МАРЫҒЛАР ХАЗЫР ИРТКЕН
28.02.2018
Хабарлар
Президенттiң чахиин - чуртасха. Хара тас аныпчатхан «СУЭК-Хакасия» пірігістің предприятиелері аразындағы азых спартакиада.
24 февральда республика синінде тоғынчатхан хабарҷыларның піріктірілген командазы пастағызын на «СУЭК-Хакасия» пірігістің хысхыдағы азых спартакиадазында араласты. Арға-мӧрій спорттың 4 кӧрімінҷе иртерге кирек полған: биатлон, баскетбол, волейбол паза мини-футбол. Че волейбол ойнаҷаң килістіре орын табылбин парғанда, аны марығдаң хыйа алыбысханнар. Аннаңар спорттың 3 кӧрімі халған.
«СУЭК-Хакасия» пірігіс спартакиаданы Минсуғ аймаандағы олғаннарның «Тесь» профилакторийінде иртірерге чарадыбысхан. Ол имнег учреждениезі ікі пӧлікке чарылчатхан полтыр - «Солнечный-1» паза «Солнечный-2». Спартакиада ікінҷі пӧлиинде ирткен. Тынағ кӱнге орта чон толдыра чыылтыр. Хакасиядағы харатасчыларның илеедезі сӧбірезінең хада килтір. Аннаңар профилакторийдегі Культура туразына кізі сыыспинчатхан.
Спартакиада пайрам кибірли азылған. «СУЭК-Хакасия» пірігістің устағ-пастаа харатасчыларны спорт мариинаң алғысгаан, тоғыста наа чидіглерге чидерге алғаан. Мында саннар кӧп адалғаннар, предприятиелернің, алынҷа харатасчыларның чидіглері кӧзідімге алыл турғаннар. Пу марығда прай 9 команда араласчатханы чарлалған. Олох туста Пхёнчханда иртчеткен Олимп ойыннарының хыйғызын сағысха киргеннер: «Ӧӧні - чиңіс тутханы нимес, ӧӧні - марығда араласханы».
Чыылысхан чонзар алғыстас сӧстерінең айланғаннар Хазна Думазынын депутаттары Николай Мельников паза Николай Валуев.
Н.Мельников позы харатасчы, Россияның Істеніс Матыры, тынаға сығар алнында «СУЭК» ООО-да 12 чыл тоғынтыр. Н.Валуев - боксер, тилекей чемпионы. Пу ікӧлеңнің хайзы даа - Россия президентіне кандидат Владимир Путиннің киртістіг кізізі. Аннаңар олар 18 мартта прайзын табыға килерге, турыстығ кандидат ӱчӱн ӱн пирерге хығырғаннар.
Анаң спартакиаданың марии хайдағ орыннарда иртердеңер чарлалған. Іди имнег учреждениезінің ӧӧн спортзалында баскетболҷа марығ ирткен. Биатлонисттер профилакторийнің ӧӧн стадионы ибіре чӱгӱрерге кирек полғаннар. Полған на командада 2 ирен, 1 ипчі саналған. Олох стадионда арған тӧзегліг орында мини-футболҷа марығласханнар.
Биатлон мариинда араласхан Александр Колбасовнаң чоохтасханда, саналығ чахсы чӱгӱрібістір, че таңмаларны чаза атхлабыстыр. Аның ӱчӱн ағаа штраф саннары пирілтір. Ол «Хакасия» газетаның сомҷызы, саналығ чӱгӱрер марығларда сыбыра аралазарға харасча. Спартакиада соонаң ол Таштып чирінде чыл сай иртірілчеткен «Шулбаевтің паза Швыдковтың лыжнязы» марығда аралазарға тимненче. Спартакиадада марығласхан спортсменнер аразында А.Колбасов часнаң прайзынаң улуғ полған, неке.
Хабарҷыларның командазы мини-футболда маңат тимненіс кӧзіткен. Мында ӧӧнінде РТС-тың тоғынҷылары ойнааннар. Олар, «СУЭК-Хакасия» пірігістің ӧӧн управлениезінің командазына ла 2:0 саннаң утырып, кӱмӱс медаль холға киргеннер, сіліг Кубокнаң паза пасха даа сыйыхтарнаң таныхтатханнар.
Баскетболисттерні махтирға кирек. Олар, марығда араласхан прай командаларны утып, чиңісчі полыбысханнар. Оларға алтын медальларнаң хада ахчалығ конверттер пирілгеннер. Нинҷе ахча «тоғынып» алғазар тіп сурзабыс, кӧйтік кӱлімзіресклеп салчалар, пу илбек чазытты пірдеезіне искірбеспіс тіпчелер.
Олғаннар тынанчатхан, имненчеткен профилакторийзер кіргендӧк, иң пастап аппағас харға хайығ айландырғабыс. Тынарға чи хайдағ ниик. Кӧмес изірткіліг дее тиирге чарир. Аннаңар даа харатасчыларның сӧбірелеріндегі палаларның ӧріністерін, кӧгліг хысхырыстарын оңарарға чарир полған. Піреезі, чӱгӱр киліп, аппағас хар ӱстӱнзер чадыбысча, амырап парча. Арығ киинең тынып, кӧк тигірзер нинҷе дее ӱр кӧр чадарға чарирҷых, сынап паарсах іҷелерінің ӱні оларзар чағдабыспаан полза. Арығли полбаста, киріліп-сӧӧлініп, турғлап килчелер.
- Мындағ марығ-чорыхтарны узарат турарға сағынчабыс. Чайаачы тоғыснаң айғасчатхан хабарҷыларға ол туза ла ағыл турар, - ӱлесче позының сағыстарынаң Россияның Журналисттер пірігізінің Хакасиядағы пӧлиинің кнезі Ольга Ширковец.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде