ОЛАР ААРЛАСТА ПАЗА УЛУҒЛАСТА
13.03.2018
Хабарлар
Тоғазығ. 8 Март ӱлӱкӱн алнында Хакасияның пазы Виктор Зимин республиканың иң ӧткін ипчі чонынаң тоғасхан. Юлия ШРОО паза Наталья БАИНОВА.
Тоғазыға «Россиядағы іҷелер» халых пірігізінің региондағы пӧлиинің араласчылары, Хакасияның аймах-городтарындағы ӱгредіг паза чонға социальнай полызығ пирҷең устаныстарының специалисттері, ипчілернің халых пірігістерінің араласчылары чыылысханнар.
Хакасия пазы Виктор Зимин иң пастап ипчілерні 8 Март ӱлӱкӱнінең алғыстаан:
- Республикадағы прай иреннернің адынаң мин сірерні алғыстапчам. Хаҷан даа мындағ чалахай паза абахай полыңар. Паарсастарың пала-пархаларыңа, хада хонғаннарыңа, іҷе-пабаларыңа прайзына чит турзын. Ипчі кізі, палаларны ӧскірерінең пасха, тоғыста ідӧк чахсы чидіглерге читче. Аннаңар алғызым уламох улуғ ползын.
Мындағ алғыстастар соонаң Виктор Зимин Хакасияның тиксі тилізінеңер чоох апарған. Ӧӧн хайығны ол имнег киреене айландырған:
- Пу тусха теере республикада 30 азыра ФАП пӱдіріл парған. Оларда тоғынар фельдшерлерні аалзар тартып алар ӱчӱн, правительство ідӧк аймах программалар чуртасха кирче.
Паза устағҷы кізі Алтай аймаандағы Хубачар аалдағы поликлиниканы 1,5 чылға пӱкӱлеезінең тимге сығар саларға молҷаан. Ідӧк чоох парған ӱр ниместе тоғынып пастаан перинатальнай кіннеңер.
Пӱӱнгі кӱнге республикадағы аймах-городтарның аразында иң сидік оңдайларда Боград аймағы чуртапча. Ағаа хайди даа полыс пирерге кирек теен Виктор Зимин. Харатас городты ідӧк азахха пик турғызарға молҷағ пирілген.
Хакасия пазы Виктор Зимин пу тоғазығда ипчілер форумын тӧстир чӧпнең сыххан.
- Аның ӧӧн араласчылары «Россиядағы іҷелер» халых пірігізінің региондағы ипчілері поларҷых. Пасха даа республикалардағы іҷелер піссер кил парар оңдайлығ ползыннар, - чарытхан ол. Тоғазыға килген ипчілер мындағ пастағны чуртасха кирерге чаратханнар.
Наталья Баинова Алтай аймаандағы чонға социальнай полызығ пирҷең устаныс пастығының орынҷызы полча. Ол ідӧк аймахтағы ипчілер чӧбінде ӧткін араласча.
- Тоғазығ мындағ чахсы поларын мин сағыбаам даа. Пеер киліп, регион устағҷызынаң кӧстең кӧске чоох алызып алар оңдай полды. Анзы телевизор пастыра алай пасха кізідең искеннең саңай пасха нооза. Мин тың ӧріндім, - ӱлесче Наталья Баинова.
Юлия ШРОО, Асхыс аймаандағы «Алтынай» пірігістің кнезі, республика пазынаң тоғазыға ідӧк тың чӧпсінче. 8 Мартха чахсы сыйых полды тіпче ол.
Хакасия пазы Виктор Зиминнең тоғазыға килген ипчі чонның кӧңні уламох кӧдірілген, оларға чахайахтар паза сыйыхтар читірілгенде. Хада суурынған сом ідӧк полғанына ла чарых сағыстар ағылар.
Автор :
Александра СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы