ЧИИТТЕР ПАЗА ХАЗЫХ ЧУРТАС - ПІСТІҢ ТАҢДАҒЫ КӰН
07.03.2018
Хабарлар
Тоғыс чорығы. Хакасия пазы Виктор Зимин тоғыс чорығынаң Нымырттығ посёлоксар чӧрген.
Республика пазы Виктор Зимин Нымырттығ посёлоктағы «РусГидро» компанияның ӱгредіг паза производство, искіріг-инновациялар кінінің студенттерінең тоғасхан.
- Прайзын чалахай кӱннең, - чооғын пастаан Хакасия пазы. - Нымырттығ посёлок уғаа сіліг орында орныхча. Сірердең ырах ниместе Россияның паза Хакасияның иң улуғ объекттерінің пірсі - Сойан-Сус ГЭС - тоғынча.
Социальнай чуртасха иң кӧп ахча позыдылча. Сірер чиитсер, ӱгренчеткеніңер - уғаа чахсы кирек. Пілчем, хайдағ сурығлар сірерні сағыссыратча, хайди чуртапчазар.
Пӱӱн мында улуғ социальнай объект азылча - саналығ чылҷаң «Нымырттығ хол» тынағ базазы. Пу пӱдіріг спортнаң айғасчатханнарға тимнелген, саналығ, сноубордтығ чыларға чарир.
Хакасия чуртағҷылары налогтар тӧлепчеткен иң чахсы регионнар санына кірче. Ирткен чылда республика 2 миллиард 400 миллион салковай налог ахчазын тӧлеен. Пӱӱл аннаңох кӧп тӧлирге кӱстенербіс.
Пӱӱнгі кӱнде сірер хомай нимес чуртапчазар, кӱстіг материальнай база, чахсы имнег пар. Мин сірерге кем піс полчатханыбысты искірерге сағынчам.
Піс Хакас Республика чуртағҷылары полчабыс. Ол Сибирьдегі регионнарның иң чиит республиказы полча. Республикадағы чииттернің кӧбізі тоғынча алай ӱгренче. Хакасия Россияның пис регион санына кірче, хайзында хорғыс чох чуртас парча.
Сірер, чииттер, чахсы ӱгреніңер, тоғыс, тізең, табылар. Сӧбірелер тӧстеп, палалар ӧскіріңер. Пістің республикада Сибирьдегі иң чахсы перинатальнай кін тоғынча нооза.
Республика пазы чииттерні 18 мартта иртер табығларда ӧткін аралазарға хығырған. Табығҷылар 50 %-тең артых килбин салза, табығлар иртпееніне саналча нооза. Хада-пірге тудынып, пір сағыс-кӧрістіг поларға чоохтаан. Запад, Россияны тізекке тӱзірер ӱчӱн, аймах сын нимес чоохтар сығарча. Андағ нимелерге хайығ салбин, пір ынағ ӧменең чуртирға кирек. Табығларға чӧрбеен кізі соонаң позының уйан чуртазы ӱчӱн пыролығларны тілеп чӧрбезін. Араласпаанда, соонаң нимее хоптанарға. Хазна полған на кізідең пасталча тиирге кирек. Кидеркі хазналар піс пик хазна полчатханыбысты кӧрзіннер. Полған на кізі таңдағы кӱннеңер сағыссырирға кирек.
Студенттер паза ӱгретчілер республика пазының чооғын ситкіп искеннер. Виктор Михайлович позының сӧбіре чуртазынаң хай пірее кӧзідімнер пир турған. Табығлар алнында чииттернең тоғазығ туза ла полар тіп сағынчам.
Пу тоғазығ соонаң Саяногорск городтың мэрі Василий Быков улуғ аалҷыларны «Нымырттығ хол» турист базазы азыларына апарған. Анда туристтер комплексі паза саналығ чӱгӱрҷең чол азылған.
2015 чылның апрельінде комплекс пӱдірілердеңер пічіктер тимнелген. 2016 чылда пӱдіріг пасталған полза, 2017 чылның декабрьында ол тоозылған. Пӱӱл, тізең, прай киректелчеткен чарадығлығ пічіктер тимнел парды.
«Нымырттығ хол» базаа мындағ нимелер кірчелер: канаттығ чол, саналығ чылҷаң хызыл паза от кӧк ӧңніг 500 -900 метрге чоллар, харны хаттырҷаң машина, кізілер тынанҷаң тура. Пір час тузына комплексте 1 муң 440 кізее чыларға паза тынанарға чарир.
- Иң пастағызын прайзына хазых чуртас алғапчам, - чоох тутхан В.М.Зимин. - Сірер чуртапчатхан илбек чирде мындағ комплекс азылғаны махтағлығ. Мында иң чахсы социальнай пӱдіріглер азыладыр. Хакасияда прай ниме чахсы, пӧзік синде ползын! Мин сірерні наа объект азылчатханынаң алғыстапчам!
Хакасия пазы ипчілерні чағдапчатхан 8 Март ӱлӱкӱннең алғыстаан. Ідӧк «РусГидро» акционерлер пірігізінің экономикаҷа паза инвестицияларҷа ӧӧн директор орынҷызы Виктор Хмарин чоох тутхан:
- Пӱӱнгі кӱнде «РусГидро» пірігіске 200 азыра компания кірче, Чукоткадаң пасти Алтынзархы Кавказха теере. Анда 70 муң азыра кізі тоғынча. Социальнай чуртасха улуғ хайығ салчабыс, аннаңар піске мындағ комплекс азылчатханы ӧріністіг. Нымырттығ поселоктың аалҷыларына паза чуртағӌыларына сыйых иділген.
«РусГидро» компания спорт тилізіне улуғ хозым итче. Пу спорт объекті Нымырттығның чонын кӧп чыл ӧріндірер тіп сағынчам.
Ідӧк устағҷылар чооғына П.С.Непорожнийнің адынаң Сойан-Сус ГЭС-тың директоры Валерий Кяри хозылған:
- Чалахай кӱннең, аарлығ чир-суғҷылар! Мының алнында пу орында олаңай хол полған. Амды аның кӧрімі алыс парды. Пу спорт объекті чыл тооза тоғынар. Канат-одырчыхтығ чол ідӧк тоғын турар. Тағ пазында ибіркіні кӧрҷең площадка тимнелген. Алғыс ползын «РусГидро» компанияа, піске мындағ сыйых иткен ӱчӱн!
Россия гимні хоостыра хазна, Хакас Республика паза «РусГидроның» флагтары чоғар кӧдірілгеннер. Канаттығ чолны тоғындырыбысханнар, устағҷыларны тағзар чохтап пар килерге иртіргеннер. Пілдістіг, саналығ чылбаза даа, ибіркі сіліг кӧрімнең ӧкерсініп аларға чарир нооза.
«Нымырттығ хол» азылчатханда, илееде кізі сноуборд чардызын хаап чӧрчеткен. Олар тағдаң чыларын чидікпин сағыпчатханнар. «Аттарынын поза паан» пос салыбызарға кирек ле. Чайғыда чылҷаң чолларҷа велосипедтіг ойлат чӧрерге чарир полар. Хазых чуртас ӱчӱн мындағ спорт объекттері азылчатханы уғаа чахсы кирек.
Автор :
Елена САГАТАЕВА Сомнар Максим АХПАШЕВТИ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде