶЫЛАР КӦҢНІ - ПАСТАҒЫ ОРЫНДА
Ирткен чылда тиксі хазнада «Городтағы истіг оңдайларны тӧстирі» проект кирілген, хайзы пӱӱл федеральнай программаа алғыдылған. Ирткен чылда Абазада ла 30 орын иптелген, ол санда городтың рыногы хыриндағы ачых. Ачых тигірибдең тоғыра орныхчатханнаңар, чуртағҷылар аны Благовещенскай адирға чаратханнар. Оларныңох кӧңнінең Гавриил архангелге хумартхы тас турғызылған. Пӱӱл пу ачыхты иптирінҷе тоғыстар узарадылар.
Виктор Зимин «Городтағы истіг оңдайларны тӧстирі» программа алылғанына чӧпсінген. Наа программа чуртағҷыларға городта чахсы оңдайлар тӧстирге полысча. Парктар, тура хыриндағы орыннар тӧстелгеннең ала иптелбееннерін чон чахсы пілче, уламох асхынах парыстығ город-аалларда. Амды чыл сай хайдағ орыннарны иптирін чуртағҷылар постары таллап турарлар. Аннаңар 2018 чылға чуртағҷыларны уламох ӧткін тудынарға хығырчалар.
Абаза город пазы Валентина Филимонованың искіриинең, чуртағҷылар ӱзӱриине 28 орын сығарылған, ол санда чон чӧрчеткен паза тура хыриндағы орыннар. Мартта оларны хайди даа таллап аларға паза дизайн-проекттерін чарадыбызарға кирек. Таныхтирға кирек, полған на орында хайдағ тоғыстар идері паза ниме киректелчеткені (кӧзідімге, одырчыхтар, спорт алай олғаннарға ойнаҷаң орыннар) чуртағҷылар кӧңнінең пӧгілче.
ЧИИТТЕРНІҢ САҒЫССЫРАЗЫ - ГОРОДТЫҢ ТАҢДАҒЫЗЫ
Хакасия пазы Виктор Зимин Абаза городтағы 49 № школазар килгендӧк, орындағы устағҷылар ағаа хоза пӱдірігні кӧзіткеннер. 1959 чылдох пӱдірілген школада актовай зал паза столовай кӧрілбеен, аннаңар хоза пӱдірігде пу ікі хайди даа кирек орын кӧріл парған. Аны 2013 чылдаң сығара пӱдір сыхханнар. Пу тусха тоғыстарның 40 % ле тимде, алнында ам даа илееде тоғысха тиксі 22 миллионҷа салковай киректелче.
Хакасия пазы Виктор Зимин стене-потолокты ситкіп кӧрглеен. Пӱдірігҷі полған кізі читпестерні пір-ікі ле таапчатхан. Город пазының паза ӱгредіг учреждениезі пастығының айланыстарынҷа чарадығ алған: хоза пӱдірігні чапчаң тимге сығарарға, чылларға сӧӧ тартпасха! Пу чарадығ хоостыра Хакасияның ӱгредіг паза наука министрі Лариса Гимазутинаа пу чылға хоза ахча табарға чахаан.
Паза пір сурығ - кӧзенектер. Олар школа пӱдірілгеннең ала алыстырылбаанға тӧӧйлер. Итсе, пӱӱнгі кӱнде школаларда кӧзенектер алыстырарынҷа программа тоғынча. Абазадағы 49 № школада кӧзенектер алыстырарын ідӧк республиканың кӧстегліг министерствозы пӧгер.
Орыс тілі паза литература кабинедінде Виктор Зиминні чидікпин сағааннар 11-ҷі класстың ӱгренҷілері. Республика пазы Абаза городтың улуғлар чуртазына кірчеткен тӧлі чир-сууна хайди даа туза ағыларына ізенчеткенінең ӱлескен паза пӱӱнгі ӱлгӱ пір профильліг городты азахха турғызарынҷа улуғ тоғыс апарчатханын чарытхан. Школа тоосчатхан оол-хыстар даа тӧреен-ӧскен городының таңдағызынаңар сағыссырапчатханнарын читіргеннер, сурығлар пиргеннер. Ағаа хоза чииттер президент табығларынаңар сағынчалар. Оларның піреезі, тізең, 18 мартта, пірге табығлар кӱнінде, пастағызын на табығ правозынаң тузаланар. Оларның чуртастарында пу пастағы табығлар полза даа, оол-хыстар хазнанын таңдағы тиксі чуртазына аның теелізін орта паалапчалар паза нандырығлығ хайчалар.
Сағыссыратчатхан сурығлардаң хыйа парып, Виктор Зимин чииттерні республика выпускнойында сағыпчатханын искірген. Аны истіп, пайаадаң тыып парған чіли одырчатхан оол-хыстарның сырайлары кӱлімзіреснең чари тӱскен. Хайдағ ырҷыны алай чайаачы ӧмені хығыртарын школа тоосчатхан олғаннар постары таллапчалар.
ӦТКӀННЕР - ӦӦН ПАСТАҒҶЫЛАР
Чииттер Абазаның таңдағызы полза, городтың иң ӧткін чуртағҷылары - пӱӱнгізі. Республика пазы Виктор Зимин, оларнаң тоғазып, Абазадағы рудникті ал халарынҷа паза пу тоғыс чорығында алылған чарадығлардаңар чарыда чоохтап пирген. Рудникті хайраллирында Россия президентінің, промышленность паза садығ министерствозының хабазии кирек полған. Оларның полызиинаң рудник тоғызын нааҷылабысхан.
- Мин пу аар чылларны иртерге киліскен ӱчӱн пыросынчам, - теен Виктор Зимин. - Рудникті хайраллап халарынҷа улуғ тоғыс иділ парған, олох туста городта пасха сығарыстарны, кӧстеглерні тилідерге кирек. Городтың таңдағызы пик палғалыстығ аның ӧткін чуртағҷыларынаң - сірернең.
Мындох республика устағҷызы городха грейдер аларға Хакасияның транспорт паза чол хонии министерствозына чахығ пирген. Хоза чол техниказы городха хайди даа кирек, тайға саринда чоллар тӧреміл хайығ киректепчелер нооза. Аннаң пасха, Виктор Зиминзер городтағы ДОСААФ пӧлиинің пастығы Сергей Веселов пӱдірігде тыхтағ тоғызын иртірерінҷе паза аның хыриндағы чирде асфальт тӧзирінҷе хабас пирерге сурынған. Республика пазынзар пасха даа айланыстар полған, хайзыларын ол хайыға аларға паза пӧкчең оңдай тілирге молҷаан.
Тиксі алза, тоғазығ уғаа чылығ ирткен. Чуртағҷыларға даа, республика пазына даа мындағ кӧні палғалыстар уғаа кирек санапчам. Республика пазы орындағы сидіксіністернең танызып алча, чуртағҷылар - республика пазының сағыссырастарынаң паза пӧгіннерінең.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы